ក្រសួងសង្គមកិច្ច អតីតយុទ្ធជន និងយុវនីតិសម្បទា សហការជាមួយអគ្គលេខាធិការដ្ឋាន ដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ នៃក្រសួងសេដ្ឋកិច្ចនិងហិរញ្ញវត្ថុ បានរៀបចំបើកសិក្ខាសាលា និងបណ្តុះបណ្តាលស្តីពីការរៀបចំរចនាសម្ព័ន្ធថវិកាកម្មវិធី និងសូចនាករ សមិទ្ធកម្ម ថវិកាកម្មវិធី សម្រាប់ថ្នាក់កណ្តាល និងថ្នាក់រាជធានី-ខេត្ត ក្នុងរយៈពេល០២ថ្ងៃនៅខេត្តសៀមរាប គឺនៅថ្ងៃទី០៧ – ០៨ ខែតុលា ឆ្នាំ២០១៩នេះ ក្រោមអធិបតីភាពឯកឧត្តម នូ នឹម រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមានការចូលរួមជាសិក្ខាកាមពីសំណាក់លោក លោកស្រី ជាមន្ត្រីជំនាញពាក់ព័ន្ធមកពីក្រសួងសង្គមកិច្ច អតីតយុទ្ធជន និងយុវនីតិសម្បទា និងមន្ត្រីជំនាញមកពីមន្ទីរសង្គមកិច្ច នៃបណ្តាខេត្ត-រាជធានីទាំង២៥ ទូទាំងព្រះរាជាណាចក្រកម្ពុជា ។
ឯកឧត្តម នូ នឹម រដ្ឋលេខាធិការ និង ជាប្រធានក្រុមការងារចងក្រងផែនការយុទ្ធសាស្ត្រថវិកា ថវិកាកម្មវិធី និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ នៃក្រសួងសង្គមកិច្ច អតីតយុទ្ធជន និងយុវនីតិសម្បទា មានប្រសាសន៍ថា វគ្គបណ្ដុះបណ្ដាលនេះ គឺជាបរិបទមួយដ៏សំខាន់ សម្រាប់ប្រសិទ្ធភាពរៀបចំផែនការហិរញ្ញវត្ថុ និង កំណត់សូចនាករគោលដៅគន្លឹះផ្សេងៗទៀត ក្នុងការជំរុញ និងលើកកម្ពស់ប្រសិទ្ធភាព នៃការរៀបចំផែនការហិរញ្ញវត្ថុ ការកំណត់សូចនាករគោលដៅគន្លឹះ , ការកំណត់ឈ្មោះកម្មវិធី អនុកម្មវិធី ចង្កោមសកម្មភាព ដែលឆ្លើយតបតាមក្របខ័ណ្ឌគោលនយោបាយ ផែនការយុទ្ធសាស្ត្ររបស់ក្រសួងសេដ្ឋកិច្ច និងហិរញ្ញវត្ថុ និងអាចវាស់វែង-ស្វែងយល់បាន អំពីដំណើរការកែទម្រង់ហិរញ្ញវត្ថុសាធារណៈ។
ឯកឧត្តម នូ នឹម មានប្រសាសន៍បន្ថែមថា យើងបានឆ្លងកាត់ដំណាក់កាលកែទម្រង់ហិរញ្ញវត្ថុសាធារណៈចំនួន៣រួចមកហើយ ដែលដំណាក់កាលទី១ គឺ “ភាពជឿទុកចិត្តបាន នៃថវិកា ឆ្នាំ២០០៥-២០០៨” , ដំណាក់កាលទី២ គឺ “គណនេយ្យភាពហិរញ្ញវត្ថុ ចំណាត់ថ្នាក់ថវិកាថ្មី ប្លង់គណនីថ្មីនិងអង្គភាពថវិកា ព្រមទាំងប្រព័ន្ធមានវិទ្យាសម្រាប់ការគ្រប់គ្រងហិរញ្ញវត្ថុ ឆ្នាំ២០០៩ -២០១៥” និង ដំណាក់កាលទី៣ គឺ “ការផ្សាភ្ជាប់ថវិកាទៅនឹងគោលនយោបាយ ដែលក្នុងនោះរួមមាន ការកែទម្រង់ប្រព័ន្ធថវិកា ផែនការយុទ្ធសាស្ត្រ ថវិកាកម្មវិធី និងអង្គភាពថវិកា ឆ្នាំ២០១៦-២០២០” ហើយសម្រាប់បន្តទៅដំណាក់កាលទី៤ គឺ “គណនេយ្យភាពសមិទ្ធកម្ម ដែលជាការគ្រប់គ្រង វាយតម្លៃលទ្ធផល និងសមិទ្ធផល ឆ្នាំ២០២០-២០២៥” ខាងមុខ ៕
ព័ត៌មានជាតិ ថ្មីៗ
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
