ថ្លែងក្នុងឱកាសពិធីបើកសម្ភោធសមាគមចិនឈ្មោះ វី ឆារីថេបល ហ្វោនដេសិន នៅខេត្ដសៀមរាប កាលពីល្ងាចថ្ងៃទី១៨ ខែតុលា ឆ្នាំ២០១៨នេះ លោក ពៅ ពិសិដ្ឋ បានអំពាវនាវដល់សមាគម បន្តជួយអភិវឌ្ឍន៍ និងជួយដល់ពលរដ្ឋក្រីក្រនៅក្នុងខេត្ដសៀមរាប ព្រោះថា កម្ពុជាធ្លាប់មានសេដ្ឋកិច្ចរីកចម្រើនមុនឆ្នាំ ១៩៧០ ហើយដោយសារសង្គ្រាម បានធ្វើឱ្យប្រទេសកម្ពុជាបាត់បង់អ្វីទាំងអស់ ។
លោក ពៅ ពិសិដ្ឋ បានឲ្យដឹងទៀតថា បច្ចុប្បន្ននេះ ប្រទេសកម្ពុជា ក្រោមការដឹកនាំរបស់សម្ដេចតេជោ ហ៊ុន សែន បានធ្វើឲ្យមានសុខសន្ដិភាព និងការអភិវឌ្ឍន៍ជាបន្តបន្ទាប់គ្រប់ទីកន្លែង តាមរយៈការជួយជ្រោមជ្រែងពីប្រទេសជាមិត្ត និងអង្គការសប្បុរសធម៌នានា ប៉ុន្ដែប្រទេសកម្ពុជា នៅតែត្រូវការជានិច្ច ចំពោះដៃគូរអភិវឌ្ឍន៍ពីបរទេស ដើម្បីបង្កើនការទំនាក់ទំនងទ្វេរភាគីកាន់តែស្អិតរមួត ។
លោក ហ៊ូ ប្រធានសមាគមនមូលនិធិសប្បុរសធម៌ វី ឆារីថេបល ហ្វោនដេសិន បានមានប្រសាសន៍ថា ក្នុងដំណើរមកកាន់ប្រទេសកម្ពុជាជាលើកទី៣របស់លោក លោកកត់សម្គាល់ឃើញថា កម្ពុជាមានការអភិវឌ្ឍគួរឱ្យកត់សម្គាល់ ប៉ុន្តែលោកក៏បានមើលឃើញអ្នកក្រីក្រមួយចំនួន នៅតាមតំបន់ដាច់ស្រយាលមួយចំនួនផងដែរ ដូច្នេះ ក្នុងនាមលោកជាប្រធានមូលនិធិ លោកនឹងរៀបចំកម្មវិធីសប្បុរសធម៌ ក្នុងគោលបំណងប្រមូលសប្បុរសជននានាមកពីប្រទេសចិន ដើម្បីជួយអ្នកខ្វះខាតទាំងនោះ ដូចជាការឧបត្ថម្ភសម្ភារ និងសាងសង់សាលារៀនជាដើម ហើយសង្ឃឹមថា តាមរយៈមូលនិធិមួយនេះ នឹងអាចកៀងគរសប្បុរសជនផ្សេងៗក្នុងប្រទេសចិន ជំរុញឱ្យពួកគេធ្វើយ៉ាងណាចូលរួមការអភិវឌ្ឍគ្រប់ទីកន្លែងនៅកម្ពុជា ៕
អត្ថបទ និង រូបថត ៖ លោក ម៉ាត់ អារីហ្វីន និង លោក គឿន វេត
កែសម្រួលអត្ថបទ ៖ លោក លីវ សាន្ត
