នៅព្រឹកថ្ងៃទី០៤ ខែ តុលា ឆ្នាំ២០១៩នេះ លោក ធិននី វិធូរ ត្រូវបានប្រកាសចូលកាន់តំណែងថ្មី ជាអភិបាលស្រុកវ៉ារិន ជំនួសលោក ភូ សំអាត អតីតអភិបាលស្រុកចាស់ដែលត្រូវបានចូលនិវត្តន៍ នៅសាលាស្រុកវ៉ារិន ខេត្តសៀមរាប។
មានប្រសាសន័ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានបញ្ជាក់ថា ការប្រកាសតែងតាំង និង ប្រគល់ភារកិច្ចនេះ មានការទទួលស្គាល់ពីរាជរដ្ឋាភិបាលកម្ពុជា ក្រសួងមហាផ្ទៃ និង អាជ្ញាធរខេត្ត ដើម្បីជាការលើកទឹកចិត្តដល់មន្ត្រី ឲ្យបន្តខិតខំបំពេញភារកិច្ច ក្នុងការបម្រើជាតិមាតុភូមិ ។
ឯកឧត្តម អភិបាលខេត្ត បានលើកឡើងថា ប្រទេសជាតិទាំងមូលមានសុខសន្តិភាព និង មានការអភិវឌ្ឍយ៉ាងឆាប់រហ័ស ដូច្នេះ គឺដោយការច្នៃប្រឌិត និងដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ទន្ទឹមនោះ ជាមួយនឹងតួនាទីថ្មី ជាអភិបាលស្រុកវ៉ារិន សូមឲ្យមន្ត្រីរាជការគ្រប់លំដាប់ថ្នាក់ក្នុងមូលដ្ឋាននេះ រក្សានូវចំណងស្មារតីសាមគ្គី និង ឯកភាពផ្ទៃក្នុងក្នុងជួរគណៈអភិបាលស្រុក ដើម្បីរួមគ្នាអភិវឌ្ឍន៍នូវសមិទ្ធផលថ្មីៗបន្ថែមទៀត។ ជាពិសេស ត្រូវគិតគូ និង ពិចារណា នូវការបង្កើតភូមិមួយផលិតផលមួយ ការបង្កើតរមណីយដ្ឋានថ្មីៗបន្ថែម ជាមួយនឹងរមណីយដ្ឋានដែលមានស្រាប់ ដើម្បីទាក់ទាញចំណាប់អារម្មណ៍របស់ភ្ញៀវទេសចរជាតិ និង អន្តរជាតិ មកកាន់ខេត្តសៀមរាបឲ្យបានកាន់តែច្រើន។
ព័ត៌មានជាតិ ថ្មីៗ
ក្នុងនោះដែរ ឯកឧត្តមអភិបាលខេត្ត ក៏បានផ្ដាំផ្ញើដល់លោកអភិបាលស្រុកដែលទើបតែងតាំងថ្មី ត្រូវដឹកនាំមន្ត្រី អាជ្ញាធរមានសមត្ថកិច្ចគ្រប់លំដាប់ថ្នាក់ យកចិត្តទុកដាក់ក្នុងការបម្រើសេវាសាធារណៈជូនដល់បងប្អូនប្រជាពលរដ្ឋឲ្យបានទាន់ពេលវេលា។ មួយវិញទៀត អាជ្ញាធរស្រុក ឃុំ និង ភូមិ ត្រូវចៀសឲ្យឆ្ងាយពី បទល្មើសកាប់បំផ្លាញព្រៃឈើ និង ការទន្ទ្រានយកដីដោយខុសច្បាប់។
ក្នុងឱកាសនោះ អភិបាលស្រុកវ៉ារិនដែលបានចូលកាន់តំណែងថ្មី បានធ្វើការប្ដេជ្ញាចិត្ត គោរពតាម ការដឹកនាំចង្អុលបង្ហាញ របស់ឯកឧត្ដមប្រធានក្រុមប្រឹក្សាខេត្ត ឯកឧត្ដមអភិបាលខេត្ត និង ប្ដេជ្ញាខិតខំទប់ស្កាត់ លុបបំបាត់រាល់បាតុភាពអសកម្មទាំងឡាយ ដែលធ្វើឲ្យប៉ះពាល់ដល់ប្រជាពលរដ្ឋ ព្រមទាំងយកចិត្តទុកដាក់រៀបចំ កសាង និង អភិវឌ្ឍន៍លើគ្រប់វិស័យនៅក្នុងស្រុកវ៉ារិនផងដែរ ៕
អត្ថបទ និង រូបថត ៖ លោក ខេង ឧត្តម និងលោក អ៊ុន ណារាជ្យ
កែសម្រួលអត្ថបទ ៖ លោក សេង ផល្លី
