ម្ចាស់តៀមកាហេ្វ បង្កប់អាជីវកម្មបញ្ចាំខុសច្បាប់មួយកន្លែង ស្ថិតនៅក្នុងភូមិចុងស្រុក សង្កាត់សៀមរាប ក្រុងសៀមរាប ខេត្តសៀមរាប ត្រូវបានសមត្ថកិច្ចនគរបាលខេត្តសៀមរាប ធ្វើការបង្ក្រាប និងរឹបអូសបានម៉ូតូប្រមាណ ៦០គ្រឿង នៅរសៀលថ្ងៃទី១៩ ខែកញ្ញា ឆ្នាំ២០១៩។
តាមការសាកសួររបស់សមត្ថកិច្ច ជនសង្ស័យ ជាម្ចាស់អាជីកម្ម បានឆ្លើយថា ម៉ូតូទាំងនោះ ជារបស់អ្នកភូមិផងរបងជាមួយ យកមកបញ្ចាំ។ ប៉ុន្តែតាមការពិនិត្យរបស់សមត្ថកិច្ចជំនាញ ក្នុងចំណោមម៉ូតូ ៦០គ្រឿង មានចំនួន ២០គ្រឿង មិនប្រក្រតី ដូចជា ម៉ូតូមិនមានឯកសារច្បាស់លាស់ ម៉ូតូកាច់ក ម៉ូតូមានស្នាមឈូស និងដាប់លើលេខតួលេខម៉ាស៊ីន ជាដើម។
ដូច្នេះ សមត្ថកិច្ចនគរបាលក្រុងសៀមរាប បានជូនដំណឹងទៅអាជ្ញាធរមូលដ្ឋាន ដើម្បីអនុញ្ញាតឲ្យម្ចាស់ម៉ូតូ ដែលបានយកមកបញ្ចាំ ជាមួយជនសង្ស័យ យកឯកសារពាក់ព័ន្ធ មកផ្ទៀងផ្ទាត់ និងទទួលយកម៉ូតូត្រឡប់ទៅវិញ។ ដោយឡែកប្រសិនបើ មានម៉ូតូដែលនៅសល់ពាក់ព័ន្ធនឹងបទល្មើសផ្សេងៗ សមត្ថកិច្ចនិងចាត់ការនីតិវិធីបន្តទៅលើជនសង្ស័យ។
ព័ត៌មានជាតិ ថ្មីៗ
អត្ថបទ និងរូបភាព: លោកជា ស្រស់, ខេង ឧត្តម
