ដើម្បីអបអរសាទរខួបលើកទី១៥០ឆ្នាំ របស់មហាត្មៈគន្ធី (Mohatma Gandhi) សារមន្ទីរវាយនភណ្ឌប្រពៃណីអាស៊ីនឹងរៀបចំតាំងពិព័រណ៍ «ខាឌី-ផលិតផលសិប្បកម្មក្រណាត់ឥណ្ឌា” លើកទី១ ដោយសេរី ចាប់ពីម៉ោង៩ព្រឹក រហូតដល់ម៉ោង៧យប់ នាថ្ងៃទី១២-១៤ ខែតុលា ឆ្នាំ២០១៩ មានទីតាំងនៅផ្លូវ៦០ម៉ែត្រ ភូមិបឹងដូនប៉ា សង្កាត់ស្លក្រាម ក្រុងសៀមរាប៕។
លោកស្រីសាស្ត្រាចារ្យ អាចាណា សាសស្ទ្រី (Archana Shastri) ប្រធានសារមន្ទីរវាយនភណ្ឌប្រពៃណីអាស៊ីបានឱ្យដឹងថា ការរៀបចំតាំងពិព័រណ៍នេះ គឺដើម្បីរំលឹកខួប នៃការកើតរបស់ លោក មហាត្មៈគន្ធី (១៨៦៩- ១៩៤៨) ជាវីរៈបុរសឥណ្ឌារូបនេះ។
លោកស្រីសាស្ត្រាចារ្យបញ្ជាក់ថា លោក មហាត្មៈ គន្ធី គឺជាវីរៈបុរសបដិវត្តន៍អហិង្សារបស់ឥណ្ឌា ដែលព្រួយបារម្ភពីសេដ្ឋកិច្ចជាតិ ភាពក្រីក្រប្រជាជនឥណ្ឌា ការបាត់បង់របរប្រពៃណី ទេពកោសល្យក្នុងការផលិតសិប្បកម្មប្រពៃណី និងការបាត់បង់ការដាំដុះវត្ថុធាតុដើម ដោយសារគាបសង្កត់ពីពួកអាណានិគមអង់គ្លេស។
លោកស្រីសាស្ត្រាចារ្យ បន្ថែមថា ទស្សនៈសំខាន់របស់មហាត្មៈគន្ធី ទោះបីទៅដល់ទីណា កន្លែងណា សាសនាអ្វី វណ្ណៈអ្វីក៏ដោយ ស្លៀកសម្លៀកបំពាក់ដូចៗគ្នា នឹងធ្វើឱ្យប្រជាជនឥណ្ឌាមើលទៅមានភាពស្មើគ្នា ចេះសហការគ្នា និងបង្ហាញថានេះជាជនជាតិឥណ្ឌា។
ដូច្នេះហើយ ក្រណាត់ដែលផលិតដោយជនជាតិឥណ្ឌា គឺជាផ្នែកដ៏សំខាន់ក្នុងការបង្រួបបង្រួមប្រជាជនឥណ្ឌាឱ្យរក្សាបាននូវរបរប្រពៃណី វត្ថុធាតុដើមក្នុងការផលិតក្រណាត់ ការកសាងសេដ្ឋកិច្ចជាតិ និងការរើបម្រះពីអាណានិគមអង់គ្លេសផងដែរ។ ពិសេសគឺបានធ្វើប្រជាជនឥណ្ឌាឈប់ឱ្យតម្លៃលើផលិតផលបរទេស (អង់គ្លេស) ហើយងាកមកឱ្យតម្លៃលើផលិតផលក្នុងស្រុកវិញ និងរក្សាបាននូវអត្តសញ្ញាណជាតិ ឆ្លុះបញ្ចាំងពីខ្លួនឯងតាមរយៈការស្លៀកពាក់សម្លៀកបំពាក់នេះតែម្តង។
សូមបញ្ជាក់ថា ការរៀបចំពិធីតាំងពិព័រណ៍ «ខាឌី-ផលិតផលសិប្បកម្មក្រណាត់ឥណ្ឌា» នេះ នឹងបើកជូនសាធារណជនចូលទស្សនា សិក្សាស្វែងយល់ពីវប្បធម៌ឥណ្ឌា ដោយសេរី ចាប់ពីម៉ោង៩ព្រឹក រហូតដល់ម៉ោង៧យប់ នៅថ្ងៃទី១២-១៤ ខែតុលា ឆ្នាំ២០១៩ នៅសារមន្ទីរប្រពៃណីអាស៊ី មានទីតាំងនៅផ្លូវ៦០ម៉ែត្រ ភូមិបឹងដូនប៉ា សង្កាត់ស្លក្រាម ក្រុងសៀមរាប៕
អត្ថបទ និងរូបភាព៖ លោក ខេង ឧត្តម (អប្សរា)
កែសម្រួលអត្ថបទ៖ សេង ផល្លី
