នៅថ្ងៃទី១៦ ខែតុលា ឆ្នាំ២០១៩ ឯកឧត្តម លីវ សុខុន ទីប្រឹក្សាក្រសួងព័ត៌មាន និងឯកឧត្តម ក្រុមប្រតិភូក្រសួងព័ត៌មាន តំណាងឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកក្រឡាញ់ បានចុះពិនិត្យនៃការរៀបចំសោភណ្ឌភាព អាគារការិយាល័យច្រកចេញចូលតែមួយ នៃរដ្ឋបាលស្រុកក្រឡាញ់ និងបានចុះពិនិត្យសកម្មភាពចលនាប្រឡងប្រណាំង បង្កើតសួនបន្លែនៅតាមផ្ទះ របស់យុវជនក្នុងមូលដ្ឋាននេះផងដែរ។
លោកស្រី ម៉ននី រង្សី អភិបាលស្រុកស្រុកក្រឡាញ់ បានបញ្ជាក់ថា អាគារការិយាល័យច្រកចេញចូលតែមួយ គ្រោងនឹងបើកបម្រើប្រជាពលរដ្ឋក្នុងស្រុកក្រឡាញ់ នៅចុងឆ្នាំ២០១៩។ ជាមួយនោះ សោភណ្ឌភាព ក៏ជាការចូលរួមលើកកម្ពស់ដល់ការបម្រើសេវាសាធារណជូនដល់ប្រជាពលរដ្ឋផងដែរ។ ដូច្នេះ រដ្ឋបាលស្រុកកំពុងរៀបចំបង្កើតសួនច្បារ ចាក់ដីបំពេញទីធ្លា និងចាក់បេតុង ដែលថវិកាមួយចំនួនបានពីសប្បុរជន ដោយឡែក ឯកឧត្តម ជា ច័ន្ទបរិបូរណ៍ បានឧបត្ថម្ភថវិកាចំនួន ២លានរៀល ដើម្បីចូលរួមក្នុងសកម្មភាពនេះផងដែរ។
លោកស្រី អភិបាលស្រុកស្រុកក្រឡាញ់ ក៏បានថ្លែងអំណរគុណដល់ ឯកឧត្តម លីវ សុខុន និងក្រុមប្រតិភូក្រសួងព័ត៌មាន ដែលបាននាំយករង្វាន់ សម្រាប់បេក្ខជន ដែលនឹងទទួលជ័យលាភី ក្នុងចលនាប្រឡងប្រណាំង បង្កើតសួនបន្លែនៅតាមផ្ទះ របស់យុវជនក្នុងស្រុកក្រឡាញ់។
ព័ត៌មានជាតិ ថ្មីៗ
សូមរំលឹកថា ការប្រឡងប្រណាំង បង្កើតសួនបន្លែនៅតាមផ្ទះ របស់យុវជនក្នុងស្រុកក្រឡាញ់នេះ ជាការផ្ដួចផ្ដើមគំនិតផ្ទាល់ ពី ឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកក្រឡាញ់ ដើម្បីបណ្តុះគំនិតធ្វើកសិកម្ម និងដំណាំរួមផ្សំ ចៀសវាងការចំណាកស្រុកទៅក្រៅប្រទេស និងបង្កើនសុវត្ថិភាពស្បៀង និងចំណីអាហារក្នុងមូលដ្ឋាន ដែលស្របទៅនឹងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជា។ ជាមួយនោះ តាមរយៈការសម្របសម្រួលរបស់រដ្ឋបាលស្រុកក្រឡាញ់ មានយុវជន ដែលបានចុះឈ្មោះចូលរួមមានចំនួន១៧នាក់ ក្នុងនោះស្រី ៧នាក់ មកពីឃុំចំនួន ៨ ក្នុងចំណោម១០ឃុំ នៃស្រុកក្រឡាញ់។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
