នាព្រឹកថ្ងៃទី១៧ ខែកញ្ញា ឆ្នាំ២០១៩នេះ អាជ្ញាធរជាតិអប្សរា បានរៀបចំកម្មវិធីអប់រំបរិស្ថាននិងដាំកូនឈើ១០០០ដើមនៅមុខប្រាសាទអង្គរវត្ត ក្រោមវត្តមានលោក យិត ចាន់ដារដ្ឋ អគ្គនាយក រងអាជ្ញាធរជាតិអប្សរា លោកជំទាវឧកញ៉ាបណ្ឌិត សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍន៍ ដោយមានការនិមន្ត និង អញ្ជើញចូលរួមពីសំណាក់ព្រះសង្ឃ មន្ទីរបរិស្ថាន អាជ្ញាធរមូលដ្ឋាន អ្នកលក់ដូរ មន្ត្រី បុគ្គលិក ពលករ នៃអាជ្ញាធរជាតិអប្សរា ប្រមាណជាង៥០០អង្គ/នាក់ ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានឱ្យដឹងថា បំណងសំខាន់នៃការរៀបចំកម្មវិធីអប់រំបរិស្ថានថ្ងៃនេះ គឺដើម្បីបញ្ជៀបចំណេះដឹងផ្នែកបរិស្ថាន ដល់អាជីវករដែលលក់ដូរក្នុងតំបន់អង្គរ ឱ្យចេះវេចខ្ចប់និងទុកដាក់សំរាមឱ្យបានត្រឹមត្រូវ និងឱ្យមន្ត្រីបុគ្គលិកនៃអាជ្ញាធរជាតិអប្សរាដែលបម្រើការនៅតាមប្រាសាទ យកចំណេះដឹងពីបរិស្ថាន ដើម្បីណែនាំភ្ញៀវលើការថែរក្សាបរិស្ថានផងដែរ ព្រោះបរិស្ថានគឺសំខាន់ណាស់ទាំងក្នុងតំបន់អង្គរនិងការរស់នៅប្រចាំថ្ងៃ ដែលគ្រប់គ្នាត្រូវប្រកាន់ខ្ជាប់គោលការណ៍បរិស្ថានស្អាតជានិច្ច ហើយចូលរួមទាំងអស់គ្នាដើម្បីឱ្យតំបន់អង្គរ មានសណ្តាប់ធ្នាប់ល្អ បរិស្ថានល្អ ទើបអាចទាក់ទាញទេសចរឱ្យមកទស្សនាបានច្រើនកុះករ។
ព័ត៌មានជាតិ ថ្មីៗ
លោកជំទាវឧកញ៉ាបណ្ឌិត សៀង ចាន់ហេង បានមានប្រសាសន៍ថា អង្គរវត្ត គឺជាកន្លែងគោរពបូជាដ៏ស័ក្តិសិទ្ធិនិងជាបុរាណដ្ឋានបេតិកភណ្ឌពិភពលោក ដែលត្រូវចូលរួមថែរក្សាការពារទាំងសំណង់ប្រាសាទដ៏វិចិត្រនិងបរិស្ថានឱ្យបានល្អប្រសើរ ហើយបញ្ហាបរិស្ថានគឺជារឿងសំខាន់នៅក្នុងតំបន់អង្គរ ដូច្នេះយើងត្រូវចូលរួមសម្អាតបរិស្ថានទាំងអស់គ្នា។
លោក យិត ចាន់ដារដ្ឋ បានលើកឡើងថា បញ្ហាបរិស្ថានក៏ជាកត្តាសំខាន់ដែលធ្វើឱ្យតំបន់ទេសចរណ៍អង្គរមានកំណើនទេសចរកើនឡើងនិងធ្លាក់ចុះ ហើយអ្វីៗទាំងអស់ គឺជាចំណែកនៃទំនួលខុសត្រូវរបស់អ្នកគ្រប់គ្នា ដើម្បីឱ្យបរិស្ថាននៅទីនេះស្អាត មិនមែនសម្រាប់ តែអាជ្ញាធរជាតិអប្សរាតែម្នាក់ឯងឡើយ ហើយទាក់ទងនឹងភាពស្រស់ស្អាតនៃបរិស្ថានក្នុងតំបន់អង្គរនេះដែរ អាជ្ញាធរជាតិអប្សរាក៏ធ្លាប់ទទួលបានវិញ្ញាបនបត្រ ពីស្ថាប័នធានាគុណភាពបរិស្ថានស្អាតពីប្រទេសជប៉ុនចំនួន៥ដងរួចមកហើយ ដែលបង្កើនទំនុកចិត្តដល់អ្នកមកទស្សនានៅតំបន់អង្គរ ដូច្នេះក្នុងឱកាសនេះ សំណូមពរអំពាវនាវឱ្យគ្រប់ភាគីពាក់ព័ន្ធ មានទាំងអ្នកលក់ដូរ អ្នកទេសចរ អ្នកបម្រើការងារក្នុងតំបន់អង្គរ បន្តការចូលរួមលើកកម្ពស់ បរិស្ថានស្អាតជាបន្តទៅទៀត ដើម្បីឱ្យអង្គរនៅតែជាទិសដៅទស្សនាលេខ១និងបរិយាកាសល្អរហូតទៅ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
