នៅព្រឹកថ្ងៃទី០៤ ខែតុលា ឆ្នាំ២០១៩នេះ ក្រសួងទេសចរណ៍ បានរៀបចំសិក្ខាសាលាពិគ្រោះយោបល់លើកទី២ ស្តីពី “ការរៀបចំ ផែនការមេអភិវឌ្ឍន៍វិស័យទេសចរណ៍ខេត្តសៀមរាប” ក្រោមប្រធានបទ “យុទ្ធសាស្ត្រទាក់ទាញទេសចរណ៍ តាមរយៈនៃការបត់បែនតាមទីផ្សារទេសចរណ៍” នៅសណ្ឋាគារសុខាល័យ ក្រុងសៀមរាប។
នាពេលកន្លងមក រាជរដ្ឋាភិបាលកម្ពុជា បានសម្រេចបង្កើតគណៈកម្មការអន្តរក្រសួង ដើម្បីរៀបចំផែនការមេអភិវឌ្ឍន៍វិស័យទេសចរណ៍នៅខេត្តសៀមរាប ដោយមានក្រសួងទេសចរណ៍ជាស្ថាប័នដឹកនាំ និងមានសមាសភាពចូលរួមពីក្រសួង-ស្ថាប័ន-អាជ្ញាធរពាក់ព័ន្ធ រដ្ឋបាលខេត្តសៀមរាប ដៃគូសហការ ព្រមទាំងសាកលវិទ្យាល័យទូលូរបស់បារាំង ដែលជំនាញខាងសិក្សារៀបចំផែននការមេផងដែរ។
ដូច្នេះ ដើម្បីជំរុញឲ្យវិស័យទេសចរណ៍ខេត្តសៀមរាប មានការអភិវឌ្ឍប្រកបដោយចីរភាព គឺទាមទារចាំបាច់ត្រូវមានការរៀបចំផែនការមេមួយឲ្យបានត្រឹមត្រូវ និងគ្រប់ជ្រុងជ្រោយ ព្រមទាំងមានការទទួលខុសត្រូវខ្ពស់ផងដែរ
ថ្លែងបើកដំណើការអង្គសិក្ខាសាលានោះ ឯកឧត្តម ណេប សាមុត អគ្គនាយកគ្រប់គ្រងឧស្សាហកម្មទេសចរណ៍ និងជាប្រធានលេខាធិការដ្ឋានអន្តរក្រសួង បានឲ្យដឹងថា ៖ ដើម្បីបង្កើតបានជាផែនការមេខាងលើ ក្រុមការងារលេខាធិការដ្ឋាន នៃគណៈកម្មការអន្តរក្រសួង អគ្គនាយកដ្ឋានគ្រប់គ្រងឧស្សាហកម្មទេសចរណ៍ និងអ្នកជំនាញការអន្តរជាតិ បានចុះសិក្សាស្រាវជ្រាវយ៉ាងហ្មត់ចត់ចំនួនបួនវគ្គរួចមកហើយនៅក្នុងខេត្តសៀមរាប គឺចាប់ពីខែឧសភា ដល់ខែកញ្ញាឆ្នាំ២០១៩ ដោយក្រុមការងារបានចុះស្ទង់មតិផ្ទាល់ជាមួយភ្ញៀវបរទេសនៅព្រលានយន្តហោះ និងនៅតំបន់រមណីយដ្ឋានអង្គរ ចុះសម្ភាសន៍ជាមួយក្រុមអាជីវករទេសចរណ៍មួយចំនួន ព្រមទាំងបានចុះទៅសិក្សានៅតាមតំបន់គោលដៅទេសចរណ៍សំខាន់ៗនៅក្នុងខេត្តដូចជា ក្នុងក្រុងសៀមរាប តំបន់ឧទ្យានជាតិភ្នំគូលែន តំបន់បឹងទន្លេសាប-ល- ព្រមទាំងបានជួបពិភាក្សាជាមួយរដ្ឋបាលខេត្ត អាជ្ញាធរជាតិអប្សរា និងមន្ទីរ-អង្គភាពជំនាញមួយចំនួនក្នុងខេត្តសៀមរាប។
សូមជម្រាបថា បន្ទាប់ពីធ្វើការសិក្សា គម្រោងរៀបចំផែនការមេអភិវឌ្ឍន៍វិស័យទេសចរណ៍ខេត្តសៀមរាប នៅក្នុងប្រទេសកម្ពុជារួច គណៈកម្មការអន្តរក្រសួង នឹងបន្តយកទៅគម្រោងផែនការមេនេះ ទៅពិភាក្សាបន្តនៅបារាំងបន្ថែមទៀត។
គួររំលឹកថា សិក្ខាសាលាពិគ្រោះយោបល់លើកទី១ ស្តីពីការរៀបចំផែនការមេអភិវឌ្ឍន៍វិស័យទេសចរណ៍ខេត្តសៀមរាប ត្រូវបានបិទញ្ចប់នៅថ្ងៃទី១១ ខែកក្កដា ឆ្នាំ២០១៩ ដោយសិក្សាលើការបង្កើតផលិតផលទេសចរណ៍ថ្មីៗ លើសពីអ្វីមានស្រាប់នៅតំបន់អង្គរវត្ត សិក្សាលើការអភិវឌ្ឍ និងពង្រីកប្រព័ន្ធហេដ្ឋារចនាសម្ព័ន្ធនានា សាងសង់ព្រលានយន្តហោះអន្តរជាតិថ្មីដែលធំជាងមុន ដើម្បីតភ្ជាប់ខេត្តសៀមរាបជាមួយរាជធានីភ្នំពេញ សៀមរាបជាមួយតំបន់ឆ្នេរសមុទ្រ សៀមរាបជាមួយតំបន់ភាគឦសាន សៀមរាបជាមួយតំបន់ព្រំដែន ក៏ដូចជាសៀមរាបជាមួយអន្តរជាតិផងដែរ។
អត្ថបទ និង រូបថត ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក សេង ផល្លី
