ក្រៅពី ប្រព័ន្ធអនុគ្រោះពន្ធរបស់សហគមន៍អ៊ឺរ៉ុប ហៅកាត់ថា EBA កម្ពុជានឹងចូលជាសមាជិកនៃកិច្ចព្រមព្រៀងពាណិជ្ជកម្មពិភពលោកដ៏ធំមួយ របស់ពិភពលោក ដែលនេះជាការបង្ហាញថា កម្ពុជាត្រៀមខ្លួនរួចរាល់ហើយ ទោះបីគ្មាន EBA បើតាមការលើកឡើងរបស់ ឯកឧត្តម ប៊ុន ចន្ធី អនុរដ្ឋលេខាធិការ ក្រសួងពាណិជ្ជកម្ម នាព្រឹកថ្ងៃទី១៩ ខែកញ្ញា ឆ្នាំ២០១៩ នៅខេត្តសៀមរាប ក្នុងសិក្ខាសាលាផ្សព្វផ្សាយស្ដីពី ”កិច្ចសម្របសម្រួលពាណិជ្ជកម្ម និងវឌ្ឍនភាពពាណិជ្ជកម្មរបស់កម្ពុជា ក្នុងក្របខណ្ឌតំបន់ និងអង្គការពាណិជ្ជកម្មពិភពលោក”។
ឯកឧត្តម ប៊ុន ចន្ធី បានបញ្ជាក់ថា នាពេលខាងមុខនេះ កម្ពុជា នឹងក្លាយជាសមាជិកនៃកិច្ចព្រមព្រៀងពាណិជ្ជកម្មពិភពលោកដ៏ធំមួយ ហៅកាត់ថា RCEP ដែលក្នុងនោះសុទ្ធសឹងជាប្រទេសមានសេដ្ឋកិច្ចខ្លាំងក្លា ដូចជា ចិន ជប៉ុន ឥណ្ឌា អូស្ត្រាលី ញូស៍ឡែន និងកូរ៉េខាងត្បូង ហើយប្រទេសទាំង៦នេះ មានប្រជាជនប្រមាណ៣ពាន់៥រយលាននាក់ ស្នើនឹងពាក់កណ្ដាលនៃ ប្រជាជនសរុបរបស់ពិភពលោក។
ឯកឧត្តម ប៊ុន ចន្ធី បានបញ្ជាក់ផងដែរថា ចង់ឬមិនចង់ EBA នឹងបាត់បង់នៅថ្ងៃណាមួយ ដោយចៀសមិនរួច ដោយសារការអភិវឌ្ឍចាកចេញពីប្រទេសមានការអភិវឌ្ឍតិចតួច ឈានទៅរកការអភិវឌ្ឍកម្រិតខ្ពស់ជាបន្តបន្ទាប់ ដែលនេះជាចក្ខុវិស័យរបស់រាជរដ្ឋាភិបាលកម្ពុជា។
តាមការលើកឡើងរបស់ វាគ្មិន មកពីក្រសួងពាណិជ្ជកម្ម ក្នុងសិក្ខាសាលានោះ បានបញ្ជាក់ថា ការលុបចោល EBA ពីកម្ពុជា មិនមែនបានន័យថាកម្ពុជាឈប់ធ្វើពាណិជ្ជកម្ម ជាមួយបណ្ដាប្រទេសនៅសហគមន៍អឺរ៉ុបឡើយ យើងនៅធ្វើពាណិជ្ជកម្មបានដដែល។
សូមជម្រាបថា កម្ពុជាបានចូលជាសមាជិកទី១៤៨ របស់អង្គការពាណិជ្ជកម្មពិភពលោក នៅថ្ងៃទី១៣ ខែតុលាឆ្នាំ ២០០៤ ក្នុងចំណោមប្រទេសជាសមាជិកសរុប ១៦៤ របស់អង្គការពាណិជ្ជកម្មពិភពលោក ក្នុងនោះប្រទេសកម្ពុជា ឈរនៅចំណាត់ថ្នាក់ទី៣ នៃប្រទេសមានការអភិវឌ្ឍតិចតួច ដែលមានកំណើនវិនិយោគខ្ពស់ជាងគេ។
អត្ថបទ និងរូបភាព៖ លោក សេង ផល្លី
