ជាការចូលរួមចំណែកក្នុងសកម្មភាពការងារមនុស្សធម៏ជាមួយ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន នៅព្រឹកថ្ងៃទី ១៧ ខែ កញ្ញា ឆ្នាំ ២០១៩ លោក ចូ បីយ៉ុង មូ អគ្គនាយកក្រុមហ៊ុន រីណេ សេល ធី គ្លីនិក សាធារណរដ្ឋកូរ៉េ បាននាំយកនូវអង្ករចំនួន ១ តោន កន្លះ មកប្រគល់ជូន ឯកឧត្តម រដ្ឋមន្ត្រី នៅទីស្តីការ ក្រសួង ព័ត៌មាន ។
លោក ចូ បីយ៉ុង មូ បានគួសបញ្ជាក់ថា អង្ករទាំងនេះគឺជូន ឯកឧត្តម រដ្ឋមន្ត្រី ខៀវ កាញារីទ្ធ ទុកយកទៅបំពេញសកម្មភាពមនុស្សធម៏ ចែកជូនដល់អ្នកក្រីក្រ និងកុមារកំព្រា ដែលជានិច្ចកាល ឯកឧត្តម និងលោកជំទាវ តែងបានយកចែកជូន ដោយផ្ទាល់ដៃដល់ទីកន្លែងនានា ក្នុងពេលកន្លងមក ។ ដូច្នេះហើយទើបរូប លោក បាននាំយកនូវអំណោយជាអង្ករ ចំនួន ១ តោន កន្លះ មកជូន ឯកឧត្តម ដើម្បីយកទៅ ចែកបន្តទៀតនៅពេលខាងមុខ។
ឆ្លៀតក្នុងឱកាសនោះដែរ លោក ចូ បីយ៉ុង មូ បានជម្រាបជូនពីសកម្មភាព ការងាររបស់ក្រុមហ៊ុន គឺបានបើកដំណើរការនៅក្នុងប្រទេសកម្ពុជា ជិត ៣ ឆ្នាំ មកហើយ ដោយបានបើកជា គ្លីនិកកែសម្ផស្ស មានស្តង់ដាមកពីប្រទេសកូរ៉េ។
ឯកឧត្តម រដ្ឋមន្ត្រី ខៀវ កាញារីទ្ធ បានថ្លែងអំណរគុណចំពោះ លោកលោក ចូ បីយ៉ុង មូ អគ្គនាយកក្រុមហ៊ុន រីណេ សេល ធី គ្លីនិក ដែលបាននាំយកនូវអង្ករចំនួន ១ តោន កន្លះ មកប្រគល់ជូន ហើយ ឯកឧត្តម នឹងយក ទៅប្រគេនដល់ព្រះសង្ឍតាមបណ្តាវត្តនានា ក្នុងស្រុកកោះសូទិន ខេត្តកំពង់ចាម នាររដូវបុណ្យកាន់បិណ្ឌ ភ្ជុំបិណ្ឌ ដែលជាបុណ្យមួយដ៏ធំ សម្រាប់ ពុទ្ធបរិស័ទខ្មែរ តែងតែប្រារព្ធធ្វើជារៀងរាល់ឆ្នាំ ។ ជាមួយនេះ អង្ករទាំងនេះ ក៏នឹងទុកយកទៅឧបត្ថម្ភដល់កុមារកំព្រា ក្រីក្រ និង កុមារពិការភ្នែក កុមារ គ-ថ្លង់ ដែលជានិច្ចកាល ឯកឧត្តម និង លោកជំទាវ តែងបានជួយឧបត្តម ជាស្បៀងអាហារ និងថវិកាជារៀងរាល់ខែ ។
នៅក្នុងឱកាសនោះដែរ ឯកឧត្តម ខៀវ កាញារីទ្ធ ក៏បានថ្លែងអំណរគុណផងដែរ លោកអគ្គនាយកក្រុមហ៊ុន រីណេ សេល ធី គ្លីនិក ដែលបានសន្យាកាលពីពេលកន្លងមក ក្នុងឱកាសសម្ពោធអាគារសិក្សា នៅ ឃុំ កោះសូទិន ក្នុងការជួយវះកាត់ ព្យាបាល កុមារ មាត់ឆែប នៅក្នុងស្រុកកោះសូទិន ខេត្តកំពង់ចាម ក្នុង ១ ខែ ចំនួន ២ នាក់ ដោយឥតគិតថ្លៃ ៕
អត្ថបទ៖ ក្រសួងព័ត៌មាន
