នៅព្រឹកថ្ងៃទី១៨ ខែកញ្ញា ឆ្នាំ២០១៩នេះ ឯកឧត្ដម អ៊ឹង ហឿន ប្រធានក្រុមប្រឹក្សាខេត្តសៀមរាប និង លោកស្រី យូ សុភា អភិបាល រងខេត្ត រួមជាមួយឯកឧត្ដម លោកជំទាវ លោក លោកស្រី ជាសមា ជិកាក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាជុំវិញខេត្ត ព្រមទាំងពុទ្ធបរិស័ទ និងប្រជាពលរដ្ឋ បានមូលមតិគ្នាជាឯកច្ឆន្ទកាន់វេនទី៥ នៃពិធីបុណ្យភ្ជុំបិណ្ឌ នៅវត្តប្រាសាទគោកចក ស្ថិតក្នុងក្រុងសៀមរាប ។
ឯកឧត្តម អ៊ឹង ហឿន មានប្រសាសន៍ថា ក្នុងចន្លោះពី១៩៧៥ ដល់ឆ្នាំ១៩៧៩ ប្រទេសកម្ពុជាយើង បានធ្លាក់ចុះទៅក្នុងសម័យដ៏ខ្មៅងងឹតនៃរបបកម្ពុជាប្រជាធិបតេយ្យ ដឹកនាំដោយ ប៉ុល ពត បានបំបិទសិទ្ធិសេរីភាពរបស់ប្រជាជនគ្រប់បែបយ៉ាង ទាំងខាងជំនឿសាសនា ការដើរហើរ និងការនិយាយស្ដី ចំណែកព្រះសង្ឃវិញ ក៏ត្រូវបានចាប់ផ្សឹកកជម្លៀសចេញពីវត្ត ហើយវត្តអារាមក៏ក្លាយជាទីឃុំឃាំង កាប់សម្លាប់ ឬជាកន្លែងចិញ្ចឹមសត្វ ប្រជាជនត្រូវបានបង្អត់ អាហារ ធ្វើការពលកម្មស្ទើរគ្មានសម្រាក ភ័យព្រួយនឹងការកាប់សម្លាប់គ្រប់ពេលវេលា ប៉ុន្តែដោយសារគុណថ្ងៃរំដោះ៧មករា១៩៧៩ រណសិរ្សសាមគ្គីសង្គ្រោះជាតិកម្ពុជា ក្រោមការដឹកនាំរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសង្គ្រោះប្រទេស និងប្រជាជនកម្ពុជាឱ្យរួចផុតពីការបំផ្លិចបំផ្លាញ និងកាប់សម្លាប់ ។
ព័ត៌មានជាតិ ថ្មីៗ
ឯកឧត្តមប្រធានក្រុមប្រឹក្សាខេត្ត មានប្រសាសន៍បន្ថែមថា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនា បតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហេដ្ឋារចនាសម្ព័ន្ធរូបវន្ត ទាំងផ្នែកអាណាចក្រ និងពុទ្ធចក្រ ដូចជា ផ្លូវថ្នល់ ស្ពាន ទំនប់ទឹក ប្រឡាយ សាលារៀន មន្ទីរពេទ្យ ស្រះទឹក អណ្តូងទឹកព្រះវិហារ ឧបដ្ឋានសាលា សេនាសនៈ និងពិធីសាសនា នានា ។ល។ ត្រូវបានស្តារ និងអភិវឌ្ឍន៍ឡើងវិញយ៉ាងឆាប់រហ័សនឹកស្មានពុំដល់ ពិសេសព្រះពុទ្ធសាសនាត្រូវបានកំណត់ក្នុងរដ្ឋធម្មនុញ្ញថា ជា«សាសនារបស់រដ្ឋ» ហើយបច្ចុប្បន្នវិស័យពុទ្ធិកសិក្សា ក៏មានការរីកចម្រើនជាបន្តបន្ទាប់ ដោយយើងមានសាលាធម្មវិន័យ ចាប់ពីថ្នាក់ត្រី ថ្នាក់ទោ ថ្នាក់ឯក និងសាលាពុទ្ធិកបឋមសិក្សា រហូតដល់ពុទ្ធិកវិទ្យាល័យ និងមានពុទ្ធិកសាកលវិទ្យាល័យថែមទៀតផង ។
គួររំលឹកថា ក្នុងពិធីបុណ្យកាន់បិណ្ឌឆ្នាំ២០១៩នេះ រដ្ឋបាលខេត្តសៀមរាប បានរៀបចំការកាន់បិណ្ឌចំនួន០៧លើក គឺ៖ ១. ថ្ងៃទី១៤ ខែកញ្ញា ឆ្នាំ២០១៩ ជាថ្ងៃបិណ្ឌ១ នៅវត្តព្រះព្រហ្មរ័ត្ន ក្នុងក្រុងសៀមរាប , ២. ថ្ងៃទី១៥ ខែកញ្ញា ឆ្នាំ២០១៩ ជាថ្ងៃបិណ្ឌ២ នៅវត្តរាជបូព៌ ក្នុងក្រុងសៀមរាប , ៣. ថ្ងៃទី១៦ ខែកញ្ញា ឆ្នាំ២០១៩ ជាថ្ងៃបិណ្ឌ៣ នៅវត្ដទេពពោធិវង្ស ក្នុងក្រុងសៀមរាប , ៤. ថ្ងៃទី១៧ ខែកញ្ញា ឆ្នាំ២០១៩ ជាថ្ងៃបិណ្ឌ៤ នៅវត្តកេសរារាម ក្នុងក្រុងសៀមរាប , ៥. ថ្ងៃទី១៨ ខែកញ្ញា ឆ្នាំ២០១៩ ជាថ្ងៃបិណ្ឌ៥នៅវត្តប្រាសាទគោកចក ក្នុងក្រុងសៀមរាប , ៦. ថ្ងៃទី១៩ ខែកញ្ញា ឆ្នាំ២០១៩ ជាថ្ងៃបិណ្ឌ៦ នៅវត្តព្រះឥន្ទកោសីយ៍ ក្នុងក្រុងសៀមរាប និង ៧. ថ្ងៃទី២១ ខែកញ្ញា ឆ្នាំ២០១៩ ជាថ្ងៃបិណ្ឌ៧ នៅវត្តដំណាក់ចន្ទរាម(ហៅវត្តក្រកៀត) ក្នុងឃុំមុខប៉ែន ស្រុកពួក ។
សូមបញ្ជាក់ថា ពិធីបុណ្យកាន់បិណ្ឌ ឬដាក់បិណ្ឌ ឬអ្នកស្រុកខ្លះហៅថាបុណ្យកាន់វេន ជាបុណ្យតាមកាល និងតាមគន្លងប្រពៃណីព្រះពុទ្ឋសាសនា ដែលកើតមានឡើងតាំងពីសម័យពុទ្ឋកាលមកម្ល៉េះ ដែលកាលនោះមានរយៈពេល៣ខែគិតចាប់ពីថ្ងៃចូលព្រះវស្សារហូតដល់ថ្ងៃចេញព្រះវស្សា គេហៅថាបុណ្យបវរណាបច្ច័យបួន ដើម្បីផ្គត់ផ្គង់ភត្តាហារប្រចាំថ្ងៃដល់ព្រះសង្ឃដោយសារភ្លៀងជោគជាំ លំបាកក្នុងការត្រាចរបិណ្ឌបាត្រ ប៉ុន្តែចាប់ពីក្នុងរជ្ជកាលព្រះបាទអង្គដួងមកដល់បច្ចុប្បន្ន ពិធីនេះត្រូវបានប្រារព្ឋឡើងចាប់ពីថ្ងៃ១រោចដល់ថ្ងៃ១៤រោចខែភទ្របទ ដោយព្រះអង្គឈ្វេងយល់ថា ពិធីនេះមិនអាចធ្វើរយៈពេល៣ខែបានឡើយ ដោយសារប្រជានុរាស្ត្រជាប់រវល់ក្នុងការងារបង្កបង្កើនផល ទើបព្រះអង្គកំណត់ឱ្យធ្វើតែរយៈពេល១៥ថ្ងៃប៉ុណ្ណោះ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
