អាជ្ញាធរជាតិអប្សរា នឹងធ្វើផ្អាកការលក់ដូររបស់អាជីវករ និងផ្អាកចរាចរណ៍យានយន្ដគ្រប់ប្រភេទ នៅខាងមុខបរិវេណប្រាសាទអង្គរវត្ដ ក្នុងរយៈពេលពីរថ្ងៃ គឺចាប់ពីថ្ងៃទី០៧ ដល់ថ្ងៃទី០៨ ខែតុលា ឆ្នាំ២០១៩ ដើម្បីសណ្តាប់ធ្នាប់ របៀបរៀបរយ សន្តិសុខល្អ សម្រាប់រៀបចំកម្មវិធីអោយប្រតិភូបរិស្ថានអាស៊ានលើកទី១៥ដាំដើមឈើ និងផ្កាក្រវាន់ និងវីខ្នងនៅបរិវេណមុខប្រាសាទអង្គវត្តផ្នែកខាងលិច អោយមានបរិស្ថាន នេះបើតាមជូនដំណឹងរបស់អាជ្ញាធរជាតិអប្សរា ចេញផ្សាយកាលពីថ្ងៃទី០៤ខែតុលានេះ ។
យោងតាមជូនដំណឺងបានឲ្យដឹងដែរថា គ្រប់ក្រសួងមន្ទីរស្ថាប័នជាតិអន្តរជាតិ សមាគមទីភ្នាក់ងារទេសចរណ៍ សមាគមមគ្គុទ្ទេសក៍ទេសចរណ៍ ក្រុមហ៊ុនទេសចរណ៍សមាគមអ្នកបើកបររថយន្តដឹកជញ្ជូនភ្ញៀវទេសចរ អ្នកបើកបរដឹកជញ្ជូនភ្ញៀវទេសចរ ម្ចាស់សណ្ឋាគារទីភ្នាក់ងារទេសចរណ៍ ភ្ញៀវទេសចរជាតិ-អន្តរជាតិ អាជីវករ ព្រមទាំងសាធារណជនទាំងអស់ជ្រាបថា រាជរដ្ឋាភិបាលកម្ពុជា មានកិត្តិយសដ៏ខ្ពង់ខ្ពស់ក្នុងការធ្វើជាម្ចាស់ផ្ទះ រៀបចំកិច្ចប្រជុំរដ្ឋមន្ត្រីបរិស្ថានអាស៊ានលើក ទី១៥ នៅខេត្តសៀមរាប ដោយមានការចូលរួមពីបណ្តាប្រទេសអាស៊ានទាំង១០ និងអាស៊ានបូក៣ (ចិន ជប៉ុន កូរ៉េ) ចាប់ពីថ្ងៃទី០៧ ដល់ថ្ងៃទី ១០ ខែតុលា ឆ្នាំ២០១៩ ខាងមុខនេះ។
សេចក្ដីជូនដំណឹងបានបន្ដថា មុនថ្ងៃនៃការរៀបចំកិច្ចប្រជុំដ៏មានសារសំខាន់នេះ នៅថ្ងៃទី០៨ ខែតុលា ឆ្នាំ២០១៩ នឹងមានរៀបចំកម្មវិធីដាំដើមផ្កាក្រវាន់ និងវីខ្នងនៅបរិវេណមុខប្រាសាទអង្គវត្តផ្នែកខាងលិច ដើម្បីធ្វើការរៀបចំបរិស្ថាន សណ្តាប់ធ្នាប់ របៀបរៀបរយ សន្តិសុខ និងចរាចរណ៍ឱ្យបានស័ក្តិសមជាព្រះរាជាណាចក្រអច្ឆរិយៈដ៏ល្បីល្បាញ អាជ្ញាធរជាតិអប្សរា សូមធ្វើការផ្អាកការធ្វើចរាចរណ៍-ចិតឋានយន្តគ្រប់ប្រភេទចូលក្នុងបរិវេណផ្នែកខាងលិច (ផ្លូវអក្សរ U) មុខប្រាសាទអង្គរវត្ត និងផ្អាកការលក់ដូរជាបណ្តោះអាសន្ន ចាប់ពីចំណុចស្នាក់ការអង្គភាពនគរបាលការពារបេតិភណ្ឌ រហូតដល់កែង ផ្លូវត្រពាំងសេះ រយៈពេល០២ថ្ងៃ នៅថ្ងៃទី០៧ និងថ្ងៃទី០៨ ខែតុលា ឆ្នាំ២០១៩។ ប៉ុន្ដែចំពោះការដើរ ទស្សនារបស់ភ្ញៀវទេសចរអាចប្រព្រឹត្តិទៅបានជាធម្មតា ។សេចក្ដីជូនដំណឹងបានបន្ថែមថា ការផ្អាកចរាចរណ៍យានយន្ដនេះ នឹងមានប្រើប្រាស់ផ្លូវវាងផ្សេងទៀត ហើយអាចចតយានយន្តគ្រប់ប្រភេទនៅក្នុង ចំណេតជាធម្មតា។
សូមជម្រាបថា កិច្ចប្រជុំរដ្ឋមន្ត្រីបរិស្ថានអាស៊ានលើក ទី១៥ មានរយៈពេល៤ថ្ងៃ ចាប់ពីថ្ងៃទី០៧ ដល់ថ្ងៃទី ១០ ខែតុលា ឆ្នាំ២០១៩ ខាងមុខនេះ ដោយមានការចូលរួមពីបណ្តាប្រទេសអាស៊ានទាំង១០ និងអាស៊ានបូក៣ (ចិន ជប៉ុន កូរ៉េ) នឹងប្រព្រឹតទៅខេត្ដសៀមរាប ៕
អត្ថបទ និងរូបភាព ៖ លោក បុ សាវី
កែសម្រួលអត្ថបទ ៖ លោក អ៊ុន ណារាជ្យ
