កាលពីថ្ងៃទី០៦ ខែតុលា ឆ្នាំ២០១៩នេះ ក្រុមរួមគ្នាដើម្បីការងារសង្គម ចំនួនជាង២០នាក់ បានយកកាបូបស្ពាយ និងសម្ភារសិក្សាមួយចំនួនទៀត ចែកជូនដល់សិស្សានុសិស្សចំនួន៣១០នាក់ នៅសាលាបឋមសិក្សាត្រពាំងឫស្សី ស្ថិតក្នុងឃុំរើល ស្រុកពួកខេត្តសៀមរាប និងបានរួមគ្នាដាំកូនឈើចំនួន១០០ដើមផងដែរ នៅព្រៃសហគមន៍ត្រពាំងភ្លង់ ស្ថិតក្នុងឃុំស្វាយចេក ស្រុកអង្គរធំ ក្រោមប្រធានបទ “ដាំដើមឈើដើម្បីបរិស្ថាន សម្រាប់ជម្រកមនុស្សសត្វ” ។
លោក ញាណ តុលា ប្រធានដឹកនាំក្រុមរួមគ្នាដើម្បីការងារសង្គម បានឲ្យដឹងថា ក្រុមការងារបានបែងចែកជាក្រុមជួយពន្យល់ណែនាំដល់កុមារាកុមារីដែលជាសិស្សានុសិស្ស ឱ្យមានសីលធម៌ល្អ ចេះគោរពឱនលំទោនចំពោះចាស់ទុំ , បង្ហាញពីការធ្វើអនាម័យលាងដៃនឹងសាប៊ូ មុននឹងចាប់កាន់បរិភោគអាហារនំចំណី ជាពិសេសត្រូវលាងដៃឱ្យបានស្អាតក្រោយពីបន្ទោរបង់រួច , អានរឿងព្រេងនិទាន និងសួរសំនួរទាក់ទងទៅនឹងរឿងព្រេងបានដែលអានហើយ ដើម្បីបំផុសស្មារតីសិស្សឱ្យប្រុងស្មារតីចងចាំបានល្អនៅពេលកំពុងសិក្សា កុំឱ្យទំលាប់ងោកងុយ ។
លោក ញាណ តុលា បានឲ្យដឹងថា ក្នុងឱកាសនោះដែរ ក្រុមការងារបានផ្តាំផ្ញើឱ្យប្អូនៗ ក្មួយៗទាំងអស់គ្នាត្រូវខិតខំរៀនសូត្រ ដើម្បីប្រែក្លាយខ្លួនជាទំពាំងស្នងឬស្សីក្នុងការជួយស្តារ និងកសាងប្រទេសជាតិឱ្យបានរីកចម្រើនថ្កុំថ្កើងថែមទៀត ព្រមទាំងបានជំរុញ និងអំពាវនាវដល់សិស្សានុសិស្ស និងអាណាព្យាបាលមាតាបិតា ត្រូវបញ្ជូនកូនចៅឱ្យមករៀនសូត្រឱ្យបានគ្រប់ៗគ្នា ដាស់តឿននិងជំរុញបុត្រធីតារបស់ខ្លួនឱ្យខិតខំរៀនសូត្រ ស្តាប់លោកគ្រូអ្នកគ្រូពន្យល់ មករៀនឱ្យបានទាន់ពេលវេលា យកចិត្តទុកដាក់ថែរក្សាអនាម័យដោយត្រូវលាងសំអាតដៃជាមួយសាប៊ូក្រោយពេលបន្ទោរបង់និងមុនពេលចាប់កាន់ចំណីអាហារបរិភោគ។
ព័ត៌មានជាតិ ថ្មីៗ
លោក ញាណ តុលា បានឲ្យដឹងបន្ថែមថា ក្រុមនេះតែងតែធ្វើការងារសង្គមក្នុងមួយខែមួយដង ដូចជាខែខ្លះជួយទៅលើសម្ភារសិក្សាដល់សិស្ស ខែខ្លះជួយសាងសង់ផ្ទះដល់ទុរគតជន តាមការឯកភាពសហការ និងចង្អុលបង្ហាញពីអាជ្ញាធរមូលដ្ឋានថា ពិតជាក្រីក្រមែន និងខែខ្លះរួមគ្នាដាំកូនឈើ ដែលសកម្មភាពទាំងនេះ កើតឡើងពីការស្ម័គ្រចិត្ត និងការលះបង់ទាំងពេលវេលាពីក្រុមការងារ ពោលគឺធ្វើទៅតាមលទ្ឋភាពថវិកាដែលអាចធ្វើបាន។
លោក ញាណ តុលា បានរំលឹកផងដែរថា ក្រុមរួមគ្នាដើម្បីការងារសង្គម ត្រូវបានបង្កើតរយៈពេល៣ឆ្នាំមកហើយ ជាក្រុមមួយនឹងការកើតចេញពីការចូលរួមគ្នាដោយស្ម័គ្រចិត្ត ពីសំណាក់ក្រុមយុវជនគ្រប់ ទិសទី ដោយអ្នកខ្លះជានិស្សិត អ្នកខ្លះប្រកបកិច្ចការរកស៊ី ឆ្លៀតពេលទំនេរពីការងារ និងការសិក្សារបស់ខ្លួន បានស្ម័គ្រចិត្ត មករួមចំណែកក្នុងសកម្មភាពសង្គមជាមួយគ្នា ហើយក៏បានបង្កើតចេញជារូបរាងនូវក្រុមការងារនេះឡើង ក្នុងគោលបំណងចូលរួមចំណែកជួយដល់កិច្ចការងារសង្គមលើការងារមួយចំនួនមានជាអាទិ៍៖ ការងារមនុស្សធម៌ ការជួយអប់រំសីលធម៌ដល់សិស្សានុសិស្សនៅតាមសាលាមួយចំនួន និងតែងតែចូលរួមក្នុងការងារបរិស្ថានជា និច្ច ដែលក្នុងរយៈពេល៣ឆ្នាំកន្លងមកនេះ បានចែកសម្ភារ សិក្សាដល់សិស្សានុសិស្សប្រមាណជា៥ពាន់នាក់ ដល់សិស្សនៅសាលា បឋមសិក្សាចំនួន១០ស្ថិតក្នុងស្រុកអង្គរជុំ ស្រុកពួក និងស្រុកជីក្រែង , បានសាងសង់ផ្ទះហៅថាផ្ទះរួមមិត្ត ជូនទុរគតជនចំនួន២ខ្នងនៅស្រុកអង្គរជុំ និងស្រុកពួក អស់ថវិកា២.១០០ដុល្លារ ហើយរាល់ថវិកានិងជំនួយនៃការរៀបចំគ្រប់កម្មវិធីទាំងអស់នេះ គឺបានមកអំពីការចូលរួមបរិច្ចាគពីសំណាក់ព្រះសង្ឃ ឯកឧត្តម លោកជំទាវ លោកលោកស្រី ជាសប្បុរសជនក្នុង និង ក្រៅប្រទេស ក្រុមហ៊ុននានា ដែលបានលះបង់នូវថវិកាផ្ទាល់ខ្លួនចូលរួមគាំទ្រដល់សកម្មភាពការងាររបស់ក្រុមនេះ ឲ្យមានដំណើរទៅមុខដោយរលូនរហូតមកដល់បច្ចប្បន្ន ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
