នារាត្រីថ្ងៃទី១៥ ខែកញ្ញា ឆ្នាំ២០១៩ ស្ថិតនៅក្នុងបរិវេណ សាកលវិទ្យាល័យសៅស៍អ៊ីសថ៍អេយសៀ ក្នុងក្រុងខេត្តសៀមរាប មានរៀបចំការប្រគុំតន្ត្រីមួយ ស្វែងរកថវិកាឧបត្ថម្ភដល់មន្ទីរពេទ្យគន្ធបុប្ផា និងមន្ទីរពេទ្យកុមារអង្គរ ក្នុងខេត្តសៀមរាប ខណៈមន្ទីរពេទ្យកុមារទាំងពីរនេះ តែងតែជួបប្រទះ នឹងកង្វះខាតថវិកាជារៀងរាល់ឆ្នាំ ដើម្បីជួយសង្គ្រោះជីវិតកុមារកម្ពុជា។
មានប្រសាសន៍នាឱកាសនោះ លោក ពិន ប្រាកដ អភិបាលរងខេត្តសៀមរាប បានលើកឡើងអំពីការយកចិត្តទុកដាក់ខ្ពស់ពីសំណាក់អាជ្ជាធរខេត្ត ដែលតំណាងឱ្យរាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លើការងារសប្បុរសធម៌ ជាពិសេសការយកចិត្តទុកដាក់ខ្ពស់ចំពោះសុខមាភាពរកុមារ និងប្រជាពលរដ្ឋជាដើម។
លោកអភិបាលរងខេត្ត បន្តថា នេះគឺជាការងារមនុស្សធម៌ និង ការងារសង្គម ដើម្បីជាការជួយលើកកម្ពស់ដល់សុខុមាលភាពជូនប្រជាពលរដ្ឋក្រីក្រនៅតាមមូលដ្ឋាន និង ជួយកាត់បន្ថយការចំណាយ ទៅលើការសេវាព្យាបាល ពិសេសក្នុងគោលបំណងចេះសាមគ្គីភាពក្នុងការជួយគ្នាទៅវិញទៅមក ឱ្យកាន់តែល្អប្រសើរឡើងថែមទៀត។ ដូច្នេះក្នុងនាមអាជ្ញាខេត្តសៀមរាប សូមថ្លែងនូវអំណរគុណយ៉ាងជ្រាលជ្រៅចំពោះ សាកលវិទ្យាល័យ សៅស៍អ៊ីសថ៍អេយសៀ ដែលបានរៀបចំមូលនិធិសប្បុរសធម៌ ដើម្បីស្វែងរកថវិកាសប្បរធម៌សម្រាប់ឧបត្ថម្ភមន្ទីរពេទ្យគន្ធបុប្ផា និងមន្ទីរពេទ្យកុមារអង្គរខេត្តសៀមរាបលើកទី២នេះ បានចំណាយទាំងពេលវេលា និង កម្លាំងចិត្តកម្លាំងកាយរកថវិកាជួយដល់បងប្អូនប្រជាពលរដ្ឋក៏ដូចជាការឧបត្ថម្ភមន្ទីរពេទ្យគន្ធបុប្ផា និងមន្ទីរពេទ្យកុមារអង្គរក្នុងខេត្តសៀមរាប ។
សូមជម្រាបថា លើកទី១ កាលពីខែសីហាឆ្នាំ២០១៨កន្លងទៅ សាកលវិទ្យាល័យ សៅស៍អ៊ីសថ៍អេយសៀ ក៏បានបង្កើតមូលនីធិសប្បុរសធម៌លើកទីមួយរបស់ខ្លួនដែរ ដែលគៀងគរថវិកាបានសរុបចំនួនជាង៣ម៉ឺនដុល្លារ។ ហើយមូលនីធិសប្បុរសធម៌សាកលវិទ្យាល័យ សៅស៍អ៊ីសថ៍អេយសៀ លើកទី២នេះ ត្រូវបានរៀបចំឡើងចាប់ពីថ្ងៃទី១៨ ខែសីហាឆ្នាំ២០១៩ រហូតដល់ពេលនេះ ដឹកនាំដោយលោក បុគ្គលិក និងនិស្សិតស្ម័គ្រចិត្តនៃសាកលវិទ្យាល័យ សៅស៍អ៊ីសថ៍អេយសៀ ហើយបានបែងចែកជាក្រុមតូចៗ ដើម្បីគៀងគររកថវិកាសប្បុរសធម៌ពីសប្បុរសជននានានៅតាមដងផ្លូវ ក្នុងផ្សារ ទីប្រជុំជន ទីសារធារណៈក្នុងខេត្តសៀមរាប។ គិតមកត្រឹមរាត្រីថ្ងៃទី១៥ ខែកញ្ញា ឆ្នាំ២០១៩នេះ មូនិធិមួយនេះ ទទួលបានថវិកាសប្បុរសធម៌សរុបចំនួន ជិត២ម៉ឺនដុល្លារ និង លុយរៀល ជាង១៦លានរៀល គិត ហើយថវិការទាំងអស់នេះ នឹងយកទៅដល់ជូនដល់មន្ទីរពេទ្យទាំង២ ដើម្បីប្រើប្រាស់ទៅតាមតម្រូវការចាំបាច់នៅខាងមុខនោះ៕
អត្ថបទ និង រូបភាព ៖ លោក ស៊ាន សុផាត
កែសម្រួលអត្ថបទ៖ លោក សេង ផល្លី
