លោក ក្រុស សារ៉ាត់ ប្រធានមន្ទីរសុខាភិបាលខេត្ដសៀមរាប បានមានប្រសាសន៍ថា ក្រុមគ្រូពេទ្យមនុស្សធម៌របស់ក្រុមគ្រូពេទ្យរ៉ូតារីអង្គរនៃប្រទេសចិននិងមន្ទីរពេទ្យShow Chan Memorial hospital មានចំនួន១៦នាក់ បានធ្វើការពិនិត្យនិងព្យាបាលរោគដោយមិនគិតថ្លៃ ក្នុងរយៈពេលពីរថ្ងៃ ចាប់ពីថ្ងៃទី០៦ដល់ថ្ងៃទី០៧ខែតុលា ឆ្នាំ២០១៩នេះ ដោយសហការជាមួយមន្ទីរសុខាភិបាលខេត្ដ និងមណ្ឌលសុខភាពស្រុកបន្ទាយស្រី ដែលការព្យាបាលនេះជាប្រភេទជំងឺទូទៅ ក្នុងនោះមានពិនិត្យអេកូ ផងដែរ ហើយក្នុងរយៈពេលពីរថ្ងៃនេះ ត្រូវបានកំណត់ឲ្យប្រជាពលរដ្ឋទាំងក្មេងទាំងចាស់ មកទទួលសេវាប្រមាណ៥០០នាក់ ប៉ុន្តែចំពោះជំងឺពលរដ្ឋធ្ងន់ធ្ងរ ក្រុមគ្រូពេទ្យនឹងយកពួកគាត់ទៅបន្ដព្យាបាលនៅមន្ទីរពេទ្យផ្សេងទៀត ដែលមានរថយន្ដចាំទទួលជាស្រេច ។
លោក ក្រុស សារ៉ាត់ មានប្រសាសន៍ទៀតថា ជាមួយគ្នានេះដែរ ក្រុមគ្រូពេទ្យមនុស្សធម៌រ៉ូតារីអង្គរ ក៏បានផ្ដល់អង្ករចំនួន៥០០គីឡូក្រាម និងសម្ភារជាច្រើនទៀត ជូនប្រជាពលរដ្ឋដែលកំពុងជួបការខ្វះខាត ក្នុងនោះក៏មានការផ្ដល់ជូនសម្លៀកបំពាក់សិស្សានុសិស្សក្រីក្រផងដែរ ខណៈដែលសកម្មភាពមនុស្សធម៌នេះ បានធ្វើឡើងជាច្រើនលើកមកហើយ នៅតាមបណ្ដាឃុំ និងស្រុកនៃខេត្ដសៀមរាប បើទោះបីមានមណ្ឌលសុខភាពនៅមូលដ្ឋានផ្តល់សេវាសុខាភិបាលជូនប្រជាពលរដ្ឋជាប្រចាំក៏ដោយ ក៏ការចុះមកជួយពិនិត្យ និងព្យាបាល្រជាពលរដ្ឋរបស់ក្រុមគ្រូពេទ្យស្ម័គ្រចិត្តនាពេលនេះ អាចជួយកាត់បន្ថយការចំណាយ និងពេលវេលា នៅពេលពួកគាត់ទៅព្យាបាលនៅកន្លែងផ្សេង ។
លោក ក្រុស សារ៉ាត់ មានប្រសាសន៍បន្ថែមទៀតថា ទោះជាយ៉ាងនេះក្ដី នៅក្នុងឱកាសនេះ សូមអំពាវនាវដល់ប្រជាពលរដ្ឋទាំងអស់ ឲ្យមានការប្រុងប្រយ័ត្នពីការកើតជំងឺផ្សេងៗផងដែរ ដោយសារតែរដូវនេះជារដូវទឹកជំនន់ ត្រូវចេះថែទាំសុខភាពប្រចាំ និងត្រូវប្រុងប្រយ័ត្ន ចំពោះការហូបចំណីអាហារ ដោយផ្តោតសំខាន់លើការហូបស្អាត រស់នៅស្អាត ដើម្បីជៀសវាងការមានជំងឺផ្សេងៗ ។
ព័ត៌មានជាតិ ថ្មីៗ
អ្នកស្រី អាណា តំណាងក្រុមគ្រូពេទ្យមនុស្សធម៌របស់ក្រុមគ្រូពេទ្យរ៉ូតារីអង្គ បានមានប្រសាសន៍ថា ការចុះជួយពិនិត្យទៅលើសុខភាពលរដ្ឋខ្មែរនេះ គឺដោយសារពួកគាត់ស្រឡាញ់ប្រទេសកម្ពុជា ហើយធ្វើឡើងជាច្រើនឆ្នាំមកហើយ ។
បើតាមប្រសាសន៍របស់ ប្រជាពលរដ្ឋដែលបានមកទទួលការពិនិត្យនិងព្យាបាលជំងឺក្នុងឱកាសនេះ បានថ្លែងនួវអំណរគុណដល់ក្រុមគ្រូពេទ្យស្ម័គចិត្ដ និង មន្ទីរសុខាភិបាលខេត្ដសៀមរាប ព្រមទាំងអាជ្ញាធរមូលដ្ឋាន ដែលបានចុះពិនិត្យ និងព្យាបាលជំងឺពួកគាត់ដោយមិនគិតថ្លៃ ព្រោះការព្យាបាល និងពិនិត្យរោគនេះ មិនបានធ្វើឲ្យពួកគាត់ចំណាយថវិកាទៅកាន់មណ្ឌលសុខភាព និងមន្ទីរពេទ្យបង្អែកខេត្ដ ជាពិសេសជំងឺកុមារ ៕
អត្ថបទ ៖ លោក បូ សាវី
រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
