នាព្រឹកថ្ងៃទី ១៩ ខែ កញ្ញា ឆ្នាំ ២០១៩ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអនុញ្ញាតឲ្យ លោក ប្រសិត សែន រុងរឿង អគ្គលេខាធិការ សហព័ន្ធប្រព័ន្ធផ្សព្វផ្សាយអាស៊ាន យូម៉ា មកពី ប្រទេសថៃ ចូលជួបសម្ដែងការគួរសម និងថ្លែងអំណរគុណចំពោះឯកឧត្តមរដ្ឋមន្ត្រី ដែលជានិច្ចកាលតែងតែគាំទ្រ និងផ្តល់ជាមតិយោបល់ ល្អៗ ដល់ សហព័ន្ធប្រព័ន្ធផ្សព្វផ្សាយអាស៊ាន យូម៉ា ពិសេសបានជម្រុញដល់កិច្ច សហការគ្នាបានយ៉ាងល្អ រវាងអ្នកសារព័ត៌មាននៃប្រទេសទាំងពីរ កម្ពុជា ថៃ ។
ដោយមើលឃើញពីការខិតខំប្រឹងប្រែង ក្នុងការផ្សព្វផ្សាយ ពីគ្នា ទៅវិញទៅមក ពិសេសសម្រាប់ថ្នាក់ដឹកនាំ និងសមាជិក របស់ យូម៉ា នៅក្នុងប្រទេសថៃ និង នៅកម្ពុជា លោក ប្រសិត សែន រុងរឿង បានធ្វើការពិភាក្សាជាមួយ ឯកឧត្តម រដ្ឋមន្ត្រី ខៀវ កាញារីទ្ធ ក្នុងការរៀបចំជាគ្រឿងឥស្សរិយយស មេដាយការងារ បំពាក់ជូន ជាការលើកទឹកចិត្ត ដល់ក្រុមការងារទាំងអស់គ្នា ហើយគ្រឿងឥស្សរិយយស គឺស្នើសុំឲ្យរាជរដ្ឋាភិបាលកម្ពុជា ជាអ្នកធ្វើជូន ។
ជាការឆ្លើយតប ឯកឧត្តម រដ្ឋមន្ត្រី ខៀវ កាញារីទ្ធ បានឯកភាព ហើយសូមឲ្យភាគី យូម៉ា ប្រទេសថៃ ផ្តល់នូវឈ្មោះ ថ្នាក់ដឹកនាំ និងសមាជិក របស់ សហព័ន្ធប្រព័ន្ធផ្សព្វផ្សាយអាស៊ាន ដើម្បី ឯកឧត្តម ស្នើសុំទៅប្រមុខរាជរដ្ឋាភិបាលកម្ពុជា រៀបចំជូន ជាកិត្តិយស និងជាការលើកទឹកចិត្ត ចំពោះកិច្ចប្រឹងប្រែង របស់អ្នកសារព័ត៌មាន នៃប្រទេសទាំង ពីរ កម្ពុជា-ថៃ ពិសេស សមាជិកសមាជិកា និងថ្នាក់ដឹកនាំ របស់ យូម៉ា ។
ប្រភព៖ ក្រសួងព័ត៌មាន
