ក្រុមអ្នកជំនាញខាងគ្រប់គ្រងទឹកនៅអាស៊ី-អ៊ឺរ៉ុប បានបើកកិច្ចសន្ទនាអាស៊ី-អឺរ៉ុប លើកពី៨ ស្តីពីការអភិវឌ្ឍប្រកបដោយចីរភាព ដែលបានប្រព្រឹត្តទៅនៅក្នុងក្រុងសៀមរាបរយៈពេល០២ថ្ងៃ គឺថ្ងៃទី១៩-២០ ខែកញ្ញា ឆ្នាំ២០១៩ ដើម្បីជួបពិភាក្សាគ្នាលើការគ្រប់គ្រងធនធានទឹកប្រកបដោយប្រសិទ្ធភាព ក្នុងបរិបទឆ្លងដែនតំបន់ និងអន្តរជាតិ សម្រាប់ការអភិវឌ្ឍប្រកបដោយចីរភាពនិងភាពចម្រុងចម្រើនរួមគ្នា គឺជាការទទួលខុសត្រូវនិងសកម្ម ភាពរួមគ្នារបស់យើងទាំងអស់គ្នា ក្រោមអធិបតីភាព ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា ។
មានប្រសាសន៍បើកកិច្ចប្រជុំនាព្រឹកថ្ងៃទី១៩ ខែកញ្ញា ឆ្នាំ២០១៩នេះ ឯកឧត្តម លឹម គានហោ បានបញ្ជាក់ថា ក្នុងនាមជរដ្ឋាភិបាលកម្ពុជា ឯកឧត្តមបានប្តេជ្ញាចិត្តយ៉ាងមុតមាំថាកម្ពុជា និងជម្រុញកិច្ចសហប្រតិបត្តិការតំបន់ និងអន្តរជាតិ និងភាពជាដៃគូសម្រាប់ការគ្រប់គ្រង និងការអភិវឌ្ឍប្រកបដោយចីរភាព ខណៈកិច្ចសន្ទនាផ្នែកនយោបាយកម្រិតខ្ពស់ជាទៀងទាត់ គឺជាវេទិការមានសារៈ សំខាន់ខ្លាំងណាស់ ដើម្បីពិភាក្សាបញ្ហាប្រឈមរួម និងរិះរកវិធី ដើម្បីរួមគ្នាដោះស្រាយ និងដើម្បីពង្រឹងកិច្ចសហប្រតិបត្តិការភាពជាដៃគូ និងកិច្ចខិតខំប្រឹងប្រែងរួមគ្នា តាមរយៈការរៀបចំផែនការរួមគ្នា និងការអនុវត្តសកម្មភាព អាទិភាពជាយុទ្ធសាស្ត្រដែលបានកំណត់សម្រាប់ការអភិវឌ្ឍ និងការគ្រប់គ្រងទឹក។
ឯកឧត្តម លឹម គានហោ មានប្រសាសន៍បន្ថែមថា ក្នុងកិច្ចសន្ទនា រយៈពេល២ថ្ងៃនេះ នឹងមានប្រធានបទមួយចំនួន លើកយកមកពិភាក្សា ហើយនិងផ្ដល់ឱកាសដល់ អ្នកជំនាញទាំងអស់ បានចែក រំលែក និងផ្លាស់ប្តូរ បទពិសោធន៍ចំណេះធ្វើ និងការអនុវត្តល្អៗ ក្នុងក្របខណ្ឌកិច្ចប្រជុំអាស៊ី-អឺរ៉ុប តាមរយៈការពង្រឹង និងការលើកកម្ពស់កិច្ចសហប្រតិបត្តិការរវាងតំបន់ និងតំបន់ ភាពជាដៃគូពហុភាគី និងការតភ្ជាប់កាន់តែប្រសើរសម្រាប់ការគ្រប់គ្រងទឹកឆ្លង ដែនឱ្យបានកាន់តែមានប្រសិទ្ធភាព ដើម្បីសម្រេចបាននូវការអភិវឌ្ឍប្រកបដោយចីរភាព និងរីកចម្រើនរួមគ្នា រវាងតំបន់អាស៊ី និងអឺរ៉ុប និងតំបន់ផ្សេងទៀត។
សូមបញ្ជាក់ថា ពាក់ព័ន្ធនឹងបញ្ហានេះកាលពីឆ្នាំ២០១៨កម្ពុជាបានទទួលធ្វើជាម្ចាស់ផ្ទះប្រកប ដោយជោគជ័យ សម្រាប់កិច្ចប្រជុំកំពូលគណៈកម្មការទន្លេមេគង្គលើកទី៣ដែលពេលនោះ នាយករដ្ឋមន្ត្រីនៃប្រទេសជាសមាជិកទាំង៤និងតំណាងជាន់ខ្ពស់នៃដៃគូមេគង្គ បានពិភាក្សានិងដាក់ចេញនូវសកម្មភាពដែលយុទ្ធសាស្ត្រចំពោះមុខដើម្បីលើកកម្ពស់កិច្ចខិតខំប្រឹងប្រែងរួមនិងភាពជាដៃគូឆ្ពោះទៅសម្រេចឱ្យបាននូវគោលបំណងអភិវឌ្ឍប្រកបដោយចីរភាព ក្នុង អាងទន្លេមេគង្គ ហើយសម្រាប់ឆ្នាំ២០២០ខាងមុខ កម្ពុជាមានកិត្តិយសដ៏ធំធេងនឹងទទួលធ្វើជាម្ចាស់ផ្ទះនៃព្រឹត្តិការណ៍ជាប្រវត្តិ សាស្ត្រដ៏សំខាន់មួយទៀតនោះ គឺកិច្ចប្រជុំកំពូលអាស៊ី-អឺរ៉ុបលើកទី ១៣ ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
