បន្ទាប់ពីបានបើកសម្ពោធជាផ្លូវការនៅសាខាថ្មី ក្រុមហ៊ុនធានារ៉ាប់រងអាយុជីវិត (AIA ខេមបូឌា ) ក្នុងខេត្តសៀមរាបកន្លងមកនេះ ដែលក្រុមហ៊ុនបានផ្តោតលើសុខភាពនិងសុខុមាលភាពរបស់ប្រជាជនកាន់តែច្រើន និងបង្កើតការងារថ្មីៗជាច្រើននៅក្នុងខេត្តសៀមរាប និងតំបន់ជុំវិញ ក្នុងបេសកកម្មរបស់ក្រុមហ៊ុន AIA ខេមបូឌា ដើម្បីចូលរួមចំណែកកាត់បន្ថយនៅភាពក្រីក្រចំពោះប្រជាជនកម្ពុជាទាំងអស់ឲ្យមានសុខភាព និងជីវិតកាន់តែប្រសើរ ថែមទៀតនោះ កាលពីថ្ងៃទី២០ ខែតុលា ឆ្នាំ២០១៩នេះ ប្រជាពលរដ្ឋនៅខេត្តសៀមជាងមួយពាន់នាក់ បានទទួលការពិន្យិសុខភាពដោយ ឥតគិតថ្លៃ លើស្ថានភាពជំងឺតម្រងនោម និងលំពែង ពីក្រុមហ៊ុន AIA ខេមបូឌា ។
ក្នុងឱកាសនោះ ព្រះសង្ឃ និង បងប្អូនប្រជាពលរដ្ឋ បានសាទរយ៉ាងក្រៃលែងចំពោះក្រុមហ៊ុន AIA ខេមបូឌា ដែលបានផ្តល់ការពិន្យិសុខភាពដោយឥតគិតថ្លៃ លើស្ថានភាពជំងឺតម្រងនោម និង ជំងឺលំពែង ជូនដល់បងប្អូនប្រជាពលរដ្ឋ ដែលជាផ្នែកមួយក្នុងការចូលរួមអភិវឌ្ឍន៍សង្គម ក៏ដូចជាចូលរួមចំណែកជាមួយរាជរដ្ឋាភិបាលផងដែរ ខណៈដែលខាងក្រុមហ៊ុន និង លោកគ្រូ អ្នកគ្រូពេទ្យ ពួកគាត់បានយកចិត្តទុកដាក់ក្នុងការពន្យល់ និងធ្វើតេស្តត្រួតពិនិត្យបញ្ហាសុខុមាលភាពរបស់ប្រជាពលរដ្ឋយ៉ាងម៉ត់ចត់ជាទីបំផុត ។
សូមបញ្ជាក់ថា កាលពីព្រឹកថ្ងៃទី១៩ ខែតុលា ឆ្នាំ២០១៩កន្លងទៅនេះ ក្រុមហ៊ុនធានារ៉ាប់រងអាយុជីវិត AIA ខេមបូឌា បានបើកសម្ពោធដាក់ឲ្យដំណើរការជាផ្លូវការនូវសាខាប្រចាំខេត្តសៀមរាប ក្រោមប្រធានបទ សុខភាព និងជីវិតកាន់តែប្រសើរ ក្រោមអធិបតីលោក អ៊ិន មាត្រា ប្រធាននាយកដ្ឋានធានារ៉ាប់រង និងសោធន និងជាតំណាងដ៏ខ្ពង់ខ្ពស់របស់លោកជំទាវ ងួន សុខា រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ , លោក Ng Keng Hooi នាយកប្រតិបត្តិ និងប្រធាននៃសម្ព័ន្ធ AIA និង លោក Tan Hak Leh ដែលជានាយកប្រតិបត្តិប្រចាំតំបន់ ដោយមានការចូលរួមពីសំណាក់ ភ្ញៀវជាតិ អន្តរជាតិ តំណាងមកពីដៃគូអាជីវកម្មរបស់ AIA ខេមបូឌា ធនាគារកម្ពុជាសាធារណៈ និងគ្រឹះស្ថានមីក្រូហិរញ្ញវត្ថុអម្រឹត ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
