នាព្រឹកថ្ងៃទី១៩ ខែកញ្ញា ឆ្នាំ២០១៩ សម្ដេចពិជ័យសេនា ទៀ បាញ់ ឧបនាយករដ្ឋសមន្ត្រី រដ្ឋមន្ត្រីក្រសួងការពារជាតិ និង ប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប រួមជាមួយឯកឧត្ដម លោកជំទាវ លោក លោកស្រី ជាសមាជិកព្រឹទ្ធសភា សមាជិករដ្ឋសភា ថ្នាក់ដឹកនាំក្រសួងការពារជាតិ ក្រសួងមហាផ្ទៃ ប្រធាននិងអនុប្រធានក្រុមការងារថ្នាក់ជាតិចុះមូលដ្ឋានក្រុង ស្រុកក្នុងទូទាំងខេត្ត ប្រធាននិងសមាជិកក្រុមប្រឹក្សាខេត្ត អភិបាលនិងអភិបាលរងខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត អាជ្ញាធរមូលដ្ឋានក្នុងក្រុងសៀមរាប មន្ត្រីរាជការក្នុងខេត្ត និងពុទ្ធបរិស័ទចំណុះជើងវត្ត បានមូលមតិគ្នាជាឯកច្ឆន្ទកាន់វេនទី៦ នៃពិធីបុណ្យភ្ជុំបិណ្ឌ នៅវត្តព្រះឥន្ទកោសីយ៍ ក្នុងក្រុងសៀមរាប ។
មានប្រសាសន៍ក្នុងឱកាសនោះ សម្ដេចពិជ័យសេនា ទៀ បាញ់ បានឲ្យដឹងថា ពិធីបុណ្យកាន់បិណ្ឌ ឬដាក់បិណ្ឌ ឬអ្នកស្រុកខ្លះហៅថាបុណ្យកាន់វេន ជាបុណ្យតាមកាល និងតាមគន្លងប្រពៃណីព្រះពុទ្ឋសាសនា ដែលកើតមានឡើងតាំងពីសម័យពុទ្ឋកាលមកម្ល៉េះ ដែលកាលនោះមានរយៈពេល៣ខែគិតចាប់ពីថ្ងៃចូលព្រះវស្សារហូតដល់ថ្ងៃចេញព្រះវស្សា គេហៅថាបុណ្យបវរណាបច្ច័យបួន ដើម្បីផ្គត់ផ្គង់ភត្តាហារប្រចាំថ្ងៃដល់ព្រះសង្ឃដោយសារភ្លៀងជោគជាំ លំបាកក្នុងការត្រាចរបិណ្ឌបាត្រ ប៉ុន្តែចាប់ពីក្នុងរជ្ជកាលព្រះបាទអង្គដួងមកដល់បច្ចុប្បន្ន ពិធីនេះត្រូវបានប្រារព្ឋឡើងចាប់ពីថ្ងៃ១រោចដល់ថ្ងៃ១៤រោចខែភទ្របទ ដោយព្រះអង្គឈ្វេងយល់ថា ពិធីនេះមិនអាចធ្វើរយៈពេល៣ខែបានឡើយ ដោយសារប្រជានុរាស្ត្រជាប់រវល់ក្នុងការងារបង្កបង្កើនផល ទើបព្រះអង្គកំណត់ឱ្យធ្វើតែរយៈពេល១៥ថ្ងៃប៉ុណ្ណោះ ។
សម្ដេចពិជ័យសេនា ទៀ បាញ់ មានប្រសាសន៍បន្ថែមថា ក្នុងរបបកម្ពុជាប្រជាធិបតេយ្យ ក្នុងចន្លោះពី១៩៧៥ ដល់ឆ្នាំ១៩៧៩ ពួកគេបានបំបិទសិទ្ធិសេរីភាពរបស់ប្រជាជនគ្រប់បែបយ៉ាង រួមទាំងទាំងខាងជំនឿសាសនា ដោយព្រះសង្ឃត្រូវពួកគេបានចាប់ផ្សឹក វត្តអារាមក៏ក្លាយជាទីឃុំឃាំង កាប់សម្លាប់ ឬជាកន្លែងចិញ្ចឹមសត្វ ប្រជាជនត្រូវបានបង្អត់ អាហារ បង្ខំធ្វើពលកម្មបាក់កម្លាំងស្ទើរគ្មានពេលសម្រាក និងរស់នៅដោយការភ័យព្រួយនឹងការកាប់សម្លាប់គ្រប់ពេលវេលា ប៉ុន្តែដោយសារគុណថ្ងៃរំដោះ៧មករា១៩៧៩ រណសិរ្សសាមគ្គីសង្គ្រោះជាតិកម្ពុជា ក្រោមការដឹកនាំរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសង្គ្រោះប្រទេសជាតិ និងប្រជាជនកម្ពុជាឱ្យរួចផុតពីការបំផ្លិចបំផ្លាញ និងកាប់សម្លាប់នេះ ។
សម្ដេចពិជ័យសេនា ទៀ បាញ់ មានប្រសាសន៍បន្ថែមទៀតថា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ហេដ្ឋារចនាសម្ព័ន្ធរូបវ័ន្តទាំងផ្នែកអាណា ចក្រ និងពុទ្ធចក្រ ត្រូវបានស្តារ និងអភិវឌ្ឍន៍ឡើងវិញយ៉ាងឆាប់រហ័សដែលនឹកស្មានពុំដល់ ពិសេសក្រោមគោលនយោបាយឈ្នះឈ្នះរបស់សម្តេចតេជោ ហ៊ុន សែន បានធ្វើឲ្យប្រទេសជាតិមានសុខសន្តិភាពពេញផ្ទៃប្រទេស ដែលធ្វើឲ្យការធ្វើដំណើររបស់ប្រជាពលរដ្ឋយើងគ្រប់ទីកន្លែងដោយគ្មានការព្រួយបារម្ភ ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ក្នុងទូទាំងប្រទេស រួមសហការសាមគ្គីគ្នាជាមួយរាជរដ្ឋាភិបាលកម្ពុជា ការពារសុខសន្តិភាពនេះ បានគង់វង្សជាយូរអង្វែងតរៀងទៅ ។
គួររំលឹកថា ក្នុងពិធីបុណ្យកាន់បិណ្ឌឆ្នាំ២០១៩នេះ រដ្ឋបាលខេត្តសៀមរាប បានរៀបចំការកាន់បិណ្ឌចំនួន០៧លើក គឺ៖ ១. ថ្ងៃទី១៤ ខែកញ្ញា ឆ្នាំ២០១៩ ជាថ្ងៃបិណ្ឌ១ នៅវត្តព្រះព្រហ្មរ័ត្ន ក្នុងក្រុងសៀមរាប , ២. ថ្ងៃទី១៥ ខែកញ្ញា ឆ្នាំ២០១៩ ជាថ្ងៃបិណ្ឌ២ នៅវត្តរាជបូព៌ ក្នុងក្រុងសៀមរាប , ៣. ថ្ងៃទី១៦ ខែកញ្ញា ឆ្នាំ២០១៩ ជាថ្ងៃបិណ្ឌ៣ នៅវត្ដទេពពោធិវង្ស ក្នុងក្រុងសៀមរាប , ៤. ថ្ងៃទី១៧ ខែកញ្ញា ឆ្នាំ២០១៩ ជាថ្ងៃបិណ្ឌ៤ នៅវត្តកេសរារាម ក្នុងក្រុងសៀមរាប , ៥. ថ្ងៃទី១៨ ខែកញ្ញា ឆ្នាំ២០១៩ ជាថ្ងៃបិណ្ឌ៥នៅវត្តប្រាសាទគោកចក ក្នុងក្រុងសៀមរាប , ៦. ថ្ងៃទី១៩ ខែកញ្ញា ឆ្នាំ២០១៩ ជាថ្ងៃបិណ្ឌ៦ នៅវត្តព្រះឥន្ទកោសីយ៍ ក្នុងក្រុងសៀមរាប និង ៧. ថ្ងៃទី២១ ខែកញ្ញា ឆ្នាំ២០១៩ ជាថ្ងៃបិណ្ឌ៧ នៅវត្តដំណាក់ចន្ទរាម(ហៅវត្តក្រកៀត) ក្នុងឃុំមុខប៉ែន ស្រុកពួក ៕
អត្ថបទ ៖ លោក លីវ សាន្ត
រូបថត ៖ លោក ហាំ ប៉េងហួត និង លោក ទ្រា ពន្លឺ
