ឯកឧត្តមឧត្តមសេនីយ៍ឯក ញ៉ែម សារិទ្ធ លេខាធិការងនៃអាជ្ញាធរជាតិអាវុធគីមី មានប្រសាសន៍ថា សភាពការបច្ចុប្បន្ននេះ គឺមានការប្រណាំងប្រជែងសព្វាវុធ ជាពិសេសអាវុធប្រល័យលោកនៅឧបទ្វីបកូរ៉េ កូរ៉េខាងជើង បានបង្កើននូវសមត្ថភាពអាវុធ នុយ ក្លេអ៊ែរ ដោយធ្វើការសាកល្បងបានជោគជ័យនូវប្រភេទម៉ីស៊ីលរយៈចម្ងាយមធ្យម និងឆ្ងាយ ដែលអាចនាំក្បាលនុយក្លេអ៊ែរចំនូវគោល ដៅកំណត់ ដែលបញ្ហានេះអាជ្ញាធរជាតិអាវុធគីមី បានកំពុងរួមគ្នាជាមួយអង្គការហាមឃាត់អាវុធគីមី និង UNICHI,EU ដើម្បីធ្វើការហ្វឹកហាត់សិក្សា វាយតម្លៃការងារគ្រប់គ្រងហានិភ័យនៃសារធាតុគីមីនៅកម្ពុជា ហើយបើទោះបីជាព្រះរាជាណាចក្រកម្ពុជា មិនមែនជាអ្នកផលិតនូវរាល់សារធាតុគីមី និងសម្ភារគីមីក៏ពិតមែន ប៉ុន្តែកម្ពុជាបាននាំចូលយ៉ាងច្រើននូវសាធាតុពុលគួរឱ្យកត់សម្គាល់ ដែលធ្វើឱ្យមានការគម្រាមកំហែង និងផលប៉ះពាល់ដល់ប្រទេសយើង ។
ឯកឧត្តមឧត្តមសេនីយ៍ឯក ញ៉ែម សារិទ្ធ មានប្រសាសន៍បន្ថែមថា ដើម្បីទប់ស្កាត់ បង្ការ និងបង្ក្រាបរាល់ហានិភ័យ អាជ្ញាធរជាតិអាវុធគីមី បានចុះធ្វើការស្រាវជ្រាវតាមបណ្តាខេត្ត តាមព្រំដែន រុករកឃើញនូវគ្រាប់បែកគីមី ដែលបានប្រើនៅទស្សវត ៦០-៧០ ដូចជា ខេត្តមណ្ឌលគីរី ត្បូងឃ្មុំ និងខេត្តស្វាយរៀង ដោយបានបង្ហាញឱ្យឃើញនូវគ្រោះមហន្តរាយដល់សុខភាពលសាធារណៈយ៉ាងធ្ងន់ធ្ងរ បង្កនូវជំងឺជាច្រើនប្រភេទ ដូចជាធ្វើឱ្យកុមារក្បាលធំ យុវវ័យមួយចំនួនមានសុខភាពខុសប្រក្រតីជាដើម ដូច្នេះសូមអំពាវនាវដល់អាជ្ញាធរខេត្ត មន្ត្រីអនុវត្តច្បាប់នៅគ្រប់មូលដ្ឋាន ចូលរួមទប់ស្កាត់រាល់ការដឹកជញ្ជូនសារធាតុគីមីហាមឃាត់ជាពិសេសនៅតាមច្រកព្រំដែន ឱ្យបានកាន់តែសកម្ម ដើម្បីទប់ស្កាត់នូវរាល់ហានិភ័យផ្សេង ដែលកើតឡើងដោយាសាធាតុគីមីនៅកម្ពុជា ។
ព័ត៌មានជាតិ ថ្មីៗ
ឯកឧត្តម ញ៉ែម សារិទ្ធ មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតី ក្នុងពិធីផ្សព្វផ្សាយច្បាប់ ស្តីពីការហាមឃាត់ អាវុធគីមី អាវុធនុយក្លេអ៊ែរ អាវុធជីវសាស្ត្រ និងវិទ្យុសកម្ម នៅសាលប្រជុំខេត្តសៀមរាប នាព្រឹកថ្ងៃទី១៨ ខែកញ្ញា ឆ្នាំ២០១៩នេះ រួមជាមួយលោក ពិន ប្រាកដ អភិបាលរងខេត្ត និង ជាតំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្តសៀមរាប ដោយមានការចូលរួមពីសំណាក់មន្ត្រីជំនាញក្នុងខេត្តសៀមរាប ជាច្រើនរូប ។
ឯកឧត្តមឧត្តមសេនីយ៍ឯក ញ៉ែម សារិទ្ធ មានប្រសាសន៍បន្ថែមទៀតថា ដើម្បីបំពេញនូវវិធានច្បាប់ដែលពាក់ព័ន្ធ កម្ពុជាបានចូលរួមជាសមាជិកនៃរដ្ឋភាគីសន្ធិសញ្ញានិងអនុសញ្ញា ទៅនឹងការគ្រប់គ្រងសារធាតុពុលតាមការកំណត់របស់អន្តរជាតិ ព្រមទាំងថ្នាក់ជាតិចំនួន១៧ស្ថាប័ន ដើម្បីរួមគ្នាផ្សព្វផ្សាយច្បាប់និងមានវិធានការម៉ឺងម៉ាត់ អនុវត្តច្បាប់ឱ្យមានប្រសិទ្ធភាពខ្ពស់ ដូចនេះសង្ឃឹមយ៉ាងមុតមាំថា តាមរយៈការផ្សព្វផ្សាយច្បាប់ស្តីពីការហាមឃាត់អាវុធគីមី អាវុធនុយក្លេអ៊ែរ អាវុធជីវសាស្ត្រ និងអាវុធវិទ្យុសកម្ម នឹងនាំមកនូវបទពិសោធន៍ថ្មីៗ ដើម្បីធានាសន្តិសុខ សណ្តាប់ធ្នាប់សាធារណៈ ការពារបរិស្ថាន សុខភាពសាធារណៈជៀសផុតពីមហន្តរាយបង្ករឡើងដោយអាវុធទាំងនោះ ។
ពាក់ព័ន្ធនឹងបញ្ហានេះដែរ លោក ពិន ប្រាកដ អភិបាលរងខេត្តសៀមរាប ក្នុងនាមអាជ្ញាធរខេត្តសៀមរាប បានសម្ដែងនូវការគាំទ្រចំពោះពិធីផ្សព្វផ្សាយនេះ ព្រោះថា អាវុធគីមី អាវុធនុយក្លេអ៊ែ អាវុធជីវសាស្ត្រ និងអាវុធវិទ្យុសកម្ម ត្រូវបាន គេឱ្យរហស្សនាមថា ជា « អាវុធ មហា ប្រល័យ» ដោយសារសារធាតុនេះ អាចបង្កឱ្យមានគ្រោះថ្នាក់យ៉ាងធ្ងន់ធ្ងរបំផុត ដល់ជីវិតមនុស្ស សត្វ រុក្ខជាតិ ដែលបណ្តាល ឱ្យកើតជំងឺជាច្រើនប្រភេទ ដូចជាធ្វើឱ្យកុមារមានក្បាលធំ យុវ័យមួយចំនួន មានសុខភាពខុសប្រក្រតីជាដើម ។
លោក ពិន ប្រាកដ មានប្រសាសន៍បន្ថែម ថា ការរៀបចំសិក្ខាសាលាផ្សព្វផ្សាយច្បាប់នាពេលនេះ គឺពិតជាបានឆ្លើយតបទៅនឹងស្ថាន ភាព រីកចម្រើនដល់ពិភពលោក ដូច្នេះតាមរយៈនេះ សូមក្រើនរំលឹក និងណែនាំដល់មន្ទីរ-អង្គភាព កងកម្លាំងគ្រប់អង្គភាព ត្រូវយកចិត្តទុកដាក់ទប់ស្កាត់ និងប្រឆាំងរាល់អំពើភេរវកម្មទាំងឡាយណា ដែលធ្វើឲ្យប៉ះពាល់ដល់សន្តិសុខជាតិ ដោយពង្រឹងការកាពារតាមមូល ដ្ឋាន និងត្រួតពិនិត្យការដឹកជញ្ជូន ឆ្លងកាត់អាវុធខុសច្បាប់ និងអាចជាតំបន់ជ្រកកោន ឬការឆ្លងកាត់នៃភេរវជន ព្រមទាំងបញ្ហាអសកម្មមួយចំនួនទៀត ៕
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
