មន្ត្រីនៃអាជ្ញាធរជាតិអប្សរា បានឲ្យដឹងថា ស្រះស្រង់ជាផ្នែកមួយដ៏សំខាន់នៃរមណីយដ្ឋានអង្គរ និងមានសំណង់ប្រាសាទនៅកណ្ដាលជាតំណាងឱ្យភ្នំព្រះសុមេរុ ខណៈបច្ចុប្បន្នប្រាសាទនេះ បានរងការបាក់បែកដោយសារកត្តាធម្មជាតិ ហើយដើម្បីលើកតម្លៃប្រវត្តិសាស្រ និងទេសភាពវប្បធ៌មនៃស្រះស្រង់ឡើងវិញ អាជ្ញាធរជាតិអប្សរាគ្រោងនឹងជួសជុលប្រាសាទកណ្ដាលស្រះស្រង់នាពេលឆាប់ៗខាងមុខនេះ ហើយការជួសជុលនេះ មានការចូលរួមពីវិស័យឯកជន ដោយមានការបរិច្ចាគថវិកាទាំងស្រុងពីលោកជំទាវឧកញ៉ាបណ្ឌិត សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ តាមរយៈព្រះតេជគុណ ព្រះសទ្ធម្មប្បាកាសនីបណ្ឌិត តាត មហាទី ចៅអធិកាវត្តព្រះឥន្ទកោសា ។
មន្ត្រីបានឲ្យដឹងបន្ថែមថា តាមរយៈស្មារតីរួមចំណែកនាពេលនេះ គេសង្កេតឃើញថាវិស័យឯកជនបាននិងកំពុងតែចូលរួមយ៉ាងសកម្ម លើផ្នែកបេតិកភណ្ឌវប្បធម៌ជាតិ ដូច្នេះនេះជាលើកទី២ហើយ ដែលលោកជំទាវឧកញ៉ាបណ្ឌិត សៀង ចាន់ហេង បានចូលរួមជាមួយអាជ្ញាធរជាតិអប្សរាលើកិច្ចការបេតិកភណ្ឌនេះ ដែលលើកទីមួយ គឺលោកជំទាវបានរ៉ាប់រងជួសជុលរហាត់ទឹកបុរាណមួយក្នុងរមណីយដ្ឋានអង្គរ ដែលបច្ចុប្បន្នកំពុងដំណើរការជួសជុល។
គួរបញ្ជាក់ថា ប្រាសាទកណ្ដាលស្រះស្រង់ដែលស្ថិតនៅមុខខាងកើតប្រាសាទបន្ទាយក្ដី កសាងឡើងក្នុងរាជ្យព្រះបាទជ័យវរ្ម័នទី៧ នាស.វទី១២៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
