កាលល្ងាចថ្ងៃទី ១៦ ខែ កញ្ញា ឆ្នាំ ២០១៩នេះ ម៉ូតូចំនួន ៣៨គ្រឿង បានដឹកជញ្ជូនមកដល់ខេត្តសៀមរាបហើយ ដើម្បីត្រៀមប្រគល់ជូនជារង្វាន់ដល់សិស្សដែលទទួលបាននិទ្ទេសA ចំនួន ៣៨នាក់ ដោយមានស្រី ១៥ នាក់ សម្រាប់មណ្ឌលខេត្តសៀមរាប នាសម័យប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា (២០១៨-២០១៩)ថ្ងៃទី១៩-២០ ខែសីហា ឆ្នាំ ២០១៩។
ក្នុងនោះដែរសម្រាប់ពិធីប្រគល់ម៉ូតូដល់សិស្សទទួលបាននិទ្ទេសA ឆ្នាំនេះ អាជ្ញាធរខេត្តសៀមរាប នឹងរៀបចំកម្មវិធីចែកនៅថ្ងៃទី ២០ ខែ កញ្ញា ឆ្នាំ ២០១៩ នៅសាលាខេត្តសៀមរាប ក្រោមអធិបតីភាពដ៏ខ្ពងខ្ពស់របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តសៀមរាប។
គួរឲ្យដឹងដែរថា សម្រាប់ឆ្នាំសិក្សា ២០១៨-២០១៩នេះ សម្រាប់មណ្ឌលសៀមរាប មានបេក្ខជនប្រឡង ចំនួនសរុប ៨៤២៨នាក់ មានស្រី ៤៦៨៩នាក់ មាន ១៣មណ្ឌល ស្មើ៣៨៤បន្ទប់ ដោយចែកចេញជា២ ផ្នែកគឺ:
ផ្នែកវិទ្យាសាស្ត្រពិត ៖ មាន៤មណ្ឌល ស្មើនឹង ១១៨បន្ទប់ មានបេក្ខជនចំនួន ២៩៤៤ នាក់ មានស្រី ចំនួន ១៧០៧ នាក់ ,ផ្នែកវិទ្យាសាស្ត្រសង្គម៖ មាន០៩មណ្ឌល ស្មើនឹង១៣០ បន្ទប់ មានបេក្ខជនចំនូន៥៧៧០នាក់ និង អវត្តមានមិនមកប្រឡង ចំនួន ៦៤នាក់ ។
ព័ត៌មានជាតិ ថ្មីៗ
ហើយចំពោះលទ្ធផលប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៨-២០១៩ នៅមណ្ឌលសៀមរាប មានសិស្សប្រឡងជាប់ចំនួន៦៥១១នាក់ ស្រី៣៧៦៣នាក់ ស្មើនឹង៧៧,២៦% ក្នុងនោះស្រី ៨០,០៨% ។ ហើយចំនួនគឺមានការកើនឡើងលើសឆ្នាំ២០១៨ គឺបានលើសពីឆ្នាំមុន ០,២៥% ក្នុងនោះដែរសិស្សដែលប្រឡងបានតាមនិទ្ទេសរូមមាន: និទ្ទេស A ចំនួន ៣៨នាក់ ស្រី ១៥នាក់ ,និទ្ទេស B ចំនួន ១៩០នាក់ ស្រី ១០៥នាក់ ,និទ្ទេស C ចំនួន ៤៧៤នាក់ ស្រី ២៩៤នាក់ ,និទ្ទេស D ចំនួន ១៣១៤នាក់ស្រី ៨២៨នាក់ និងនិទ្ទេស E ចំនួន៤៤៩៥នាក់ ស្រី២៥២១នាក់ ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
