ចាប់ពីថ្ងៃទី០៨ ខែតុលា ឆ្នាំ២០១៩នេះតទៅ អាជ្ញាធរជាតិអប្សរា នឹងចាត់វិធានការលើសកម្មភាពលក់ដូរដោយក្រាលកន្ទេល និង ដាក់អង្រឹង នៅបរិវេណកសិន្ធុប្រាសាទអង្គរវត្ត

តាមបណ្ដាញទំនាក់ទំនងសង្គម ( Facebook ) ផ្លូវការរបស់អាជ្ញាធរជាតិអប្សរា បានឲ្យដឹងថា ការដាក់ឱសានវាទបញ្ឈប់សកម្មភាពលក់ដូរ ក្រាលកន្ទេល អង្រឹង បើកគ្រឿងបំពងសំឡេងខ្លាំងៗ និង ទទួលទានគ្រឿងស្រវឹង នៅជុំវិញកសិន្ធុប្រាសាទអង្គរវត្ត បានចូលមកដល់នៅត្រឹមថ្ងៃទី០១ ខែតុលា ឆ្នាំ២០១៩ ដូច្នេះដើម្បីលើកកម្ពស់បរិស្ថានស្អាត សោភ័ណភាពស្រស់បំព្រង ក៏ដូចជាលើកតម្លៃភាពជាសក្ការៈដ៏ឧត្តុង្គឧត្តមនៃរមណីយដ្ឋានអង្គរ អាជ្ញាធរជាតិអប្សរា អង្គភាពនគរបាលពាក់ព័ន្ធ និងអាជ្ញាធរមូលដ្ឋាន បានបង្កើតក្រុមការងារចម្រុះធ្វើការអប់រំណែនាំផ្ទាល់នៅទីកន្លែងចាប់ពីថ្ងៃ០២ រហូតដល់ថ្ងៃទី០៧ ខែតុលា ឆ្នាំ២០១៩។

អាជ្ញាធរជាតិអប្សរា បានឲ្យដឹងទៀតថា ទីតាំងដែលក្រុមការងារចម្រុះអនុវត្តការងាររបស់ខ្លួន មានដូចជាជុំវិញបរិវេណត្រពាំងសេស , ប្រាសាទព្រហ្មកិល និងតាមដងផ្លូវកៅស៊ូនៃកសិន្ធុប្រាសាទអង្គរវត្ត ហើយក្នុងករណីហួសកាលបរិច្ឆេទអប់រំណែនាំ ប៉ុន្តែសកម្មភាពលក់ដូរ ក្រាលកន្ទេល អង្រឹង បើកគ្រឿងបំពងសម្លេងខ្លាំងៗ និងការទទួលទានគ្រឿងស្រវឹងនៅតែបន្តនោះ ក្រុមការងារចម្រុះនឹងអនុវត្តវិធានការរដ្ឋបាលចាំបាច់នានា។

ជាថ្មីម្តងទៀត អាជ្ញាធរជាតិអប្សរាសូមអំពាវនាវឱ្យមានការចូលរួមសហការបញ្ឈប់សកម្មភាពលក់ដូរ ក្រាលកន្ទេល អង្រឹង បើកគ្រឿងបំពងសម្លេងខ្លាំងៗ និងការទទួលទានគ្រឿងស្រវឹង នៅលើវាលស្មៅជុំវិញកសិន្ធុប្រាសាទអង្គរវត្តឱ្យបានជាដាច់ខាតចាប់ពីពេលនេះតទៅ ៕