កាលពីពេលថ្មីកន្លងមកនេះ ក្រុមអ្នកលក់ក្រឡានមួយចំនួននៅស្រុកសូទ្រនិគម ខេត្ដសៀមរាប បានត្អូញត្អែរថា ការលក់ក្រឡាន មិនសូវមានទីផ្សារក្នុងរយៈពេលចុងក្រោយនេះ ដោយសារមិនសូវមានភ្ញៀវអន្ដរជាតិឆ្លងកាត់ និងអ្នកលក់កើនឡើង។
ក្នុងនោះដែរ ពលរដ្ឋដែលជាអ្នកលក់ក្រឡានមួយរូប នៅលើដងផ្លូវជាតិលេខ៦ ស្ថិតនៅភូមិក្បូន ស្រុកសូទ្រនិគម ខេត្ដសៀមរាប អ្នកស្រី ទិន ឆេន បានអោដឹងថា បច្ចុប្បន្ននេះ ក្រឡានដែលអ្នកភូមិដាក់លក់នៅតាមដងផ្លូវជាតិនេះ មិនសូវមានភ្ញៀសចរណ៍ឈប់ទិញនោះទេ ព្រោះមិនសូវមានអ្នកទេសចរណ៍អន្ដរជាតិឆ្លងកាត់ទៅទស្សនានៅតាមប្រាសាទនានា ក្នុងខេត្ដសៀមរាប ហើយសម្រាប់ភ្ញៀវខ្មែរវិញ លក់ដាច់ម្ដងៗមានតែពេលបុណ្យជាតិធំៗ ដូចជាបុណ្យចូលឆ្នាំ បុណ្យភ្ជុំ និងឆ្លងឆ្នាំសកលជាដើម។ ហើយក្នុងនោះដែរ ការធ្លាក់ចុះទីផ្សារនេះ គួបផ្សំនឹងអ្នកក្រឡានច្រើនជាងមុនផងដែរ ។
អ្នកស្រីបានបន្ដឲ្យដឹងទៀតថា ក្នុងមួយថ្ងៃអ្នកស្រីធ្វើក្រឡានលក់ក្នុងមួយថ្ងៃមិនអស់អង្ករ៦គីឡូផង ។ ហើយចំពោះអ្នកស្រី ក៍ដូចអ្នកក្រឡានផ្សេងទៀត ពួកគាត់ចង់អោយប្រជាពលរដ្ឋលើកស្ទួយក្រឡានខ្មែរ ដូចលើកស្ទួយអំបុក និងនំបញ្ចុកអោយបានច្រើនដែរ ព្រោះវាជាផលិតផលខ្មែរ ហើយអ្នកធ្វើក្រឡានមានទូរទាំងប្រទេស ។
ជាមួយគ្នានោះដែរ អ្នកលក់ក្រឡានពីររូបទៀត បានអោយដឹងស្រដៀងគ្នាដែរថា កាលពីឆ្នាំមុន ក្រឡានខ្មែរ នៅស្រុកសូទ្រនិគមលក់ដាច់ច្រើន ប៉ុន្ដែឆ្នាំនេះ មិនសូវមានអ្នកទិញទេ ហើយក្រឡានលក់រាល់ថ្ងៃស្ទើរមិនរួចថ្លៃដើមផង ព្រោះឬស្សីក៍ថ្លៃ និងអង្ករក៍ថ្លៃ។
គួរឲ្យដឹងដែរថា ក្រឡានគឺជាបាយបំពង់ម្យ៉ាងដែលគេយកអង្ករដំណើប និងលាយគ្រឿងផ្សំជាច្រើនទៀត ដាក់ចូលក្នុងបំពង់ឬស្សីកំណាត់ៗមានតូច មានធំ រួចដុតដុតភ្លើង ។បច្ចុប្បន្ននេះ ក្រឡានត្រូវបានពលរដ្ឋខ្មែរ ធ្វើលក់នៅតាមដងផ្លូវជាតិនានាស្ទើរទូទាំងប្រទេសផងដែរ ៕
អត្ថបទ និងរូបភាព៖ បូ សាវី ,ខេង ឧត្ដម
កែសម្រួល៖ អ៊ុន ណារាជ្យ
