នៅរសៀលថ្ងៃទី៤ ខែ តុលា ឆ្នាំ២០១៩ម្សិលមិញនេះ លោក ឃឹម ហ្វីណង់ ត្រូវបានប្រកាសទទួលមុខតំណែងជាអភិបាលស្រុកបន្ទាយស្រីថ្មី ជំនួសលោក ណុប វុធ្ឋី ដែលត្រូវបានផ្ទេរភារកិច្ច ទៅបម្រើការងារនៅសាលាខេត្តសៀមរាប។
អញ្ជើញជាអធិបតី ក្នុងពិធីនេះ ឯកឧត្តម ទៀ សីហា អភិបាលខេត្តសៀមរាប ការចូលកាន់មុខតំណែង និងផ្ទេរភារកិច្ចនេះ គឺជាគោលការណ៍របស់រាជរដ្ឋាភិបាល ក្នុងការរៀបចំនូវរចនាសម្ព័ន្ធក្បាលម៉ាស៊ីនដឹកនាំថ្នាក់ក្រោមជាតិ ដើម្បីឆ្ពោះទៅរកកិច្ចអភិវឌ្ឍន៍មូលដ្ឋានភូមិឃុំ សំដៅបម្រើដល់តម្រូវការផលប្រយោជន៍របស់ប្រជាពលរដ្ឋនៅតាមមូលដ្ឋាន។
ឯកឧត្តម ទៀ សីហា បានថ្លែងកោតសរសើរ ដល់អាជ្ញាធរស្រុកនាពេលកន្លងមក ដែលបានបង្កើតនូវសមទ្ធិផលជាដើម្បីអភិវឌ្ឍន៍នៅក្នុងមូលដ្ឋានស្រុកបន្ទាយស្រីនេះ ទន្ទឹមនោះ ការអភិវឌ្ឍនេះ អាចកើតឡើងបានអាស្រ័យប្រទេសជាតិមានសុខសន្តិភាព និង ការដឹកនាំដ៏ឈ្លាសវៃ របស់សម្តេចអគ្គមហាសេនាបតីតេជោ ហ៊ុន សែន។
ព័ត៌មានជាតិ ថ្មីៗ
ជាមួយនោះដែរ ឯកឧត្តមអភិបាលខេត្ត បានជំរុញ ឱ្យមន្ត្រីទាំងអស់ពង្រឹងសមត្ថភាព និងគុណភាព តាមរយៈផ្តល់ការបណ្តុះបណ្តាលផ្ទាល់នៅថ្នាក់មូលដ្ឋាន ដើម្បីជាចំណេះដឹងបន្ថែម ក្នុងការបំពេញការងាររដ្ឋបាលនៅមូលដ្ឋានប្រកបដោយគុណភាព។ ដោយឡែក ការងារសន្តិសុខ រួមទាំងការទប់ស្កាត់រាល់បទល្មើសផ្សេងៗ អភិបាលស្រុកថ្មី ត្រូវយកចិត្តទុកដាក់បន្ថែមទៀត និងមានសាមគ្គីភាពផ្ទៃក្នុង រវាងគណៈអភិបាលស្រុកជាមួយ មន្ត្រីរាជការ លើការដឹកនាំ គ្រប់គ្រង ពង្រឹងនូវរបៀបរបបការងាររដ្ឋបាល នៅក្នុងសាលាស្រុក ដើម្បីផ្តល់សេវាសាធារណៈជូនប្រជាពលរដ្ឋក្នុងមូលដ្ឋាន ដោយតម្លាភាព គណនេយ្យភាពលឿនរហ័ស និងមានប្រសិទ្ឋភាព។
សូមជម្រាបថា ស្រុកបន្ទាយស្រី មានប្រាសាទបន្ទាយស្រី រមណីដ្ឋានក្បាលស្ពាន ជាពិសេស រមណីយដ្ឋានធម្មជាតិ និងប្រវត្តិសាស្ត្រដ៏ល្បី នៃឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ដែលសំបូរទៅដោយប្រាសាទ ទឹកធ្លាក់ ជ្រលងភ្នំ -ល- ប៉ុន្តែព្រៃឈើនៅក្នុងឧទ្យានជាតិមួយនេះ ត្រូវបានកាប់បំផ្លាញជាបន្តបន្ទាប់ ដែលបានធ្វើឲ្យប៉ះពាល់យ៉ាងខ្លាំងទៅដល់ប្រព័ន្ធជីវចម្រុះ និងវិស័យទេសចរណ៍ក្នុងរមណីដ្ឋានមួយនេះ។ ក្នុងនោះ តំបន់ទេសចរណ៍ក្នុងស្រុកមួយនេះ គឺជាផ្នែកមួយដ៏សំខាន់មួយផងដែរ ដែលបានទាក់ទាញភ្ញៀវទេសចរជាតិ និងអន្តរជាតិមកទស្សនា និងស្នាក់នៅ ក្រៅពីប្រាសាទអង្គរវត្ត។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
