ឯកឧត្តមបណ្ឌិត ប៉ូច ប៊ុណ្ណាក់ រដ្ឋលេខាធិការក្រសួងផែនការ មានប្រសាសន៍ថា គោលនយោបាយជាតិប្រជាជនឆ្នាំ ២០១៦-២០៣០ គឺជាការឆ្លើយតបទៅនឹងបម្រែបម្រួលសង្គម-សេដ្ឋកិច្ច និង សង្គមប្រជាសាស្ត្រ ដែលកម្ពុជាបាននឹងកំពុងឆ្លងកាត់សំដៅធានាឲ្យបានការអភិវឌ្ឍសេដ្ឋកិច្ច-សង្គមកិច្ច ដែលកម្ពុជាបាននឹងកំពុងឆ្លងកាត់ និង មានសន្ទុះលឿនជាងមុនប្រកបដោយចីរភាព កាត់បន្ថយភាពក្រីក្រ និង ធ្វើឲ្យប្រសើរឡើង គុណភាពជីវិតប្រជាជន ព្រោះប្រជាជន គឺជាមធ្យោបាយនៃការអភិវឌ្ឍ និង ជាគោលដៅចុងក្រោយនៃការអភិវឌ្ឍ ហើយប្រជាជនវ័យចាស់នៅកម្ពុជា គឺជាការបង្ហាញភាពចាំបាច់ ក្នុងការធានាឲ្យមានការធ្វើផែនការអភិវឌ្ឍ មានលក្ខណៈគ្របដណ្តប់និងគ្រប់ជ្រុងជ្រោយ តាមរយៈនៃការគិតគូរនិងបញ្ចូលកត្តាឌីណាមិកប្រជាសាស្ត្រ ដែលកំពុងកើតមាននាពេលបច្ចុប្បន្ន និងដែលកំពុងបន្តកើតមាននាពេលអនាគត ទៅក្នុងការធ្វើផែនការ ដោយគិតគូរដល់ទំនាក់ទំនងពហុវិស័យ រវាងបញ្ហាប្រជាជននិងការអភិវឌ្ឍ ការរក្សាតម្លៃវប្បធម៌និងប្រពៃណី និង ការធានាដល់ការគោរពសិទ្ធិមនុស្សជាមូលដ្ឋាន ។
ឯកឧត្តមបណ្ឌិត ប៉ូច ប៊ុណ្ណាក់ មានប្រសាសន៍ទៀតថា ដំណើរឆ្ពោះទៅរកប្រជាជនវ័យចាស់ គឺជាបាតុភូតប្រជាសាស្ត្រមួយដែលប្រទេសអភិវឌ្ឍលើពិភពលោកបានឆ្លងកាត់ ហើយដែលប្រទេសកំពុងអភិវឌ្ឍជាច្រើន បានចាប់ផ្តើមជួបប្រទះ រួមទាំងប្រទេសកម្ពុជាផងដែរ ដូច្នេះដំណើរឆ្ពោះទៅរកប្រជាជនវ័យចាស់ គឺជាការប្រែប្រួលប្រជាសាស្ត្រ នាចុងអន្តរកាលប្រជាសាស្ត្រ ដែលសមមាត្រប្រជាជនវ័យចាស់ អាយុ ៦០ ឆ្នាំ ឡើងទៅ កើនឡើងយ៉ាងលឿន នៅពេលដែលប្រជាជនក្នុងវ័យកំពុងធ្វើការងារបច្ចុប្បន្នចាប់ផ្តើមចូលនិវត្តន៍ គួបផ្សំនឹងការដែលមានកូនតិច និង ការកើនឡើងនៃអាយុកាលសង្ឃឹមរស់ ។
ឯកឧត្តមបណ្ឌិត ប៉ូច ប៊ុណ្ណាក់ បានលើកឡើងយ៉ាងដូច្នេះ ក្នុងសេចក្តីថ្លែងសន្ទរកថា បើកដំណើការអង្គសិក្ខាសាលាផ្សព្វផ្សាយ ជម្រុញការអនុវត្តគោលនយោបាយជាតិប្រជាជន ២០១៦-២០៣០ ក្នុងក្របខ័ណ្ឌគោលដៅ អភិវឌ្ឍប្រកបដោយចិរភាពកម្ពុជា ក្រោមប្រធានបទ ប្រជាជនវ័យចាស់នៅកម្ពុជា ដែលបានប្រារព្ធឡើងនៅសាលប្រជុំសាលាខេត្តសៀមរាប នាព្រឹកថ្ងៃទី១៧ ខែតុលា ឆ្នាំ២០១៨នេះ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លីវ សាន្ត
