កាលពីព្រឹកថ្ងៃទី១៧ ខែតុលា ឆ្នាំ២០១៩នេះ លោកស្រី ឧត្តមសេនីយ៍ត្រី ដួង ថាវរី ស្នងការរងនគរបាលខេត្ត- លេខាធិការង នៃលេខាធិការដ្ឋានគណកម្មាធិការប្រយុទ្ធប្រឆាំងអំពើរជួញដូរមនុស្សខេត្តសៀមរាប បានដឹកនាំបើកកិច្ចប្រជុំ ប្រចាំត្រីមាសទី៣ ឆ្នាំ២០១៩ របស់លេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើរជួញដូរមនុស្សខេត្ត ដើម្បីធ្វើការពិនិត្យ និងពិភាក្សាឡើងវិញ ពីបញ្ហាជួញដូរមនុស្ស ការធ្វើអាជីវកម្មផ្លូវភេទ អំពើកេងប្រវ័ញ្ចលើកម្លាំងកុមារ ដោយសារតែបញ្ហានេះនៅតែមានកើតឡើង ដោយបង្កឲ្យមានភាពស្មុគស្មាញ ធ្វើឲ្យក្រុមការងារ សមត្ថកិច្ច និងអង្គការដែគូ ដោយមានការចូលរួមដោយក្រុមការងារទាំង៦ និងបណ្តាអង្គការក្រៅរដ្ឋាភិបាលជាដៃគូមួយចំនួនទៀត ។
លោកស្រី ឧត្តមសេនីយ៍ត្រី ដួង ថាវរី បានមានប្រសាសន៍ថា ស្ថានភាពទូទៅនៅខេត្តសៀមរាប ដែលពាក់ព័ន្ធទៅនឹងអំពើជួញដូរមនុស្ស ការធ្វើអាជីវកម្មផ្លូវភេទ ការរត់ពន្ធមនុស្ស និងការជួញដូរមនុស្សឆ្លងដែន នៅតែមានភាពស្មុគស្មាញ បត់បែន និងជ្រកក្រោមរូបភាពស្របច្បាប់ផ្សេងៗ ដែលជនល្មើសអាចប្រើប្រាស់ ដើម្បីកេងប្រវ័ញ្ចលើប្រជាពលរដ្ឋដែលងាយរងគ្រោះ ដូចជាការធ្វើអាជីវកម្មផ្លូវភេទតាមរួបភាពជាសេវាកំសាន្ត ខារ៉ាអូខេ ម៉ាស្សា ការធ្វើការងារតាមហាងបៀរហ្គាដិន ជាដើម ។
លោកស្រី មានប្រសាសន៍ទៀតថា ជាមួយគ្នានេះដែរ ការប្រើប្រាស់រូបភាពភ្ជាប់ពាក្យ ឬអាពាហ៍ពិពាហ៍នាំស្ត្រីចេញទៅក្រៅប្រទេសតាមទិដ្ឋាការទេសចរណ៍ បំរើឲ្យគោលដៅរកគូស្រករ លក់កម្លាំងពលកម្ម កេងប្រវ័ញ្ចផ្លូវភេទ ហើយការប្រើប្រាស់រូបភាពសូមទាន ដោយករណីនេះវាក៏នៅតែជាបញ្ហា ឲ្យវាជាអំពើខុសច្បាប់យ៉ាងធ្ងន់ធ្ងរ លើកការកេងប្រវ័ញ្ជអនាគតរបស់កុមារ ។
ព័ត៌មានជាតិ ថ្មីៗ
លោកស្រី ឧត្តមសេនីយ៍ត្រី ដួង ថាវរី បានឲ្យដឹងទៀតថា កិច្ចប្រជុំនៅពេលនេះដែរ គឺដើម្បីពិនិត្យរបាយការណ៍លទ្ធផលការងារឡើងវិញ មុននឹងដាក់បញ្ជូនទៅថ្នាក់ជាតិ ហើយអ្វីដែលកិច្ចប្រជុំផ្តោតការយកចិត្តទុកដាក់បំផុតនោះ គឺការអនុវត្តផែនការ ដោះស្រាយបញ្ហាប្រឈមនានា ថាតើទទួលបានលទ្ធផលយ៉ាងណានោះ ដូចជាករណីអំពើហឹង្សាក្នុងគ្រួសារនៅស្រុកស្វាយលើ ដែលបន្សល់ទុកឲ្យកុមារ៣នាក់ត្រូវវបានក្លាយជាជនរងគ្រោះ ( ម្តាយស្លាប់ ឱពុកជាប់ពន្ធនាគារ ) ករណីក្មេងប្រុសនៅស្រុកប្រាសាទបាគងជាអនីតិជន ត្រូវជាប់ចោទពីបទចាប់រំលោភ និងករណីឆបោកជ្រើសរើសកម្លាំងពលកម្មនាំចេញទៅក្រៅប្រទេសជាដើម ។ល។
លោកស្រី មានប្រសាសន៍បន្ថែមថា យ៉ាងណាក៏ដោយនៅក្នុងកិច្ចប្រជុំនោះ បណ្តាអង្គការជាដៃគូដែលកំពុងប្រតិបត្តិការលើ ការងារប្រយុទ្ធប្រឆាំងអំពើរជួញដូរមនុស្សនៅក្នុងខេត្តសៀមរាប បានបង្ហាញអំពីជំហរសហការរបស់ខ្លួន និងស្នើសុំឲ្យមានការចែករំលែកព័ត៌មាន ឲ្យបានឆាប់រហ័ស ដើម្បីជួយសង្គ្រោះជនរងគ្រោះបានទាន់ពេលវេលា និងចាត់វិធានការច្បាប់ ចំពោះជនសង្ស័យ លាងសម្អាតសង្គមឲ្យបានល្អប្រសើរ ៕
អត្ថបទ និងរូបភាព៖ ងិន គឹមឡេង
កែសម្រួល៖ អ៊ុន ណារាជ្យ
