ថ្ងៃទី១៨ ខែកញ្ញា ឆ្នាំ២០១៩នេះ លោកស្រី យូ សុភា អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀម រាប បានជួបពិភាក្សាការងារជាមួយគណៈប្រតិភូពាណិជ្ជករខេត្ត សានស៊ី នៃសាធារណរដ្ឋប្រជាមានិតចិន ដឹកនាំដោយលោក Hou Shejiao លេខាបក្សនៃការិយាល័យកម្មសិទ្ធិបញ្ញាខេត្ត Shaanxi ។
លោកស្រី យូ សុភា អភិបាលរងខេត្តសៀមរាប បានបញ្ជាក់ថា ផ្អែកលើគោលនយោបាយផ្លូវមួយ ខ្សែរក្រវ៉ាត់មួយរបស់ប្រធានាធិបតីចិន ឯកឧត្ដម ស៊ី ជីងពីង និងគោលនយោបាយយុទ្ធសាស្ត្រ ចតុ កោណដំណាក់កាលទី៤ របស់រាជរដ្ឋាភិបាលកម្ពុជា ដឹកនាំដោយសម្ដេចតេជោ ហ៊ុន សែន នាយករដ្ឋមន្ដ្រី បានធ្វើឱ្យសេដ្ឋកិច្ចកម្ពុជាមានការលូតលាស់រីកចម្រើនឥតឈប់ឈរ និង ផ្ដើមចេញពីគោលនយោបាយ និងភាពជោគជ័យដែលយើងទទួលបាននាពេលនេះ ចាត់ទុកថា មានការលូតលាស់ខ្លាំង ក្រោមគោលនយោបាយនៃប្រទេសទាំងពីរ ខេត្តរបស់យើងទទួលអ្នកវិនិយោគ មកពីប្រទេសចិន ដែលកំពុងវិនិយោគ ដើម្បីអភិវឌ្ឍន៍នៅខេត្តសៀមរាប ហើយប្រជាជនខេត្តសៀមរាប ទទួលបានផលផ្លែផ្កាដូចគ្នា ដូច្នេះសមាគមពាណិជ្ជករខេត្តសានស៊ី និងរដ្ឋបាលខេត្តសៀមរាប រួមគ្នាដើម្បីភាពថ្កុងថ្កើងរុងរឿងទាំងអស់គ្នា ។
ព័ត៌មានជាតិ ថ្មីៗ
ក្នុងឱកាសនោះដែរ លោកស្រី យូ សុភា បានស្នើសុំលោកប្រធានគណៈប្រតិភូសមាគមពាណិជ្ជករ មានកិច្ចសហការល្អថែមទៀត ដើម្បីជំរុញអ្នកវិនិយោគខេត្តសានស៊ី អនុវត្តតាមច្បាប់នៃកម្ពុជា ទោះកម្ពុជាជាលំនៅដ្ឋានទី២ របស់ពាណិជ្ជករក៏ដោយ តែយើងបានរស់នៅលើទឹកដីតែមួយជាមួយគ្នា យើងធ្វើសកម្មភាពនៅកន្លែងតែមួយជាមួយគ្នា ចាំបាច់មានការឈ្វេងយល់ពីគ្នាទៅវិញទៅមកឱ្យបានល្អ ទាំងផ្នែកច្បាប់ វប្បធម៌ ប្រពៃណី និងជីវភាពរស់នៅប្រចាំថ្ងៃ ដើម្បីចែករំលែកឱ្យមានប្រសិទ្ធភាព ។
លោក Hou Shejiao ប្រធានប្រតិភូសមាគមណិជ្ជករចិនខេត្តសានស៊ី បានលើកឡើងថា ការបង្កើតសមាគមពាណិជ្ជករខេត្តសានស៊ី ផ្ដោតលើចក្ខុវិស័យសម្រាប់ក្រុមហ៊ុន និងអាជីវកម្មរបស់ខេត្តសានស៊ីនៅតាមណ្ដារប្រទេសកំពុងអភិវឌ្ឍន៍ ក្នុងនោះមានប្រទេសកម្ពុជាផងដែរ ក្នុងគោលបំណងពង្រឹងសាមគ្គីរបស់សហគ្រិន និងសហគ្រាសខេត្តសានស៊ីនៅក្នុងប្រទេសកម្ពុជា ដូច្នេះ នេះជាប្រវត្តិសាស្ត្រសម្រាប់សភាពាណិជ្ជករសានស៊ីនៅកម្ពុជា ក្នុងនោះខេត្តសៀមរាបដែលមានសហគ្រាស និងបងប្អូនខេត្តសានស៊ីជាច្រើនបង្កើតជាគ្រួសារថ្មី ហើយសមាគមសភាពាណិជ្ជករសានស៊ី ប្រកាន់ភ្ជាប់នូវគោលនយោបាយ ខ្សែក្រវ៉ាត់មួយ វិថីមួយ សាមគ្គីជាធ្លុងមួយ ដើម្បីអភិវឌ្ឍន៍បងប្អូនសានស៊ីក្នុងខេត្តសៀមរាប ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
