ប្រធានក្រុមការងារថ្នាក់ជាតិចុះមូលដ្ឋានស្រុកក្រឡាញ់ រួមនិងរដ្ឋបាលស្រុកក្រឡាញ់ ខេត្តសៀមរាប បានបង្កើតកម្មវិធីប្រឡងប្រណាំងសួនបន្លែនៅតាមគេហដ្ឋាន ដើម្បីបណ្តុះគំនិតធ្វើកសិកម្ម ចិញ្ចឹមសត្វ និងដាំដំណាំរួមផ្សំ ដល់យុវជន ចៀសវាងការចំណាកស្រុកទៅក្រៅប្រទេស និងចូលរួមបង្កើនសុវត្ថិភាពស្បៀង និងចំណីអាហារក្នុងមូលដ្ឋាន ដែលស្របទៅនឹងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា។
តាមការឲ្យដឹងពី លោកស្រី ម៉ននី រង្សី អភិបាលស្រុកក្រឡាញ់ ការប្រឡងប្រណាំងសួនបន្លែយុវជននេះ គឺជាគំនិតផ្តួចផ្តើមរបស់ ឯកឧត្ដម ជា ច័ន្ទបរិបូណ៌ រដ្ឋលេខាធិការក្រសួងព័ត៌មាន និងជាប្រធានក្រុមការងារថ្នាក់ជាតិចុះមូលដ្ឋានស្រុកក្រឡាញ់ ដែលការប្រឡងប្រណាំងនេះ ក៏ជាគំរូដ៏ល្អ សម្រាប់យកទៅអនុវត្ត នៅមូលដ្ឋានដទៃ ដើម្បីលើកកម្ពស់ជីវភាព បង្កើនភាពស្រស់បំព្រងនៃបរិស្ថាន បង្កើនស្នាមញញឹម ជាពិសេសកាត់បន្ថយការចំណាយក្នុងគ្រួសារផងដែរ។
ក្នុងនោះ សមាសភាពគណៈកម្មការ វាយតម្លៃសួនបន្លែក្នុងស្រុកក្រឡាញ់នេះ មានលោកស្រី ម៉ននី រង្សី អភិបាលស្រុកក្រឡាញ់ ជាប្រធាន លោក សុខ ណារ៉េត អភិបាលរងស្រុក ជាអនុប្រធាន រួមនិងសមាជិក៣រូបបន្ថែមទៀត ដើម្បីចុះវាយតម្លៃ និងដាក់ពិន្ទុឱ្យស្របតាមលក្ខន្តិកៈ នៅតាមខ្នងផ្ទះ ក្នុងឃុំគោលដៅ ស្រុកក្រឡាញ់។ យុវជន ដែលបានចុះឈ្មោះ ចូលរួមក្នុងការប្រឡងប្រណាំងនេះ មានចំនួន១៧នាក់ ក្នុងនោះស្រី ៧នាក់ មកពីឃុំចំនួន ៨ ក្នុងចំណោម១០ឃុំ នៃស្រុកក្រឡាញ់ យុវជនមួយរូបដែលឈ្នះក្នុងការប្រកួតនេះ នឹងទទួលបាន ទូរសព្ទ អូប៉ូ ស៊េរីទំនើបមួយគ្រឿង ដែលជាការឧបត្ថម្ភរបស់ ឯកឧត្ដម ជា ច័ន្ទបរិបូណ៌។
សូមជម្រាបថា ការវាយតម្លៃការប្រឡងប្រណាំងសួនបន្លែយុវជននេះ មានចំនួន២ លើក ដោយ៖
លើកទី១ ចាប់ពីថ្ងៃទី១៩-២២ ខែកញ្ញា ឆ្នាំ២០១៩ វាយតម្លៃទៅលើការរៀបចំសួន និងថែទាំ
លើកទី២ នឹងធ្វើឡើងនៅពាក់កណ្តាលខែតុលា ឆ្នាំ២០១៩ ជាការវាយតម្លៃផ្តាច់ព្រ័ត្រ ទៅលើសោភណ្ឌភាព និងផលដំណាំ។
អត្ថបទ និងរូបភាព៖ ស្រុកក្រឡាញ់
កែសម្រួលដោយ៖ សេង ផល្លី
