នៅថ្ងៃទី១៥ ខែតុលា ឆ្នាំ២០១៩នេះ អាជ្ញាធរខេត្តសៀមរាប បានរៀបចំពិធីគោរពព្រះវិញ្ញាណក្ខន្ធព្រះករុណា ព្រះបាទសម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យជាតិ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ គម្រប់ខួប៧ឆ្នាំ នៃការសោយទីវង្គតរបស់ព្រះអង្គ នៅព្រះរាជដំណាក់ក្នុងក្រុងសៀមរាប ក្រោមអធិបតីភាពឯកឧត្ដម អ៊ឹង ហឿន ប្រធានក្រុមប្រឹក្សាខេត្ត និង ឯកឧត្ដម ទៀ សីហា អភិបាលខេត្ត ដោយមានការចូលរួមពីសំណាក់ឯកឧត្តម លោកជំទាវ លោក លោកស្រី ជាសមាជិកក្រុមប្រឹក្សាខេត្ត , អភិបាលរងខេត្ត , ថ្នាក់ដឹកនាំគ្រប់មន្ទីរ អង្គភាពទាំងអស់ក្នុងខេត្ត , មន្ត្រីអ្នកមុខអ្នកការ , កងកម្លាំងប្រដាប់អាវុធទាំងបីប្រភេទក្នុងខេត្ត និង សហភាពសហព័ន្ធយុវជនកម្ពុជាខេត្ត ដើម្បីបង្ហាញនូវសេចក្តីគោរពស្រឡាញ់ លើសពីជីវិតដែលពោរពេញទៅដោយភក្ដីភាពដ៏ជ្រាលជ្រៅមិនអាចកាត់ថ្លៃបានរបស់ប្រជារាស្ត្ររបស់ព្រះអង្គ និង រំលឹកនូវគុណូបការៈគុណរបស់ព្រះបរមរតនកោដ្ឋ ដែលបានបន្សល់ទុកនូវស្នាព្រះហស្ដ នៃអង្គសម្តេចឪ សម្តេចតា សម្តេចតាទួត ដែលជាពិសេសនោះ គឺជោគជ័យនៃកម្ពុជាក្នុងការដណ្តើមយកឯករាជ្យជាតិ ពីអាណានិគមនិយមបារាំងសេសនាឆ្នាំ១៩៥១ និង ការទាមទានូវប្រាសាទព្រះវិហារខ្មែរមកវិញពីសំណាក់សៀមឈ្លានពាននាឆ្នាំ១៩៦២ ការបង្រួបបង្រួមផ្សះផ្សាជាតិ និង សមទ្ធិផលធំៗជាច្រើនផងដែរ ។
តាមរយៈបណ្ដាញទំនាក់ទំនងសង្គមផ្លូវការរបស់ឯកឧត្ដម ទៀ សីហា អភិបាលខេត្តសៀមរាប ឯកឧត្ដមបានមានប្រសាសន៍ថា ខ្ញុំព្រះករុណា ទូលព្រះបង្គំខ្ញុំ ព្រមទាំងក្រុមប្រឹក្សាខេត្ត គណៈអភិបាលខេត្ត មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តសៀមរាប សូមគោរពលំឱនកាយ លើកហត្ថាប្រណមចូលរួមគោរពវិញ្ញាណក្ខន្ធ ព្រះករុណាព្រះបាទ សម្តេចព្រះនរោត្តមសីហនុ ព្រះមហាវីរៈក្សត្រ ព្រះវររាជបិតាជាតិខ្មែរ ឯករាជ្យ បូរណភាពទឹកដី និងឯកភាពជាតិខ្មែរ សូមសំដែងនូវការដឹងគុណ ចងចាំជានិច្ច និងស្ញើចសរសើរ អំពីស្នាព្រះហស្ថ នៃគំរូវីរភាពរបស់ព្រះអង្គ (ព្រះបរមរតនកោដ្ឋ) គម្រប់៧ព្រះវស្សានៃការយាងចូលសោយព្រះទីវង្គតរបស់ព្រះអង្គ ។
សូមថ្វាយមហាព្រះរាជកុសល ព្រះវិញ្ញាណក្ខន្ធ ព្រះករុណា ព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត នៃប្រជានុរាស្ត្រទូទាំងព្រះនគរ។
គួររំលឹកថា ព្រះករុណាព្រះបាទសម្ដេចព្រះនរោត្ដម សីហនុ រាជហរិវង្ស ឧភតោសុជាតិ វិសុទ្ធពង្ស អគ្គមហាបុរសរតន៍ និករោត្ដម ធម្មិកមហារាជាធិរាជ បរមនាថ បរមបពិត្រ ព្រះចៅក្រុងកម្ពុជាធិបតី (៣១ តុលា ១៩២២ – ១៥ តុលា ២០១២) ព្រះមហាក្សត្រ នៃព្រះរាជាណាចក្រកម្ពុជា ពីឆ្នាំ១៩៤១ដល់១៩៥៥ និងម្ដងទៀតចាប់ពីឆ្នាំ១៩៩៣ ដល់ ២០០៤។
ព្រះ អង្គប្រសូត្រនៅថ្ងៃអង្គារ ១១ កើត ខែ កក្ដិក ឆ្នាំច ចត្វាស័ក ព.ស. ២៤៦៥ ត្រូវនឹងថ្ងៃទី៣១ ខែតុលា ឆ្នាំ១៩២២ នៅរាជធានីភ្នំពេញ ព្រះរាជាណាចក្រកម្ពុជា ទ្រង់ចូលទិវង្គតនៅថ្ងៃចន្ទ ទី១៥ ខែតុលា ឆ្នាំ២០១២ ត្រូវនឹងថ្ងៃ១៥រោច ខែភទ្របទ ឆ្នាំរោង ចត្វាស័ក វេលាម៉ោង ១ និង ២០ នាទីយប់ នៅទីក្រុងប៉េកាំង ប្រទេសចិន ។
គោរម្យងារជាកិត្តិយស ជាព្រះបិតាឯករាជ្យជាតិខ្មែរ ក្រោយពីព្រះអង្គបានដាក់រាជ្យថ្វាយព្រះករុណាព្រះបាទសម្ដេចព្រះ បរមនាថនរោត្តម-សីហមុនី ព្រះចៅក្រុងកម្ពុជាធិបតី មានគោរម្យងារថា ព្រះករុណា ព្រះបាទសម្ដេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និង ឯកភាពជាតិខ្មែរ ៕
សម្រួលអត្ថបទ ៖ លោក លីវ សាន្ត
រូបថត ៖ រដ្ឋបាលខេត្តសៀមរាប
