លោក នាក់ ណេរ៉ុន អភិបាលរងខេត្ត និងជាប្រធានមណ្ឌលប្រឡងខេត្តសៀមរាប បានមានប្រសាសន៍ថា ការប្រឡងជ្រើសរើសសិស្ស និស្សិតឱ្យចូលបម្រើការងារក្នុងក្របខ័ណ្ឌមន្ត្រីរាជការស៊ីវិលក្រសួងមហាផ្ទៃ ក្នុងឆ្នាំ២០១៩នេះ នឹងប្រព្រឹត្តទៅនាថ្ងៃទី២២ ខែកញ្ញា ឆ្នាំ២០១៩ នៅវិទ្យាល័យអង្គរ ដែលមានបេក្ខជនសរុបចំនួន ៦២៨ នាក់ ក្នុងស្រីចំនួន ២៨៥នាក់ ស្មើនឹង២៦បន្ទប់ ដោយមានខេត្តចំនួន៣ចូលរួម គឺខេត្តសៀមរាប , កំពង់ធំ និង ខេត្តឧត្តរមានជ័យ ហើយសម្រាប់ខេត្តសៀមរាប មានបេក្ខជនដាក់ពាក្យប្រឡងសរុបចំនួន៣៨៧នាក់ ក្នុងនោះស្រីចំនួន ១៨៥នាក់ ខណៈក្របខ័ណ្ឌដែលត្រូវជ្រើសរើសមានចំនួន០៥កន្លែង រួមមាន ៖ ខ័ណ្ឌមន្ត្រីរដ្ឋបាលជាន់ខ្ពស់ចំនួន០២កន្លែង , ក្របខ័ណ្ឌមន្ត្រីក្រមការចំនួន០២កន្លែង និង ក្របខ័ណ្ឌលេខាធិការរដ្ឋបាលចំនួន០១កន្លែង ។
លោក នាក់ ណេរ៉ុន បានមានប្រសាសន៍យ៉ាងដូច្នេះក្នុងឱកាសដឹក នាំកិច្ចប្រជុំពិនិត្យ និងពិភាក្សាលើការងារប្រឡងជ្រើសរើសសិស្ស និស្សិតឱ្យចូលបម្រើការងារក្នុងក្របខ័ណ្ឌមន្ត្រីរាជការស៊ីវិលក្រសួងមហាផ្ទៃសម្រាប់ឆ្នាំ២០១៩ នៅសាលាខេត្តសៀមរាប កាលពីរសៀលថ្ងៃទី១៨ ខែកញ្ញា ឆ្នាំ២០១៩ ដោយមានការចូលរួមពីតំណាងមន្ទីរមុខងារសាធារណៈខេត្ត មន្ទីរអប់រំ យុវជន និងកីឡាខេត្ត និងលោក លោកស្រី ដែលជាអគារអនុរក្ស និងអនុរក្ស ។
ក្នុងឱកាសនោះដែរលោក នាក់ ណេរ៉ុន បានណែនាំដល់មន្ត្រីអនុរក្សទាំងអស់ ត្រូវបង្ហាញឱ្យឃើញថាមានភាពអព្យាក្រឹត្យ ម៉ឺងម៉ាត់ និងភាពថ្លៃថ្នូ ហើយមិនត្រូវមានសកម្មភាពរំខានដល់បេក្ខជនក្នុងពេលប្រឡងដោយនិយាយ ឬប្រើទូរស័ព្ទក្នុងបន្ទប់ប្រឡង ជជែកពិភាក្សាគ្នាក្នុងបន្ទប់ប្រឡង ឈរមើល ឬផ្តល់ចម្លើយដល់នរណាម្នាក់ ព្រមទាំងមិនត្រូវអនុញ្ញាតឲ្យមន្ត្រី ឬជនណាម្នាក់ដែលគ្មានភារកិច្ចក្នុងបន្ទប់ប្រឡងជាដាច់ខាត ជាពិសេសមន្ត្រីជាអនុរក្សត្រូវជៀសវាងដាច់ខាតចំពោះការពន្យល់ប្រធានវិញ្ញាសារ ឬបង្ហើបចម្លើយដល់បេក្ខជន ហើយនៅពេលបេក្ខជនធ្វើកិច្ចការ អនុរក្សត្រូវមានម្នាក់នៅខាមុខ និងម្នាក់នៅខាងក្រោយ ដើម្បីមានភាពងាយស្រួលក្នុងការសង្កេតដល់បេក្ខជន ។
លោក សន សេរីវុទ្ធី នាយកទីចាត់ការគ្រប់គ្រងធនធានមនុស្សក្នុងឆ្នាំ២០១៩នេះ បានបញ្ជាក់ថា ខេត្តសៀមរាប មានបេក្ខជនដាក់ពាក្យចូលរួមប្រឡងប្រជែងសរុបចំនួន៣៨៧នាក់ ក្នុងនោះស្រីចំនួន ១៨៥នាក់ រួមមាន ៖
១-ក្របខ័ណ្ឌមន្ត្រីរដ្ឋបាលជាន់ខ្ពស់ចំនួន ៧០នាក់ ក្នុងនោះស្រីចំនួន ២៣នាក់ ។
២-ក្របខ័ណ្ឌមន្ត្រីក្របការចំនួន ៨៩នាក់ ក្នុងនោះស្រីចំនួន ៤១នាក់ ។
៣-ក្របខ័ណ្ឌលេខាធិការរដ្ឋបាលចំនួន ៧៦នាក់ ក្នុងនោះស្រីចំនួន ៥៣នាក់ ។
៤-ក្របខ័ណ្ឌលេខាធិការរដ្ឋបាល(ស្មៀនឃុំ)ចំនួន ១៤៣នាក់ ក្នុងនោះស្រីចំនួន ៦៨នាក់ ក្នុងនោះ ៖
ក-សាលាឃុំចាន់ស ស្រុកសូទ្រនិគម ចំនួន ៨៩នាក់ ក្នុងនោះស្រីចំនួន ៣៦នាក់ ។
ខ-សាលាឃុំសំបួរ ស្រុកក្រឡាញ់ ចំនួន ៥៤នាក់ក្នុងនោះស្រីចំនួន ២៥នាក់ ៕
អត្ថបទ និង រូបថត ៖ រដ្ឋបាលខេត្តសៀមរាប
កែសម្រួលអត្ថបទ ៖ លោក លីវ សាន្ត
