នៅព្រឹកថ្ងៃទី១៩ ខែកញ្ញា ឆ្នាំ២០១៩នេះ គណៈកម្មាធិការសម្របសម្រួល អន្តរជាតិដើម្បីអភិរក្ស និងលើកតម្លៃរមណីយដ្ឋានប្រាសាទព្រះវិហារ ដែលហៅកាត់ជាភាសាបរទេសថា ICC-Preah Vihear បានបើកកិច្ចប្រជុំបច្ចេកទេសលើកទី៥ របស់ខ្លួនជាផ្លូវការហើយ នៅសាលសន្និសីទអាជ្ញាធរជាតិអប្សរា ក្រោមអធិបតីភាពលោកជំទាវបណ្ឌិត ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ទទួលបន្ទុកបេតិកភណ្ឌវប្បធម៌ និងជាប្រធានប្រតិភូរាជរដ្ឋាភិបាល ដែលសម្របសម្រួលដោយ ឯកឧត្តម ZHOU Jiagui សហប្រធានចិន និងលោកជំទាវ Manika JAIN សហប្រធានឥណ្ឌា ដោយមានការចូលរួមពីប្រទេសជាសមាជិកស្ថាបនិករួមមាន៖ បារាំង , ប៊ែលហ្សិច , ជប៉ុន , ថៃឡង់ដ៏ និង សហរដ្ឋអាមេរិច ព្រមទាំងអ្នកជំនាញការជាតិ និងអន្តរជាតិលើផ្នែកអភិវឌ្ឍន៍ និងអភិរក្ស ភ្ញៀវកិត្តិយសជាតិ និងអន្តរជាតិ សរុបប្រមាណ ២៥០នាក់។
កិច្ចប្រជុំនេះ មន្ត្រីជំនាញនៃអាជ្ញាធរជាតិព្រះវិហារ នឹងធ្វើបទបង្ហាញទៅលើលទ្ធផលការងារមួយចំនួនដែលបានអនុវត្តកន្លងមក នៅក្នុងរមណីយដ្ឋានប្រាសាទព្រះវិហារ និងរមណីយដ្ឋានកោះកែរ ដើម្បីជួសជុលនិងអភិរក្សនៅតំបន់រមណីយដ្ឋានទាំងពីរនេះ ។
តាមការគ្រោងទុក កម្មវិធីប្រជុំនេះធ្វើឡើងក្នុងរយៈពេលមួយថ្ងៃពេញ ដោយពេលព្រឹក ផ្តោតលើការធ្វើបទបង្ហាញរបស់មន្ត្រីជំនាញអាជ្ញាធរជាតិព្រះវិហារ អំពីលទ្ធផលការងារមួយចំនួនដែលបានអនុវត្តកន្លងមកនៅក្នុងរមណីយដ្ឋានប្រាសាទព្រះវិហារ និងរមណីយដ្ឋានកោះកែររួមមាន៖ ១. លទ្ធផលសិក្សាស្រាវជ្រាវដើម្បីអភិរក្សជណ្តើរខាងជើងប្រាសាទព្រះវិហារក្រោមមូលនិធិស្ថានទូតសហរដ្ឋអាមេរិចដើម្បីអភិរក្សបេតិកភណ្ឌវប្បធម៌ , ២. លទ្ធផលការងារអប់រំផ្សព្វ ផ្សាយ អំពីបេតិក- ភណ្ឌនៅរមណីយដ្ឋានប្រាសាទព្រះវិហារ , ៣. លទ្ធផលសិក្សាពីប្រព័ន្ធធារាសាស្ត្រនៅរមណីយដ្ឋានប្រាសាទ ព្រះវិហារ និងរមណីយដ្ឋានកោះកែរ , ៤. លទ្ធផលការងារអភិរក្សប្រាសាទថ្មបាយក្រៀមក្នុងបរិវេណប្រាសាទធំ នៅរមណីយដ្ឋានកោះកែរ , ៥. លទ្ធផលការងាររៀបចំផែនទីហានីភ័យនៅរមណីយដ្ឋានកោះកែរ និង ៦. របាយការណ៍វឌ្ឍនភាពការរៀបចំផែនការគ្រប់គ្រងទេសចរណ៍រមណីយដ្ឋានកោះកែរ។
សម្រាប់នៅពេលរសៀល កិច្ចប្រជុំនឹងផ្តោតលើការធ្វើបទបង្ហាញរបស់ដៃគូអន្តរជាតិរបស់អាជ្ញាធរជាតិព្រះវិហារ មានជាអាទិ៍៖ ១. ចំណាប់អារម្មណ៍របស់ឯកឧត្តម CHAO Xiaoming អគ្គនាយកបណ្ឌិតសភា បេតិកភណ្ឌវប្បធម៌ចិន ចំពោះគម្រោងជួសជុល គោបុរៈទី១ ទី២ និងទី៣ ដែលភាគីចិនទទួល , ២. បទបង្ហាញ ពីការងារអភិរក្ស និងជួសជុលគោបុរៈទី៥ ប្រាសាទព្រះវិហារ ដោយលោក Denvendra Singh SOOD អ្នកជំនាញការឥណ្ឌា , ៣. បទបង្ហាញអំពីវឌ្ឍនភាពគម្រោងអភិរក្សបដិមាព្រះសិវៈរាំនៅប្រាសាទកោះកែរ ដោយលោក Eric BOURDONNEAU អ្នកជំនាញសាលាបារាំងចុងបូព៌ា និងលោក ឆាន់ ចំរើន អ្នកជំនាញ សារមន្ទីរជាតិភ្នំពេញ , ៤. លទ្ធផលការសិក្សាស្រាវជ្រាវដោយប្រព័ន្ធរ៉ាដាទៅក្នុងដី៖ ការងារទីវាលដែលអនុវត្ត នៅក្នុងខែមីនា ឆ្នាំ២០១៩ ដោយបណ្ឌិត Sarah KLASSEN សាកលវិទ្យាល័យ British Columbia និង ៥. បទបង្ហាញអំពីកម្មវិធី Lidar នៅរមណីយដ្ឋានកោះកែរ ដោយលោកបណ្ឌិត Karoly BELENYESY វិទ្យាស្ថាន ស្រាវជ្រាវអាស៊ីភាគខាងត្បូង និងអាស៊ីអាគ្នេយ៍នៃប្រទេសហុងគ្រី ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
