នាព្រឹកថ្ងៃទី២០ ខែកញ្ញា ឆ្នាំ២០១៩នេះ លោក ព្រៅ ខេមរិន្ទ ប្រធានសាខាកាំកុងត្រូលខេត្តសៀមរាប បានដឹកនាំក្រុមមន្ត្រីជំនាញ ចុះត្រួតពិនិត្យសុវត្ថិភាពចំណីអាហារនៅតាមបណ្តាទីតាំងផ្សារទំនើបនានាក្នុងក្រុងសៀមរាប ដើម្បីធានាដល់សុខុមាលភាពប្រជាពលរដ្ឋ រួមទាំងភ្ញៀវទេសចរ និងភ្ញៀវបំពេញធុរកិច្ចផ្សេងៗ នៅក្នុងខេត្តប្រវត្តិសាស្ត្រមួយនេះ។
លោក ព្រៅ ខេមរិន្ទ បានលើកឡើងថា ការចុះត្រួតពិនិត្យសុវត្ថិភាពចំណីអាហារ និង ផលិតផលប្រើប្រាស់មួយចំនួន នៅតាមទីផ្សារនានា នៅពេលនេះ គឺជាប្រតិបត្តិការរបស់ភ្នាក់ងារសមត្ថកិច្ចសាខាកាំកុងត្រូល ក្រោមកិច្ចសហការជាមួយមន្ត្រីជំនាញមកពីមន្ទីរពាណិជ្ចកម្ម ហើយវាក៏ជាការយកចិត្តទុកដាក់ នៅពេលមុន និងក្នុងពេលដែលមានព្រឹត្តិការណ៍បុណ្យប្រពៃណីផ្សេងៗ ដែលទាក់ទងទៅនឹងតម្រូវការម្ហូបអាហារជាចាំបាច់នោះផងដែរ។
លោក ឈឹម រ៉ាណូ អ្នកគ្រប់គ្រងផ្សារទំនើបមួយកន្លែងនៅក្នុងក្រុងសៀមរាប បង្ហាញថា ៖ លោកពេញចិត្តចំពោះវត្តមានប្រតិបត្តិការរបស់មន្ត្រីជំនាញសាខាកាំកុងត្រូលខេត្តសៀមរាប ចុះមកដល់ទីតាំងផ្សាររបស់ ដែលវាបានជំរុញ អតិថិជនកាន់តែមានទំនុកចិត្តបន្ថែមទៀតមកលើអាជីវកម្មរបស់លោក។
បើទោះជាបេសកកម្មរបស់ក្រុមការងារកាំកុងត្រូលខេត្តសៀមរាប ចុះត្រួតពិនិត្យសុវត្ថិភាពចំណីអាហារនិងផលិតផលប្រើប្រាស់ផ្សេងៗ ដោយពុំកំណត់ពេលវេលា យ៉ាងណាក៏ដោយ ក៏ទោះបី ក្រុមការងារកាំកុងត្រូលខេត្តសៀមរាប វាយតម្លៃថា បណ្ដាផ្សារនានា ក្នុងក្រុង និងស្រុក នៃខេត្តសៀមរាប មានភាពល្អប្រសើរ យ៉ាងណាក៏ដោយ ក៏ក្រុមការងារជំនាញ នៅតែបន្តចុះត្រួតពិនិត្យសុវត្ថិភាពចំណីអាហារនិងផលិតផលប្រើប្រាស់ផ្សេងៗ ដោយពុំកំណត់ពេលវេលាបញ្ចប់បេសកកម្មឡើយ។
អត្ថបទ និងរូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
