ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី២០ ខែកញ្ញា ឆ្នាំ២០១៩ថា ចិន បានទទូចដល់ភាគីសហរដ្ឋអាមេរិក ឱ្យគោរពអធិបតេយ្យភាពរបស់ចិន និងបញ្ឈប់ការជ្រៀតជ្រែកចូលក្នុង កិច្ចការក្រុងហុងកុងជាបន្ទាន់ ។
លោក Geng Shuang អ្នកនាំពាក្យក្រសួងការបរទេស បានធ្វើការកត់សម្គាល់នៅក្នុង ការឆ្លើយតបទៅនឹងរបាយការណ៍ដែលថា អ្នកតំណាងរាស្ត្រអាមេរិកលោកស្រី Nancy Pelosi បានធ្វើសន្និសិទកាសែតកាលពីថ្ងៃពុធ ជាមួយសមាជិកសភាក៏ដូចជាលោក Joshua Wong Chi-fung និងលោក Denise Ho ដើម្បីគាំទ្រអ្វីដែលហៅថា សិទ្ធិមនុស្សនៅក្រុងហុងកុង និងច្បាប់ប្រជាធិបតេយ្យឆ្នាំ២០១៩ ។
លោក Geng បានថ្លែងនៅក្នុងសន្និសីទសារព័ត៌មានមួយ ដោយចោទប្រកាន់លោកស្រី Pelosi និងអ្នកនយោបាយអាមេរិកដទៃទៀតថា បានបំពានសិទ្ធិក្នុងការចូលរួមជាមួយក្រុមបំបែកខ្លួនហុងកុង និងការជ្រៀតជ្រែកយ៉ាងខ្លាំង នៅក្នុងកិច្ចការផ្ទៃក្នុងរបស់ប្រទេសចិន ។
លោក Geng បានបញ្ជាក់ជំហរថា កិច្ចការក្រុងហុងកុង ជាកិច្ចការផ្ទៃក្នុងរបស់ចិនសុទ្ធ ហើយមិនមានការជ្រៀតជ្រែក ពីកម្លាំងខាងក្រៅណាមួយឡើយ ៕
ប្រែសម្រួលដោយ៖ ម៉ៅ បុប្ផាមករា
