នៅព្រឹកថ្ងៃទី១៧ ខែតុលា ឆ្នាំ២០១៩នេះ លោកជំទាវ ទាង អេង ទៀ សីហា ប្រធានគណៈកម្មការកិត្តយសសមាគមនារីកម្ពុជាដើម្បីសន្តិភាព និង អភិវឌ្ឍន៍ខេត្ត បានអញ្ជើញជួបធ្វើការសំណេះសំណាល និង នាំយកអំណោយ ជាគ្រឿងឧបភោគបរិភោគ ជូនដល់គ្រួសារ(ក្រ១)ចំនួន ១០០គ្រួសារមកពី១៧ភូមិក្នុងឃុំគោកដូង ស្រុកអង្គរជុំ ខេត្តសៀមរាប ដោយរួមដំណើរពីសំណាក់លោកជំទាវ លោកស្រីជាភរិយាថ្នាក់ដឹកនាំមន្ទីរ និង សប្បុរសជន ។
ក្នុងឱកាសនោះដែរ លោកជំទាវ ទាង អេង ទៀ សីហា ក៏បាន មានប្រសាសន៍សំណេះសំណាលជាមួយបងប្អូនជាសមាជិកសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្នុងឃុំ គោកដូង ដោយលោកជំទាវ បានគូសបញ្ជាក់ថា អំណោយដែលបានចែកជូនដល់បងប្អូននាពេលនេះ គឺជាការបង្ហាញ់អំពីវប្បធម៌នៃការចែករំលែក របស់សមាគមនារីកម្ពុជា ដើម្បីសន្តិភាព ដែលមានសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានកំពុងយកចិត្តទុកដាក់ខ្ពស់ លើការលើកកម្ពស់តម្លៃស្ត្រី ដោយបានផ្តល់អនុសាសន៍ជាច្រើនពាក់ព័ន្ធ នឹងការងារ និង អត្ថប្រយោជន៍របស់ស្ត្រី នៅតាមក្រសួង ស្ថាប័ន អង្គភាពសាធារណៈ ក៏ដូចជាវិស័យឯកជន សំដៅធ្វើយ៉ាងណាឲ្យមានការចូលរួមកាន់តែច្រើន និង ប្រកបដោយគុណភាព ប្រសិទ្ធភាពការងារពីសំណាក់ស្ត្រី ក្នុងកិច្ចដំណើរការអភិវឌ្ឍសង្គម និងសេដ្ឋកិច្ចជាតិ ។
លោកជំទាវ ទាង អេង ទៀ សីហា ក៏បានបញ្ជាក់ផងដែរថា ដោយបណ្តាស្រុកមួយចំនួនក្នុងខេត្ត បានទទួលរង គ្រោះធម្មជាតិគ្រោះរាំងស្ងួន និង ទឹកជំនន់ ហើយត្រូវបានអាជ្ញាធរ បានយកចិត្តទុកដាក់ គិតគូអំពីសុខទុក្ខរបស់ប្រជាពលរដ្ឋ ដោយមិនប្រកាន់ពូជសាសន៍ ពណ៌សម្បុរ និន្នាការនយោបាយណាមួយឡើយ ។
លោកជំទាវបន្តទៀតថា ដើម្បីលើកកម្ពស់សុខមាលភាព របស់ប្រជាពលរដ្ឋ រាជរដ្ឋាភិបាល បានដាក់ចេញក្របខ័ណ្ឌ គោលនយោបាយជាតិគាំពារសង្គម ដែលផ្តល់ផលប្រយោជន៍ជាច្រើន សំខាន់ស្ត្រីមានផ្ទៃពោះ ជនពិការ ចាស់ជរាគ្មានទីពឹង និង ផ្តល់ការគាំពារ ហានីភ័យ លើផ្នែកសុខភាព ហានិភ័យការងារ ពិការភាព ដើម្បីធានាការរស់នៅដ៏សុខសាន្តរបស់ប្រជាពលរដ្ឋគ្រប់រូបក្នុងមូលដ្ឋាន ។ ក្នុងនោះដែរស្ត្រីយើង ត្រូវធ្វើការផ្សព្វផ្សាយពីគោលនយោបាយ របស់គណបក្សប្រជាជនកម្ពុជា និង ត្រូវក្តាប់ឲ្យបាននូវសតិអារម្មណ៍របស់នារីក្នុងមូលដ្ឋានខ្លួន ព្រមទាំងត្រូវធ្វើការណែនាំ ឲ្យពួកគេយល់ដឹងអំពីកាតព្វកិច្ចជាប្រជាពលរដ្ឋ ហើយក៏កុំជឿនូវតាមការឃោសនាអកុសល ដែលបានចិញ្ចឹមចិត្តប្រឆាំងផ្កាប់មុខ មិនគិតពីសុខទុក្ខរបស់ប្រជាពលរដ្ឋ និង មិនចង់ឲ្យប្រទេសជាតិមានសុខសន្តិភាព និង ការរីកចម្រើន គឺពួកជនទាំងនោះចង់បង្កចលាចល ធ្វើឲ្យប្រទេសជាតិធ្លាក់ក្នុងភ្លើងសង្គ្រាម ជាសំខាន់ក្នុងពេលថ្មីៗនេះ បុគ្គលជនក្បត់ជាតិ សម រង្ស៊ី ដែលហ៊ានប្រមាថដល់ព្រះមហាក្សត្រថែមទៀតផង ។
ក្នុងនោះដែរលោកជំទាវ ទាង អេង ទៀ សីហា ក៏បានធ្វើការក្រើនរំលឹកដល់ បងប្អូន លោកអុំ លោកពូ អ្នកមីង យាយតា សំខាន់បងប្អូនស្ត្រីទាំងអស់ រួមសាមគ្គីគ្នាឡើងប្រឆាំងទៅនឹងទង្វើក្បត់ជាតិ ដែលហ៊ានប្រមាថព្រះមហាក្សត្រ ដែលជីវិតតម្កល់លើត្បូងនៃប្រជាពលរដ្ឋកម្ពុជាយើង និង សូមឲ្យបងប្អូននៅឲ្យឆ្ងាយពី ការឃោសនារបស់ក្រុមឧទាមក្រៅច្បាប់ ដើម្បីសន្តិសុខសុវត្ថិភាពរបស់បងប្អូន និង ក្រុមគ្រួសារ ។
លោកជំទាវ ក៏បានធ្វើការអំពាវនាវឲ្យបងប្អូនស្ត្រីទាំងអស់ រួមសាមគ្គីគ្នាឡើងប្រឆាំងទៅនឹងទង្វើក្បត់ជាតិ ដែលហ៊ានប្រមាថព្រះមហាក្សត្រ ដែលជីវិតតម្កល់លើត្បូងនៃប្រជាពលរដ្ឋកម្ពុជាយើង និង សូមឲ្យបងប្អូននៅឲ្យឆ្ងាយពី ការឃោសនារបស់ក្រុមឧទាមក្រៅច្បាប់ ដើម្បីសន្តិសុខសុវត្ថិភាពរបស់បងប្អូន និង ក្រុមគ្រួសារ ។ ដើម្បីភាពសុខសាន្ត និង កិច្ចអភិវឌ្ឍន៍ឲ្យមានការរីកចម្រើនទៅអនាគត សូមបងប្អូនជានារី និង ប្រជាពលរដ្ឋគ្រប់ស្រទាប់វណ្ណៈទាំងអស់ ត្រូវរួមកម្លាំងសាមគ្គីគ្នាការពារ និង ថែរក្សាសន្តិភាពនៅកម្ពុជា ។ លោកជំទាវក៏បានធ្វើការផ្តាំផ្ញើ និងណែនាំដល់បងប្អូននារីយើង ត្រូវធ្វើការដាំដុះដំណាំរួមផ្សំ ក្នុងការលើកកម្ពស់ជីវភាពគ្រួសារ ដើម្បីកសាងអនាគតរបស់ខ្លួន ហើយក៏ជាកម្លាំង និង គ្រឹះដ៏រឹងមាំរបស់គណបក្សប្រជាជនកម្ពុជា ព្រមទាំងសូមឲ្យបងប្អូនចូលរួមក្នុងពិធីហូបអំបុកសាមគ្គី ជាតិ សាសនា ព្រះមហាក្សត្រ នៅថ្ងៃទី០៩ វិច្ឆិការ ខាងមុខនេះ ។
គួរឲ្យដឹងដែរថា អំណោយដែលបានចែកជូនដល់បងប្អូនប្រជាពលរដ្ឋក្រ១ ទាំង១០០គ្រួសារនៅពេលនេះ ដោយក្នុងមួយគ្រួសារទទួលបាន អង្ករ , មី , មីចេង ,មុង , កន្ទេល , ភួយ ,ត្រីខ , ធុងទឹកធំ , តង់ និង ថវិកា ២ម៉ឺនរៀលផងដែរ ៕
អត្ថបទ និងរូបភាព៖ ម៉ី សុខារិទ្ធ
កែសម្រួល៖ អ៊ុន ណារាជ្យ
