ព្រឹកមិញនេះ រដ្ឋលេខាធិការក្រសួងបរិស្ថាន ឯកឧត្តម សៅ សុភាព, ឯកឧត្តម ហង់ ពៅ អគ្គនាយកអាជ្ញាធរជាតិអប្សរា, និងឯកឧត្តម ង៉ាន់ ភិរុណ អភិបាលរងនៃគណៈអភិបាលខេត្តសៀមរាប បានអញ្ញើញចុះពិនិត្យមើលទីតាំងសួនមុខប្រាសាទអង្គរវត្ត ដែលនឹងត្រូវរៀបចំដាំដើមឈើអនុស្សាវរីយ៍ នៅថ្ងៃទី០៨ ខែតុលា ឆ្នាំ២០១៩ ខាងមុខ ដើម្បីបង្ហាញពីការតាំងចិត្តក្នុងការលើកកម្ពស់ប្រសិទ្ធិភាព និងសោភ័ណភាពក្នុងតំបន់រមណីយដ្ឋានអង្គរឲ្យស្រស់បំព្រង ។
ជាមួយគ្នានោះ ឯកឧត្តម សៅ សុភាព បានមានប្រសាសន៍ថា ការដាំដើមឈើអនុស្សាវរីយ៍នេះ ស្រប់ពេលដែលរដ្ឋមន្ត្រីបរិស្ថានអាស៊ាន និងប្រទេសជាដៃគូ បាននឹងកំពុងត្រៀមរៀបចំកិច្ចប្រជុំថ្នាក់រដ្ឋមន្ត្រីបរិស្ថានអាស៊ាន នៅខេត្តសៀមរាប នាថ្ងៃទី០៧ – ០៨ ខែតុលា ខាងមុខនេះ ។
ឯកឧត្តម បន្តទៀតថា នេះជាការបង្ហាញអំពីការយកចិត្តទុកដាក់ក្នុងកិច្ចសហប្រតិបត្តិការណ៍ភាពជាដៃគូ នៃប្រទេសបរិស្ថានអាស៊ាន និងដើម្បីលើកកម្ពស់ការយល់ដឹងឲ្យកាន់តែប្រសើរឡើងអំពីបរិស្ថាន និងសោភ័ណភាពក្នុងតំបន់រមណីយដ្ឋានអង្គរ ។ ទន្ទឹមនោះ រដ្ឋមន្ត្រីបរិស្ថានអាស៊ាន និងប្រទេសជាដៃគូ នឹងអញ្ជើញជាកិត្តិយសចូលរួមពិធីដាំកូនឈើជានិមិត្តរូបនៅសួនច្បារមុខប្រាសាទអង្គរវត្តផងដែរ ដែលសួននេះត្រូវបានអាជ្ញាធរជាតិអប្សរាកំពុងរៀបចំកែលម្អសោភ័ណភាពបន្ថែមទៀត ដើម្បីលើកតម្លៃរមណីយដ្ឋានអង្គរឲ្យស័ក្ដិសមជារមណីយដ្ឋានបេតិកភណ្ឌពិភពលោក ។
គួរបញ្ជាក់ថា កម្ពុជានឹងធ្វើជាម្ចាស់ផ្ទះកិច្ចប្រជុំលើកទី១៥ រដ្ឋមន្ត្រីបរិស្ថានអាស៊ាន ក្នុងនោះក៏មានកិច្ចប្រជុំលើកទី១៦ នៃរដ្ឋមន្ត្រីបរិស្ថានអាស៊ានបូក៣ ចិន ជប៉ុន និងកូរ៉េ ដែលផ្តោតសំខាន់លើកិច្ចសហប្រតិបត្តិការលើវិស័យបរិស្ថាន និងកិច្ចប្រជុំលើកទី១៥ នៃសន្និសីទភាគីកិច្ចព្រមព្រៀងអាស៊ាន ស្ដីពីការបំពុលផ្សែងអ័ព្ទឆ្លងដែន៕
ប្រភព និងរូបភាព ៖ លោក ឡុង កុសល , កែសម្រួលអត្ថបទ ៖ លោក អ៊ុន ណារាជ្យ
