លោកវរៈសេនីយ៍ឯក ណុប សារ៉ាក់ អធិការនគរបាលក្រុងសៀមរាប បានឲ្យដឹងថា កាលពីវេលាម៉ោង ២០និង១០នាទីនាថ្ងៃទី១៦ ខែតុលាឆ្នាំ២០១៩នេះ មានករណីមនុស្សលង់ទឹកស្លាប់នៅត្រង់ចំណុច កស្សិណ ទឹក នៃប្រាសាទគោកចក ស្ថិតក្នុងក្រុមទី១០ ភូមិវាល សង្កាត់គោកចក ក្រុងសៀមរាប ដែលជនរងគ្រោះមានឈ្មោះ ឈុន លីសំណាង ភេទប្រុស អាយុ០៧ឆ្នាំមានទីលំនៅក្នុងភូមិវាល សង្កាត់គោកចក ដែលមូលហេតុនេះ ជនរងគ្រោះចុះលេងទឹកបណ្តាលឲ្យលង់ស្លាប់ ។
លោកវរៈសេនីយ៍ឯក ណុប សារ៉ាក់ បានឲ្យដឹងទៀតថា ក្រោយពេលកើតហេតុ កម្លាំងជំនាញបានចុះទៅដល់ទីតាំងកើតហេតុ ហើយតាមការពិនិត្យសាកសពរបស់កម្លាំងសមត្ថកិច្ចនគរបាលជំនាញ បានបញ្ជាក់ថា ក្មេងប្រុសដែលជាជនរងគ្រោះនេះ បានស្លាប់ដោយ សារលង់ទឹកពិតប្រាកដមែន ព្រោះក្រៅពីនោះ សាកសពពុំមានអី្វដែលជាប់សង្ស័យពាក់ព័ន្ធនឹងបទល្មើសព្រហ្មទណ្ឌឡើយ និង ក្រោយ ពីពិនិត្យរួច សមត្ថកិច្ចបានប្រគល់សាកសពទៅឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
