នៅព្រឹកថ្ងៃទី២០ ខែកញ្ញា ឆ្នាំ២០១៩ នៅរដ្ឋបាលខេត្តសៀមរាប មានរៀបចំពិធីជួបសំណេះសំណាល និងផ្ដល់រង្វាន់លើកទឹកចិត្ត ដល់សិស្សទទួលបាននិទ្ទេសល្អ A និង B ក្នុងការប្រឡងមធ្យមសិក្សាទុតិយភូមិ ឆ្នាំសិក្សា ២០១៨-២០១៩ ក្នុងខេត្តសៀមរាប សរុប២២៨រូប។
រង្វាន់លើកទឹកចិត្ត សម្រាប់សិស្សនិទ្ទេស A សរុប ៣៨នាក់ ក្នុងនោះស្រី ១៥នាក់ ទទួលបាន ម៉ូតូហុងដាវ៉េវ ម្នាក់មួយគ្រឿង មួកសុវត្ថិភាព ប្រេងសាំង៣០លីត្រ ថវិកា២០ម៉ឺនរៀល និងលិខិតសរសើរមួយសន្លឺក។
ដោយឡែក សិស្សនិទ្ទេសB សរុប ១៩០នាក់ ក្នុងនោះស្រី ១០៥នាក់ ទទួលបានថវិកា ឧបត្ថម្ភលើកទឹកចិត្តក្នុងម្នាក់ៗ ថវិកា ចំនួន ២០០ដុល្លារ និងលិខិតសរសើរមួយសន្លឺក។
ម៉ូតូ និងថវិកាទាំងអស់នេះ គឺជាការឧបត្ថម្ភ របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងារថ្នាក់ជាតិ ចុះជួយខេត្តសៀមរាប រួមទាំងបងប្អូន សប្បុរសជនក្នុងខេត្តសៀមរាប ។
អញ្ជើញជាអធិបតីភាព តំណាងសម្តេចពិជ័យសេនា ទៀ បាញ់ ក្នុងឱកាសនោះ ឯកឧត្តមសន្តិបណ្ឌិត អ៊ុក គឹមលេខ រដ្ឋលេខាធិការក្រសួងមហាផ្ទៃ និងជាអនុប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប បានមានប្រសាសន៍ថា លទ្ធផលដែលទទួលបាននៅពេលនេះ ដោយសារមានកត្តា ២សំខាន់មិនអាចខ្វះបាន គឺ៖ទី១-ការខិតខំប្រឹងប្រែងរៀនសូត្រផ្ទាល់របស់សិស្ស ការខិតខំបង្រៀន លោកគ្រូ អ្នកគ្រូ និងលើកទឹកចិត្តពីអាណាព្យាបាល ទី២-ដោយសារការខិតខំរបស់រាជរដ្ឋាភិបាល ដែលបានស្វែងរក និងការពារសុខសន្តិភាព សណ្តាប់ធ្នាប់សង្គម ស្ថេរភាពនយោបាយ និងការកសាងនូវប្រព័ន្ធហេដ្ឋារចនាសម្ព័ន្ធ សាលារៀន និងគ្រូបង្រៀន។
មានប្រសាសន៍ក្នុងឱកាសនោះដែរ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បញ្ជាក់ថា កុមារ យុវជន និងមនុស្សពេញវ័យ ត្រូវទទួលបានការសិក្សា និងការអប់រំពេញមួយជីវិត ដើម្បីឆ្លើយតបទៅនឹងតម្រូវការទីផ្សារការងារ ប្រកបដោយគុណភាពខ្ពស់ ក្នុងការរួមចំណែកដល់ការអភិវឌ្ឍជាតិ។
សូមរំលឹកថា ក្នុងប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៨-២០១៩នេះ ខេត្តសៀមរាប មានសិស្សប្រឡងនិទ្ទេស A ច្រើនជាងគេលំដាប់ទី២ បន្ទាប់ពីរាជធានីភ្នំពេញ។
សូមជម្រាបដែរថា បន្ទាប់ពីជំនួបសំណេះសំណាល ថ្នាក់ខេត្ត ជាមួយ មន្ត្រីជាន់ខ្ពស់រាជរដ្ឋាភិបាល ឯកឧត្តម ប្រធានក្រុមប្រឹក្សាខេត្ត អភិបាលនៃគណៈអភិបាលខេត្ត រួមនិងថ្នាក់ដឹកនាំអង្គភាពមន្ទីរនាពេលនេះ សម្ដេចតេជោ នាយករដ្ឋមន្ត្រីកម្ពុជា ក៏នឹងផ្ដល់កិត្តិយស ដល់សិស្សនិទ្ទេសA ទូទាំងប្រទេស ចូលជួបសំណេះសំណាលផងដែរ។
អត្ថបទ និងរូបភាព៖ លោក យូ វង្ស
កែសម្រួលអត្ថបទ៖ លោក សេង ផល្លី
