រថយន្តកុងតឺន័រ ដែលដឹកផ្លែស្រកានាគ រាប់រយកុងតឺន័រ បានជាប់នៅឯព្រំដែន ភាគខាងជើងក្នុងខេត្ត Lang Son ដោយសារតែខាងគយរបស់ចិន ចំណាយពេលយូរដើម្បីបញ្ជាក់។
យោងតាមសារព័ត៌មាន VN Express ចេញផ្សាយកាលពីថ្ងៃទី២០ ខែតុលា ឆ្នាំ២០១៩ បានឱ្យដឹងថា គិតត្រឹមព្រឹកថ្ងៃសៅរ៍ កុងតឺន័រប្រហែល ៥០០ ដែលភាគច្រើនដឹកផ្លែស្រកានាគ កំពុងរង់ចាំវេនរបស់ខ្លួន ដោយបង្កើតជាជួរជិត ៥ គីឡូម៉ែត្រ នៅច្រកព្រំដែន តាន់ថាញ់។
លោក Nguyen Huu Vuong អនុប្រធានគយខេត្ត Lang Son បាននិយាយថា ច្រកទ្វារព្រំដែន Tan Thanh មានជំនាញក្នុងការនាំចេញ ផលិតផលកសិកម្មរបស់វៀតណាម។
ដូច្នេះវាបានក្លាយជាទិសដៅដ៏ធំ សម្រាប់នាំចេញផ្លែស្រកានាគ ក្នុងរយៈពេលជាងមួយសបា្តហ៍ កន្លងទៅនេះ ចំពេលរដូវប្រមូលផល ហើយមានរថយន្តដឹកទំនិញ រហូតដល់ ២០០ គ្រឿង បាននិងកំពុងធ្វើដំណើរជារៀងរាល់ថ្ងៃ។
ទន្ទឹមនឹងនេះដែរប្រទេសចិន ទើបតែចាប់ផ្តើមអនុវត្តគោលនយោបាយ ត្រួតពិនិត្យតឹងរឹងជាងមុនសម្រាប់យានយន្ត និងទំនិញនាំចូលដោយពន្យារពេល ដែលរថយន្តដឹកទំនិញនីមួយៗ ត្រូវឆ្លងកាត់ច្រកព្រំដែនរយៈពេល ៥-៧ នាទី ដែលបណ្តាលឱ្យមានការកកស្ទះ៕
ប្រភព៖ដើមអំពិល
ប្រែសម្រួលៈ ណៃ តុលា
