កាលពីវេលាម៉ោងប្រហែលជាង០២ ទាបភ្លឺ ថ្ងៃទី០៧ ខែតុលា ឆ្នាំ២០១៩ នៅចំណុចខាងត្បូងរង្វង់មូលវត្តដំណាក់ ភូមិវត្តដំណាក់ សង្កាត់សាលាកំរើក ក្រុងសៀមរាប កំលាំងនាយកដ្ឋាននគរបាលព្រហ្មទណ្ឌ សហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល និងកម្លាំងអធិការដ្ឋាននគរបាលក្រុងសៀមរាប បានធ្វើការឃាត់ខ្លួនជនសង្ស័យចំនួន០២នាក់ ដែលជាមុខសញ្ញាលួចកាច់សោរកម៉ូតូដែលកំពុងជិះម៉ូតូឆ្វែលបំរ៉ុងធ្វើសកម្មភាពកាច់សោរកម៉ូតូ៖
-ទី១.ឈ្មោះ អុល រ៉ាត់ ហៅក្រៅអាញ៉ា ភេទប្រុស អាយុ៣៥ឆ្នាំ មុខរបរពុំពិតប្រាកដ ស្រុកកំណើតភូមិបឹងដូនប៉ា ឃុំស្លក្រាម ក្រុងសៀមរាប
-ទី២.ឈ្មោះ ហាច ហ៊ូន ហៅហ៊ូន ភេទប្រុស អាយុ៤៣ឆ្នាំ មុខរបរពុំពិតប្រាកដ ស្រុកកំណើតភូមិរោងគោ ឃុំស្រណាល ស្រុកក្រឡាញ់ ខេត្តសៀមរាប។
វេលាម៉ោងប្រហែលជាងពីរទាបភ្លឺ ថ្ងៃទី០៧ ខែតុលា ឆ្នាំ២០១៩ អ្នកទាំងពីរបានជិះម៉ូតូម៉ាកហុងដាឌ្រីម សេរីឆ្នាំ២០១៩ ពណ៌ខ្មៅ ពាក់ស្លាកលេខកំពង់ចាម១W៣៦២១ បំរ៉ុងធ្វើសកម្មភាពលួចកាច់សោរកម៉ូតូបន្ត តែត្រូវកម្លាំងសមត្ថកិច្ចឃាត់ខ្លួនបានតែម្តង។
វត្ថុតាងរួមមាន៖
-.ម៉ូតូ០១គ្រឿងម៉ាកហុងដាឌ្រីមសេ១២៥ សេរីឆ្នាំ២០១៩ ពណ៌ខ្មៅ ពាក់ស្លាកលេខកំពង់ចាម១W ៣៦២១
-.កាំភ្លើងខ្លីម៉ាកK៥៤
-.ក្បាលគ្រាប់សោរកាច់កម៉ូតូ០៣គ្រាប់ និងដងកាច់សោរ០២
-.សោរម៉ាឡែតលេខ៨ ០១
-.សោរកំប្ល៉េរមួយឈុត
-.បារឡុងសំរាប់មួរស្លាកលេខម៉ូតូ០៤គ្រាប់
-.កាំបិតឆ្នៃឆ្កឹះសោរ០៣
-.ម្ចុលខ្ទាស់សំរាប់តខ្សែភ្លើង០៥
-.គ្រាប់ឆក់សំរាប់បើកគំរបសោរម៉ូតូ០៣គ្រាប់
-ទួរឡឺវីស ០១
-.សៀវភៅកត់លេខទូរស័ព្ទ ០១
-.ផ្លែឡាមសំរាប់ជៀខ្សែភ្លើង ០១
-.កូនកាបូបដាក់លុយ ០១។
តាមចម្លើយសារភាពរបស់ឈ្មោះ អុល រ៉ាត់ ៖ខ្លួនធ្លាប់ពន្ធនាគារពីបទលួច(ម៉ូទ័បូមទឹក) ហើយចេញពីពន្ធនាគារក្នុងឆ្នាំ២០១៥។ ក្រោយមកខ្លួនបានធ្វើស្គាល់ឈ្មោះ វ៉ា ភេទប្រុស អាយុប្រហែល៤០ឆ្នាំ ហើយឈ្មោះ វ៉ា បានអោយខ្លួនដើរលួចម៉ូតូកាច់សោរកម៉ូតូ យកទៅលក់អោយខ្លួនហើយឈ្មោះ វ៉ា ថែមទាំងបានអោយសម្ភារះមួយចំនួនសំរាប់ធ្វើសកម្មភាពលួចកាច់សោរកម៉ូតូ កន្លងមកខ្លួនបានធ្វើសកម្មភាពលួចកាច់សោរកម៉ូតូក្នុងក្រុងសៀមរាបបានចំនួនប្រហែលប្រាំមួយគ្រឿង។
និងចម្លើយសារភាពរបស់ឈ្មោះ ហាច ហួន ៖ -ខ្លួនធ្លាប់ជាប់ពន្ធនាគារ ពីបទលួច(កាច់សោរកម៉ូតូ) ហើយចេញពីពន្ធនាគារ ខែសីហា ឆ្នាំ២០១៩។
– កាលពីថ្ងៃទី០៤ ខែតុលា ឆ្នាំ២០១៩ ២៣និង០០នាទី នៅចំណុចមុខវត្តកេសរ៉ារាម ភូមិតាភុល សង្កាត់ស្វាយដង្គំ ក្រុង/ខេត្តសៀមរាប ខ្លួននិងឈ្មោះ អុល រ៉ាត់ បានធ្វើសកម្មភាពកាច់សោរកម៉ូតូចំនួន០១គ្រឿងម៉ាកហុងដាZoomerX ពណ៌ក្រហម បិទស្គត់ខ្មៅ សេរីឆ្នាំ២០១៨ ហើយយកទៅលក់អោយឈ្មោះ វ៉ា បានតម្លៃ៥០០$។
-នៅថ្ងៃទី១០ ខែកញ្ញា ឆ្នាំ២០១៩ វេលាម៉ោង២៣និង៣០នាទី នៅចំណុចភូមិវត្តស្វាយ សង្កាត់សាលាកំរើក ក្រុង សៀមរាប ខ្លួននឹងបក្ខពួក បានធ្វើសកម្មភាពកាច់សោរកម៉ូតូ០១គ្រឿងម៉ាកហុងដាឃ្លីក ពណ៌សលាយខ្មៅ សេរីឆ្នាំ២០១៩។
-ជាក់ស្តែងនៅវេលាម៉ោងប្រហែលជាងពីរទាបភ្លឺ ថ្ងៃទី០៧ ខែតុលា ឆ្នាំ២០១៩ ខ្លួននិងឈ្មោះ អុល រ៉ាត់ បានជិះម៉ូតូម៉ាកហុងដាឌ្រីម សេរីឆ្នាំ២០១៩ ពណ៌ខ្មៅ បំរ៉ុងធ្វើសកម្មភាពលួចកាច់សោរកម៉ូតូបន្ត តែត្រូវកម្លាំងសមត្ថកិច្ចឃាត់ខ្លួនបានតែម្តង។
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក ហាំ ម៉េងហួត
