ក្រុមមន្ត្រីអាមេរិកកំពុងវាយតម្លៃលើគម្រោង ដើម្បីយកចេញវិញនូវអាវុធនុយក្លេអ៊ែរប្រមាណ ៥០គ្រាប់ ដែលត្រូវបានរក្សាទុកនៅក្នុងមូលដ្ឋានទ័ពអាកាស អ៊ីនស៊ឺលីក (Incirlik) របស់តួកគីអស់រយៈពេលជាយូរណាស់មកហើយ ចំពោះមុខការធ្វើប្រតិបត្តិការ យោធារបស់តួកគីនៅភាគខាងជើងស៊ីរី។ នេះបើតាមការដកស្រង់ការផ្សាយចេញពីសារព័ត៌មាន New York Time នៅរសៀលថ្ងៃពុធ ទី១៦ ខែតុលា ឆ្នាំ២០១៩។
បើតាមមន្ត្រីជាន់ខ្ពស់អាមេរិកម្នាក់ គ្រាប់បែកនុយក្លេអ៊ែរទាំងនោះ គឺប្រៀបដូចជាចំណាប់ខ្មាំងរបស់ប្រធានាធិបតីតួកគី លោក អឺដូហ្គាន់ យ៉ាងដូច្នោះឯង។ ប្រសិនបើអាមេរិកយកពួកវាចេញពីបន្ទាយទ័ពតួកគីមែននោះ សម្ព័ន្ធភាពរវាងតួកគី និងអាមេរិកអាចរងការប៉ះពាល់ខ្លាំង ឬឈានដល់ទីបញ្ចប់ក៏ថាបាន។ ប៉ុន្តែបើនៅតែទុកអាវុធនុយក្លេអ៊ែរទាំងនេះ នៅក្នុងទឹកដីតួកគីតទៀត គឺអាមេរិកនៅតែមានចំណុចខ្សោយដដែល។ មិនតែប៉ុណ្ណោះលោក អឺដូហ្គាន់ ក៏បានបង្ហាញពីចេតនាចង់បង្កើន សមត្ថភាពនុយក្លេអ៊ែររបស់តួកគីផងដែរ៕
