នៅព្រឹកថ្ងៃទី២០ ខែកញ្ញា ឆ្នាំ២០១៩ ជាថ្ងៃទី២ និងបិទបញ្ចប់ សិក្ខាសាលាផ្សព្វផ្សាយស្ដីពី ”កិច្ចសម្របសម្រួលពាណិជ្ជកម្ម និងវឌ្ឍនភាពពាណិជ្ជកម្មរបស់កម្ពុជា ក្នុងក្របខណ្ឌតំបន់ និងអង្គការពាណិជ្ជកម្មពិភពលោក” ដើម្បីបង្ហាញពីការរីកចម្រើន នៃការធ្វើពាណិជ្ជកម្មរវាងកម្ពុជា និងអន្តរជាតិ នៅក្នុងទីផ្សារពិភពលោក ដែលមានអ្នកវិនិយោគ បុគ្គលិកឯកជន មន្ត្រីរាជការ និងសិស្សនិស្សិត ក្នុងខេត្តសៀមរាបចូលរួមជិត១០០នាក់។
សិក្ខាសាលាផ្សព្វផ្សាយនេះ ត្រូវបានអញ្ជើញជាអធិបតីបើក ដោយ ឯកឧត្តម ប៊ុន ចន្ធី អនុរដ្ឋលេខាធិការ ក្រសួងពាណិជ្ជកម្ម និង លោក នាក់ ណេរ៉ុន អភិបាលរងខេត្តសៀមរាប នៅថ្ងៃទី១៩ ខែកញ្ញា ឆ្នាំ២០១៩។
តាមរយៈបទបង្ហាញរបស់វាគ្មិនជំនាញ មកពីក្រសួងពាណិជ្ជកម្ម បានបង្ហាញថា កម្ពុជាបានចូលជាសមាជិករបស់ អង្គការពាណិជ្ជកម្មពិភពលោក ហៅកាត់ថា WTO តាំងពីឆ្នាំ២០០៤មកម្ល៉េះ។ នៅឆ្នាំ២០១៧ កម្ពុជា បានស្រូបយកការវិនិយោគផ្ទាល់ពីបរទេស ដល់កម្រិតខ្ពស់បំផុត ២.៨ប៊ីលានដុល្លារអាមេរិច លើវិស័យហិរញ្ញវត្ថុ អចលនទ្រព្យ ទូរគមនាគមន៍ និងទំនិញកម្មន្តសាល មិនមែនវាយនភណ្ឌ (NON-TEXTILE MANUFACTURING) ដែលវាបានធ្វើឲ្យកម្ពុជា ក្លាយទៅជា ប្រទេសអភិវឌ្ឍតិចតួច មានសេដ្ឋកិច្ចកំពូលទាំង៥ ក្នុងចំណោម ប្រទេសអភិវឌ្ឍតិចតួចទាំង៣៦ ដែលជាសមាជិក WTO នេះបើយោងតាម សន្និសីទសហប្រជាជាតិស្ដីពីពាណិជ្ជកម្ម និងអភិវឌ្ឍន៍ ហៅកាត់ថាUNCTAD។
ក្នុងបទបង្ហាញនោះ បានបញ្ជាក់ផងដែរថា ប្រទេសកំពូលទាំង១០ ដែលកម្ពុជា ធ្វើការនាំចេញទៅបរទេសនៅឆ្នាំ២០១៦ រួមមាន សហរដ្ឋអាមេរិច អង់គ្លេស អាឡឺម៉ង់ ជប៉ុន កាណាដា ចិន ថៃ អេស្ប៉ាញ បែលហ្សិក បារាំង ស្នើនឹងទំហំទឹកប្រាក់ ប្រមាណជិត ៧ពាន់ ៧រយលាន ដុល្លារអាមេរិច។
សូមបញ្ជាក់ថា កម្ពុជា បានចូលជាសមាជិកទី១៤៨ នៃសមាជិកសរុប១៦៤ប្រទេស និងតំបន់ នៃអង្គការពាណិជ្ជកម្មពិភពលោក (WTO)។ បន្ទាប់មក នៅថ្ងៃទី១២ ខែកុម្ភៈ ឆ្នាំ២០១៦ ប្រទសកម្ពុជា បានផ្ដល់សច្ចាប័នលើកិច្ច លើកិច្ចព្រមព្រៀងស្ដីពី កិច្ចសម្រួលពាណិជ្ជកម្ម ដែលវាបានជួយដល់ ប្រទេសកំពុងអភិវឌ្ឍន៍ និង អភិវឌ្ឍតិចតួច មានសិទ្ធ បត់បែន ក្នុងការអនុវត្តកិច្ចព្រមព្រៀង នាំឲ្យទទួលបានអត្ថប្រយោជន៍ដូចជា៖
• កាត់បន្ថយថ្ងៃដើម្បនៃការធ្វើពាណិជ្ជកម្មពិភពលោក ជាមធ្យម ១៤.៣% និងបង្កើនទំហំពាណិជ្ជកិម្មពិភពលោករហូតដល់ ១ ទ្រីលាន $US, កើនឡើងការចូលរ៉ូមក្នុងខ្សែសង្វាក់តម្លៃពិភពលោក ពិពិធកម្មនាំចេញ
• បង្កើនការចូលរួមរបស់ SME ក្នុងពាណិជ្ជកម្មអន្តរជាតិ
• បង្កើនការហូរចូលនៃវិនិយោគ
• បង្កើនចំណូលរដ្ឋាភិបាល និងកាត់បន្ថយអំពើពុករលួយ។
អត្ថបទ និងរូបភាព៖ លោក សេង ផល្លី
