សាលារៀនចំនួន០៤ ក្នុងសង្កាត់នគរធំ ក្រុងសៀមរាប រួមមានសាលារៀនស្ពីធ្លើរអញ្ញាញអង្គរ , សាលារៀនសាមគ្គីសហគមន៍ , សាលាអនុវិទ្យាល័យហ៊ុន សែន ស្រះស្រង់ និង វិទ្យាល័យនគរធំ ដែលមានសិស្សសរុបប្រមាណជាង២ពាន់នាក់ បានឯកភាពគ្នាសម្រេចប្រើប្រាស់ដបប្រភេទកែវសម្រាប់ដាក់ទឹកហូបយកទៅសាលារៀនជារៀងរាល់ថ្ងៃ ជំនួសដបប្រភេទប្លាស្ទីក ដើម្បីកាត់បន្ថយផលប៉ះពាល់ដល់បរិស្ថានក្នុងសាលា និង សុខភាពសិស្ស ។
លោក ជា សារិន នាយកប្រតិបត្ដិមូនិធិសាលាបឋមសិក្សាស្ពីធ្លើរអញ្ចាញ សង្កាត់នគរធំ ក្រុងសៀមរាប បានឲ្យដឹងថា ដោយ មានការឧបត្ថម្ភដបសម្រាប់ដាក់ទឹកបរិភោគជាប្រភេទកែវ ពីក្រុមហ៊ុនលក់សម្ភារការិយាល័យ ហ្វិកអហ្វីស Flex office សាលារៀនទាំង០៤នេះ បានឯកភាពគ្នាបញ្ឈប់ការប្រើប្រាស់ដបដាក់ទឹកប្រើប្រាស់ជាប្រភេទប្លាស្ទីក ក្នុងគោលបំណងថែរក្សាបរិស្ថាននៅក្នុងសាលាផង , កាត់បន្ថយនូវការនាំចូល និងប្រើប្រាស់ដបប្លាស់ស្ទិកនៅក្នុងសាលារៀនផង ខណៈដែលសាលារៀននេះ មានធុងទឹកចម្រោះ ដើម្បីផ្ដល់ទឹកជូនសិស្សានុសិស្សជាស្រេច ហើយដបទឹកថ្មីនេះ មានគុណភាពល្អអាចឲ្យសិស្សប្រើប្រាស់បានយូរ ដែលអាចជួយឲ្យអាណាព្យាបាលសិស្ស កាត់បន្ថយការចំណាយការមើលថែទាំសុខភាព និងថវិកាផងដែរ ហើយក្រៅពីនេះ ក្រុមហ៊ុននេះក៏បានផ្ដល់សម្ភារសិក្សាដល់សិស្សា នុសិស្សជាច្រើនទៀត រួមទាំងបង់អង្គុយដាក់ក្នុងសាលារៀនទៀតផង ។
កញ្ញា ចាន់ សុជាតា តំណាងក្រុមហ៊ុនធានឡុងអហ្វីស បានឲ្យដឹងថា ក្រុមហ៊ុននេះបានជួយសម្ភារសិក្សាដល់សាលាទាំងបួននេះជាលើកទី ២ហើយ ដើម្បីលើកទឹកចិត្ដដល់កុមារឲ្យចង់បន្ដការសិក្សាបានយូរអង្វែង ព្រោះសិស្សខ្លះនៅតាមជនបទតែងតែជួបការខ្វះខាត ខណៈដែលសាលារៀនស្ពីធ្លើរនេះ ជាសាលារៀនមូលនិធិដែលគ្រប់គ្រងបានល្អ ទើបក្រុមហ៊ុនជួយផ្ដល់សម្ភារសិក្សាដល់សិស្ស និងគ្រូបង្រៀន ដែលសរុបជាថវិកាប្រមាណជាង៣ពាន់ដុល្លារអាមេរិក ។
កញ្ញា ចាន់ សុជាតា បានឲ្យដឹងទៀតថា នេះជាពេលវេលាដែលត្រូវតបស្នងដល់ប្រទេសកម្ពុជា ដែលបានអនុញ្ញាតឲ្យក្រុមហ៊ុននេះ បើកដំណើរការអាជីវកម្មរបស់ខ្លួនអស់រយៈពេលប្រមាណជាង២០ឆ្នាំមកហើយ ហើយក្រុមហ៊ុននឹងមានគម្រោងបន្តផ្ដល់សម្ភារការិយាល័យ និងសម្ភារសិស្ស ដើម្បីឲ្យពួកគាត់មានអនាគតភ្លឺស្វាង ៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក លីវ សាន្ត
