នៅព្រឹកថ្ងៃច័ន្ទ ទី២១ ខែតុលា ឆ្នាំ២០១៩ នេះ លោក ង៉ាន់ ភិរុណ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប បានដឹកនាំបើកកិច្ចប្រជុំត្រួតពិនិត្យ គម្រោងស្នើសុំជួសជុលទំនប់អាងទឹក០៧ភូមិ ប្រវែងជាង ៥០០ម៉ែត្រ និងខ្នងលើប្រវែង ០៣ម៉ែត្រ ស្ថិតនៅក្នុងសហគមន៍ឃុំអន្លង់សំណរ ស្រុកជីក្រែង ខេត្តសៀមរាប ដោយមានការចូលរួមពីតំណាងលោក នាយកទីចាត់ការផែនការ និងវិនិយោគសាលាខេត្ត តំណាងអាជ្ញាធរស្រុក ឃុំ មន្ទីរធនធានទឹក និងឧតុនិយមខេត្ត មន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរបរិស្ថានខេត្ត និងមន្ត្រីជំនាញពាក់ព័ន្ធផ្សេងៗទៀតផងដែរ ។
លោក ង៉ាន់ ភិរុណ បានមានប្រសាសន៍ថា កិច្ចប្រជុំនាឱកាសនេះ គឺមានគោលបំណងដើម្បីឲ្យអាជ្ញាធរស្រុក ឃុំ មន្ទីរ អង្គភាពជំនាញពាក់ព័ន្ធទាំងអស់ ចូលរួមជាមតិយោបល់លើគម្រោងស្នើសុំជួសជុលទំនប់អាងទឹក ០៧ភូមិ ដោយសារតែបច្ចុប្បន្នទំនប់នេះមានលក្ខណៈទាប ហើយទឹកហូរច្រោះដាច់ មិនអាចស្តុកទឹកបានច្រើនគ្រប់តាមតម្រូវការប្រជាកសិករក្នុងការបង្កបង្កើនផល និងជាពិសេសមានការលំបាកក្នុងការដឹកជញ្ជូនផលស្រូវ និងការធ្វើដំណើររបស់ប្រជាសហគមន៍ផ្ទាល់ ។
លោក ង៉ាន់ ភិរុណ ក៏បានមានប្រសាសន៍បន្ថែមថា ចំពោះអាជ្ញាធរស្រុក ឃុំ គ្រប់បណ្តាមន្ទីរ អង្គភាពជំនាញ និងអ្នកពាក់ព័ន្ធទាំងអស់ គឺត្រូវមានការយកចិត្តទុកដាក់ឲ្យបានខ្ពស់ក្នុងការងារនេះ ជៀសវាងការជួសជុលទំនប់អាងទឹកខាងលើ ធ្វើឲ្យមានការកាប់បំផ្លាញព្រៃលិចទឹក ប៉ះពាល់ដល់តំបន់ការពារ អភិរក្សធនធានធម្មជាតិ និងការឈូសឆាយព្រៃលិចទឹកធ្វើជាកម្មសិទ្ធិ។
ព័ត៌មានជាតិ ថ្មីៗ
លោក អភិបាលរងខេត្ត ក៏បានជំរុញដល់ក្រុមការងារទាំងអស់ដែលបានចូលរួមក្នុងឱកាសនេះ ត្រូវសហការគ្នាឲ្យបានល្អ ជាពិសេស ត្រូវកំណត់កាលបរិច្ឆេទឲ្យច្បាស់លាស់ ហើយត្រូវចុះពិនិត្យ និងសិក្សាទីតាំងស្នើសុំនោះ ហើយត្រូវធ្វើរបាយការណ៍ និងថតរូបភ្ជាប់ជាឯកសារឲ្យបានគ្រប់គ្រាន់ ដើម្បីមានមូលដ្ឋានសម្រាប់ដាក់ស្នើសុំការសម្រេចពីឯកឧត្តម អភិបាលនៃគណៈអភិបាលខេត្តក្នុងការជួសជុលទំនប់ទឹកមួយនេះ ៕
អត្តបទនិងរូបភាព៖រដ្ឋបាលខេត្តសៀមរាប
កែសម្រួល៖ អ៊ុន ណារាជ្យ
