រដ្ឋលេខាធិការក្រសួងសុខាភិបាល៖គ្រូពេទ្យមានកាតព្វកិច្ចក្នុងការជួយសង្គ្រោះមនុស្ស[….]មិនត្រូវធ្វើការលំៗយកតែរួចខ្លួននោះទេ

ក្នុងនាម(យើង)ជាគ្រូពេទ្យ មានកាតព្វកិច្ចក្នុងការជួយសង្គ្រោះមនុស្ស នៅពេលពួកគាត់មានជំងឺដោយប្រការណាមួយ យើងត្រូវយកចិត្តទុកដាក់ទៅលើអ្នកជំងឺ មិនត្រូវធ្វើការលំៗយកតែរួចខ្លួននោះទេ ត្រូវមានក្រមសីលធម៌ ភាពស្និទ្ធស្នាល និងត្រូវធ្វើការពន្យល់ដល់ពួកគាត់ឲ្យបានច្បាស់ នេះបើតាមការលើកឡើង របស់ ឯកឧត្តមសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល និងជាប្រធានគណៈគ្រូពេទ្យជាតិ ក្នុងពិធីអបអរសាទរទិវាអភិវឌ្ឍវិជ្ជាជីវៈ វេជ្ជសាស្ត្របន្តលើកទី១១ ក្នុងខេត្តសៀមរាប នៅថ្ងៃទី១៥ ខែកញ្ញា ឆ្នាំ២០១៩ ។

ឯកឧត្តម ធា គ្រុយ មានប្រសាសន៍បន្ថែមថា គ្រូពេទ្យមិនត្រូវធ្វើតាមបញ្ជា របស់ក្រុមគ្រួសារអ្នកអ្នកជំងឺទេ ព្រោះគាត់មិនមែនជាគ្រូពេទ្យទេ ដូច្នេះមានតែក្រុមគ្រូពេទ្យ ដែលដឹងពីប្រភេទជំងឺ និងស្ថានភាពជំងឺរបស់គាត់ បើស្ថានភាពធ្ងន់ធ្ងរខ្លាំង ហើយហួសពីសមត្ថភាពរបស់គ្រូពេទ្យ ត្រូវបញ្ជូនគាត់ទៅសង្គ្រោះ និងព្យាបាលបន្តនៅមន្ទីរពេទ្យណា ដែលមានលទ្ធភាពព្យាបាល។ ទន្ទឹមនោះ ឯកឧត្តម ក៏បានផ្ដាំផ្ញើដល់ ថ្នាក់ដឹកនាំមន្ទីរសុខាភិបាលខេត្ត ប្រធានមន្ទីរពេទ្យ ត្រូវធ្វើការផ្តល់ព័ត៌មានឲ្យប្រជាពលរដ្ឋបានយល់ច្បាស់ ដោយបច្ចុប្បន្ន ប្រជាពលរដ្ឋទីទ័លក្រគ្មានលទ្ធភាពព្យាបាលជំងឺ រាជរដ្ឋាភិបាលនឹងចេញថ្លៃសេវាសម្រាកព្យាបាលជូនពួកគាត់។ មួយវិញទៀត ក្រុមគ្រូពេទ្យត្រូវយកចិត្តដាក់ក្នុងការងាររបស់ខ្លួន ត្រូវគោរពតួនាទី និងពេលវេលាម៉ោងធ្វើការ ជាពិសេសក្នុងការប្រចាំការនៅផ្នែកនីមួយៗ ត្រូវមានគ្រូពេទ្យប្រចាំការជាប់គ្រប់ម៉ោង នៅតាមមណ្ឌលសុខភាព និងមន្ទីរពេទ្យរដ្ឋ ព្រោះបញ្ហាអ្នកជំងឺយើងមើលមិនឃើញ គឺមានគ្រប់ពេលវេលាដែលកើតឡើង។

មានវត្តមានក្នុងឱកាសនោះ លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានលើកឡើងពីការ ខិតខំប្រឹងប្រែងអនុវត្តន៍នូវប្រសាសន៍របស់ថ្នាក់ដឹកនាំជានិច្ច ហើយខិតខំបំពេញកាតព្វកិច្ចជាគ្រូពេទ្យ ប្រកបដោយក្រមសីលធម៌វិជ្ជាជីវៈ ក្នុងនោះផ្នែកនីមួយៗមានការ ប្រចាំការណ៍ជាប់ ជានិច្ច២៤ម៉ោង លើ២៤ម៉ោង ចំពោះក្រមសីលធម៌របស់ក្រុមគ្រូពេទ្យ គឺអនុវត្តន៍បានល្អប្រសើរ ជូនដល់ប្រជាពលរដ្ឋ ដែលមកទទួលសេវាពិនិត្យ និងព្យាបាល នៅតាមមណ្ឌលសុខភាព និងមន្ទីរពេទ្យបង្អែកស្រុក-ក្រុង ក្នុងខេត្តសៀមរាប។