ក្រុមហ៊ុន Seenu Gnanam Travels សហការជាមួយមន្ទីរវប្បធម៌និងវិចិត្រសិល្បៈខេត្តសៀមរាប បានរៀបចំពិធីបុណ្យរបាំប្រពៃណីផ្លាស់ប្តូរវប្បធម៌រវាងប្រទេសកម្ពុជា និង ប្រទេសឥណ្ឌា ដែលជារបាំ Bharatanatyam អន្តរជាតិ ក្នុងរយ:ពេលពីរថ្ងៃ គឺនៅថ្ងៃទី០៥ និង ថ្ងៃទី០៦ ខែតុលា ឆ្នាំ២០១៩នេះ នៅទីលានជល់ដំរី នៃបរិវេណប្រាសាទបាយ័ន និង សណ្ឋាគារអេរ៉ាអង្គរ ខេត្តសៀមរាប ក្រោមអធិបតីភាពឯកឧត្តម រឿង ឈៀង ទីប្រឹក្សាក្រសួងវប្បធម៌ និងវិចិត្រសិល្បៈ និងជាស្ត្រាចារ្យផ្នែករបាំ នៃប្រទេសកម្ពុជា និង លោកជំទាវ រស់ យ៉ារ៉ាន់ សាស្ត្រាចារ្យផ្នែករបាំ នៃប្រទេសកម្ពុជា ដោយមានការចូលរួមពីសំណាក់លោក លោកស្រី លោកគ្រូ អ្នកគ្រូ សិល្បករ សិល្បៈការនីជាតិ និង អន្តរជាតិ។
លោក មួន សុភាព ប្រធានមន្ទីរវប្បធម៌និងវិចិត្រសិល្បៈខេត្តសៀមរាប មានប្រសាសន៍ថា កម្ពុជានិងឥណ្ឌាមានទំនាក់ទងជាប្រវត្តិសាស្ត្រយូរលង់ណាស់មកហើយ និងបានភ្ជាប់ចំណងទំនាក់ទំនងកាទូតឡើងវិញចាប់តាំងពីឆ្នាំ១៩៥២ មកម្ល៉េះ ខណៈដែលចំណងវប្បធម៌ប្រទេសទាំងពីរបានចាប់ផ្តើមតាំងពីសម័យហ្វូណន មក ហើយទំនាក់ទំនងជិតស្និទ្ធរវាងឥណ្ឌា និងកម្ពុជា បានបង្កើនកិច្ចសហប្រតិបត្តិការទ្វេរភាគីលើគ្រប់វិស័យទាំងនយោបាយ ការបរទេស សេដ្ឋកិច្ច ពាណិជ្ជកម្ម សន្តិសុខការពារជាតិ មានការរីក ចម្រើនយ៉ាងខ្លាំងក្លា ហើយការសម្ដែងនាពេលនេះ គឺជាកិច្ចសហប្រតិបត្តិការលើកទី០៣ហើយ រវាងមន្ទីរវប្បធម៌ និង វិចិត្រសិល្បៈខេត្តសៀមរាប ជាមួយសិល្បៈករមកពីវិទ្យាស្ថានសិល្បៈ Bharatanatyam នៃប្រទេសឥណ្ឌា បានសម្តែងរបាំរួមគ្នា ដែលជាកាផ្តួចផ្តើមឡើងដោយក្រុមហ៊ុន Seenu Granam Travels ប្រចាំខេត្តសៀមរាប ។
លោក មួន សុភាព មានប្រសាសន៍ទៀតថា នៅពេលប្រទេសកម្ពុជាស្ថិតក្នុងដំណាក់កាលដ៏លំបាកបន្ទាប់ពីរបបប្រល័យពូជសាសន៍ ប៉ុល ពត ប្រទេសឥណ្ឌា គឺជាប្រទេសប្រជាធិបតេយ្យដំបូងដែលបានលូកដៃផ្តល់ជំនួយដល់កម្ពុជាផងដែរ ក្រៅពីនោះនៅមានទទួលឥទ្ធិពលពីឥណ្ឌានូវទំនៀមទម្លាប់មួយចំនួនទៀត ដែលដូនតាខ្មែរបានច្នៃប្រឌិតមកជាអត្តសញ្ញាណរបស់ខ្លួនរហូតដល់បច្ចុប្បន្ន ហើយប្រទេសឥណ្ឌាក៏ធ្លាប់បានជួយឧបត្ថមគាំទ្រដល់ប្រទេសកម្ពុជា ក្នុងវិស័យវប្បធម៌ជាច្រើន ដូចជាកាជួយជួសជុសប្រាសាទមួយចំនួន ពិសេសក៏ធ្លាប់បានជួយជួលជុសប្រាសាទអង្គរវត្តជាដើម៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
