ក្រុមភ្ញៀវទេសចរណ៍បែបសប្បុរសធម៌មកពីប្រទេសអូស្ត្រាលី ប្រមាណជិត៥០នាក់ ចាប់អារម្មណ៍ពីប្រពៃណីឡើងផ្ទះ បែបអរូបិយ របស់ប្រជាពលរដ្ឋ ស្ថិតក្នុងភូមិតានី ឃុំរុនតាឯក ស្រុកបន្ទាយស្រី ខេត្ដសៀមរាប បន្ទាប់ពីពួកគេ បានប្រគល់ផ្ទះចំនួន ៥ខ្នង ដែលកសាង និងឧបត្ថម្ភដោយពួកគេផ្ទាល់ នៅថ្ងៃទី០៤ ខែតុលា ឆ្នាំ២០១៩នេះ។
តាមការឲ្យដឹងពី លោក មាន់ រ៉ម ជាអ្នកជ្រើសរើសគ្រួសារពលរដ្ឋក្រីក្រ នៃអង្គការស្ម័គ្រចិត្ដកសាងកម្ពុជា ផ្ទះទាំងអស់នេះ មានបណ្ដាយ ៥ម៉េត្រ និងទទឹង ៤ម៉ែត្រ សង់អំពីឈើផុតពីដី និងប្រក់ស័ង្កសី ដែលប្រើប្រាស់រយៈពេល ៤ថ្ងៃ។ លោក បានបន្តថា លោកបានទទួល ក្រុមភ្ញៀវទេសចរណ៍បែបមនុស្សធម៌នេះ ប្រហែល ៣០០លើកមកហើយ។
ក្រៅពីការស្ម័គ្រចិត្តជួយដល់ប្រជាពលរដ្ឋក្រីក្រក្នុងប្រទេសកម្ពុជា ក្រុមអ្នកស្ម័គ្រចិត្តអន្តរជាតិទាំងអស់នេះ ក៏បានចាប់អារម្មណ៍ ទៅប្រពៃណី ទំនៀមទំលាប់ និង ជំនឿ របស់ប្រជាពលរដ្ឋក្នុងមូលដ្ឋាននេះផងដែរ តាមរយៈការរៀបចំពិធីឡើងផ្ទះ ដុតទាន ធូប ដង្ហែជុំវិញផ្ទះ បែបអបិយជំនឿជាដើម។ ទាំងអស់នេះ បានធ្វើឲ្យពួកគេ ទទួលបានបទពិសោធថ្មីៗ បន្ថែមទៀត ក្នុងដំណើរទេសចរណ៍ និងសប្បុរសធម៌របស់ពួកគេ។
លោកស្រី ស៊ូយីង ប្រធានក្រុមអ្នករៀបចំផ្ទះជំនួយមកពីប្រទេសអូស្ដ្រាលី បានមានប្រសាសន៍ថា លោកស្រី ពុំគម្រោងទុកជាមុន អំពីការរៀបចំឡើងផ្ទះបែបប្រពៃណីក្នុងមូឡដ្ឋាននេះ ឬ ទទួលទានអាហារជុំគ្នានោះទេ។ ប៉ុន្តែ សកម្មភាពទាំងនេះ បានធ្វើឲ្យក្រុមភ្ញៀវទេសចរណ៍អន្ដរជាតិទាំងនោះ មានការចាប់អារម្មណ៍យ៉ាងខ្លាំង ដែលវាបានបន្ថែមនូវទិដ្ឋភាពដ៏ថ្មីស្រឡាងក្នុងដំណើរសប្បុរសធម៌ និងទេសចរណ៍ ចំពោះមុខរបស់ពួកគេមួយចំនួន។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
