សហភាពប៉ូលិសបាននិយាយថា ភ្នាក់ងារប៉ូលិស៤នាក់ស្លាប់ និង៥នាក់ទៀតរបួស នៅក្នុងការវាយ ប្រហារដោយកាំបិតមួយ នៅឯទីស្នាក់ការប៉ូលិសក្នុងក្រុងប៉ារីសកាលពីរសៀលថ្ងៃព្រហស្បតិ៍ ។
លោក Loic Traves ប្រធានសម្ព័ន្ធសហភាពប៉ូលិសក្នុងស្រុកបាននិយាយនៅលើបណ្តាញព័ត៌មាន BFMTV ថា អ្នកវាយប្រហារដែលគេស្គាល់ថា ជាបុគ្គលិករដ្ឋបាលមួយរូប នៅក្នុងកងឯកភាពចារកម្មនោះ បានចាក់សម្លាប់សហសេវិករបស់លោក៤នាក់ នៅខាងក្នុងតំបន់ប៉ូលិសនោះនៅក្រោយម៉ោង១២ថ្ងៃត្រង់ ម៉ោងក្នុងស្រុក ។
លោក Traves បានបន្តថាឧក្រិដ្ឋជននោះ ជានិយោជិកគំរូមួយរូបដែលធ្វើការនៅក្នុងទីស្នាក់ការនោះអស់ពេល២ទសវត្សមកហើយ ហើយក៍មិនដែលបង្ហាញនូវអាកប្បកិរិយាដែលគ្មានលំនឹងឡើយ ។
ហេតុផលរបស់អ្នកវាយប្រហារគេ មិនទាន់បង្ហាញឱ្យដឹងនៅឡើយទេ។ ប៉ុន្តែតាមសេចក្តីរាយ ការណ៍ឱ្យដឹងថា វាអាចទាក់ទងទៅនឹងជម្លោះនៅកន្លែងធ្វើការ ។
សូមបញ្ជាក់ថា ការវាយប្រហារដែលមិនធ្លាប់មានពីមុននៅខាងក្នុងតំបន់ប៉ូលិសនេះ បានកើតឡើងមួយថ្ងៃបន្ទាប់ពីប៉ូលិសប្រហែល២៧.០០០ នាក់ បានធ្វើបាតុកម្មតវ៉ាប្រឆាំងនឹងប្រាក់ខែទាបធ្វើការយូរម៉ោង នឹងការកើន ឡើងការធ្វើអត្តឃាតនៅក្នុងជួររបស់ពួកគេ ៕
(ប្រភព ស៊ីនហួ បកប្រែដោយលោក ប៉ិន មឿន)
