ប្រទេសអារ៉ាប់ប៊ីសាអូឌីត បានឲ្យដឹងថា សមត្ថភាពផលិតប្រេងឆៅរបស់ខ្លួន នឹងត្រូវបានស្តារឡើងវិញ យ៉ាងពេញលេញ នៅចុងខែកញ្ញានេះ បន្ទាប់ពីការវាយប្រហារ ដោយយន្តហោះគ្មានមនុស្សបើក នៅលើទីតាំងប្រេងចំនួនពីរ នៅភាគខាងកើតប្រទេស បានកាត់បន្ថយទិន្នផលប្រចាំថ្ងៃ ស្ទើរតែពាក់កណ្តាល កាលពីសប្តាហ៍មុន។
រដ្ឋមន្ត្រីថាមពល អារ៉ាប៊ីសាអូឌីត ព្រះអង្គម្ចាស់ Abdulaziz bin Salman បានថ្លែងនៅក្នុងសន្និសីទសារព័ត៌មានមួយនៅទីក្រុង Jeddah ថាផលិតកម្ម ដែលបាត់បង់ប្រហែលពាក់កណ្តាល មានចំនួនប្រមាណ ៥,៧ លានបារ៉ែលក្នុងមួយថ្ងៃ ឬប្រហែល ៥ ភាគរយនៃការផ្គត់ផ្គង់ពិភពលោកត្រូវបានស្តារឡើងវិញ។ លោកបានបន្ថែមថា ការផ្គត់ផ្គង់ប្រេងរបស់ប្រទេសនេះ ក៏បានត្រលប់ទៅកម្រិតមុន ការវាយប្រហារដោយប្រើទុនបំរុង។
ព្រះអង្គម្ចាស់បានមានបន្ទូលថា “មិនមែនជាការដឹកជញ្ជូនទំនិញ តែមួយលើកដល់អតិថិជនអន្តរជាតិទេ ឬនឹងត្រូវខកខាន ឬលុបចោលជាលទ្ធផលនៃការវាយប្រហារទាំងនេះ ទៅលើគ្រឿងបរិក្ខាររបស់រដ្ឋអារ៉ាប៊ីសាអ៊ូឌីត យើងបានបង្ហាញថា យើងមានភាពធន់នឹងប្រតិបត្តិការ ហើយបានបញ្ជាក់ពីកេរ្តិ៍ឈ្មោះរបស់យើង ក្នុងនាមជាអ្នកផ្គត់ផ្គង់ឈានមុខគេលើពិភពលោក” ៕
ប្រភព៖ដើមអំពិល
ដោយ ឈូក បូរ៉ា
