ការសាងសង់ ឬជួសជុលកែលំអថ្មី នូវសំណង់ វិហារ កុដិ សាលា និងហេដ្ឋារចនាសម្ព័ន្ឋនានាក្នុងទីអារាម ដែលចាស់ទ្រុឌទ្រោម ក្នុងខេត្តសៀមរាប ត្រូវមានការអនុលោមតាមការពិនិត្យ និងឯកភាព ពីមន្ទីរ អង្គភាព ស្ថាប័នជំនាញក៍ដូចជាអាជ្ញាធរខេត្ត ចៀសវាងប្រាសចាកពីទម្រង់រចនាបថចាស់ នៃសំណង់ នេះបើតាមប្រសាសន៍ លោកស្រី យូ អភិបាលរងខេត្តសៀមរាប នាព្រឹកថ្ងៃទី១៦ខែកញ្ញា ឆ្នាំ២០១៩ ក្នុងឱកាសពិធី កាន់វេនបិណ្ឌទី៣ នៅវត្តទេពពោធិវង្សហៅវត្តថ្មី ស្ថិតក្នុងក្រុងសៀមរាប។
លោកស្រី យូ សុភា បានលើកឡើងថា ដោយខេត្តសៀមរាប ជាខេត្តគោលដៅទេសចរណ៍វប្បធម៌ប្រវត្តិសាស្ត្រ និងជាពិសេសខេត្តនេះ មានប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក ហេតុនេះរាល់ហេដ្ឋារចនាសម្ព័ន្ឋសំណង់បុរាណទាំងឡាយ ទាមទារឱ្យមានការអភិរក្ស។ លោកស្រី បានលើកឧទាហណ៍ជាក់ស្តែងថា កាលពីពេលថ្មីៗនេះប្រជាពុទ្ឋបរិស័ទមួយចំនួន បានទៅរៀបចំពិដានថ្មីនៅព្រះវិហារព្រះអង្គធំ ដោយវាយពិដានចាស់ចេញ ដាក់ពិដានថ្មីវិញ និងបានជាវរូបពុទ្ឋបដិមា យកទៅតម្កល់នៅទីនោះ ដោយមិនបានសុំច្បាប់អនុញ្ញាតិពីអាជ្ញាធរជាតិអប្សរា ដែលវាបានធ្វើឱ្យប៉ះពាល់ ដល់រចនាបថចាស់ នៃទីតាំងទីនោះ។
លោកស្រីអភិបាលរងខេត្ត បានបញ្ជាក់បន្ថែមថា មួយវិញទៀត ប្រសិនបើមានសំណើសុំពីវត្តអារាម តាមរយៈកិច្ចសហការជាមួយអនុគណក្រុង ស្រុក ព្រះមេគណខេត្ត អាជ្ញាធរមូលដ្ឋាន និងអង្គភាព មន្ទីរស្ថាប័នជំនាញជាមុនសិន វាពិតជាបានកាត់បន្ថយ នូវការហានិភ័យ ក្នុងការរុះរើ ជួសជុល ឬសាងសង់សំណង់ ដែលមិនត្រឹមត្រូវទៅតាមទ្រង់ទ្រាយ និងបច្ចេកទេសនៃសំណង់ទីអារាមទាំងនោះ។
លោកស្រី យូ សុភា បញ្ជាក់បន្ថែមថា បច្ចុប្បន្ននេះ រដ្ឋបាល និងអាជ្ញាធរខេត្ត កំពុងសហការជាមួយមន្ទីរធម្មការ និងសាសនាខេត្ត និងព្រះមេគណ ដើម្បីដោះស្រាយបញ្ហាខាងលើនេះ ផ្អែកតាមបញ្ហាខាងលើនេះ។
អត្ថបទ និង រូបភាព ៖ លោក យូ វង្ស
កែសម្រួលអត្ថបទ៖ លោក សេង ផល្លី
